Australia News: ઓસ્ટ્રેલિયાએ મેટા પ્લેટફોર્મ, ગૂગલ અને ટિકટોક જેવી મોટી ડિજિટલ કંપનીઓ પર 2.25 ટકા ટેક્સ લગાવવાનો પ્રસ્તાવ મૂક્યો છે. સરકારનો હેતુ છે કે આ રકમ દ્વારા સમાચાર સંસ્થાઓ અને પત્રકારોને (Journalists) આર્થિક સહાય આપવામાં આવે.

સરકાર માને છે કે ડિજિટલ પ્લેટફોર્મ્સ દ્વારા સમાચાર સામગ્રીનો ઉપયોગ થાય છે, તેથી મીડિયા હાઉસને પણ તેનો યોગ્ય આર્થિક લાભ મળવો જોઈએ.

આ કાયદાનો મુખ્ય હેતુ શું છે? જાણો સંપૂર્ણ વિગત

સરકાર દ્વારા આ સંબંધિત ડ્રાફ્ટ કાયદો જાહેર કરવામાં આવ્યો છે, જે 2 જુલાઈ સુધી સંસદમાં રજૂ કરવાની યોજના છે. આ કાયદાનો મુખ્ય હેતુ સોશિયલ મીડિયા કંપનીઓને પત્રકારત્વ માટે યોગ્ય ચુકવણી સુનિશ્ચિત કરવા સમાચાર સંસ્થાઓ સાથે વ્યાપારી કરારો કરવા માટે પ્રોત્સાહિત કરવાનો છે.

પત્રકારોના શ્રમનું યોગ્ય વળતર નક્કી કરવું જરૂરી

ઓસ્ટ્રેલિયાના વડાપ્રધાન એન્થની અલ્બાનીઝે જણાવ્યું છે કે પત્રકારોના કામનું આર્થિક મૂલ્ય નક્કી કરવું અત્યંત જરૂરી છે. તેમણે કહ્યું કે મોટી બહુરાષ્ટ્રીય કંપનીઓએ પત્રકારો દ્વારા તૈયાર કરવામાં આવેલી સામગ્રીનો ઉપયોગ કરીને નફો કમાવવો જોઈએ નહીં અને તેમને યોગ્ય ચૂકવણી આપવી જોઈએ. તેમણે વધુમાં જણાવ્યું કે પત્રકારિતામાં રોકાણ કરવું એક સ્વસ્થ લોકશાહી માટે ખૂબ જ મહત્વપૂર્ણ છે.

ટેક્સથી કેવી રીતે થશે પત્રકારોને (Journalists)  ચુકવણી?

પ્રસાતાવ મુજબ, જે ડિજિટલ કંપનીઓ સમાચાર સંગઠનો સાથે કરાર નહીં કરે, તેમની ઓસ્ટ્રેલિયામાં થતી આવક પર 2.25 ટકા કર વસૂલવામાં આવશે. જો કંપનીઓ પત્રકારિતાના કામ માટે ચૂકવણી કરવા સંમત થાય, તો તેમને આ કરમાંથી છૂટ આપવામાં આવશે.
સરકારનું અનુમાન છે કે આ યોજના હેઠળ દર વર્ષે લગભગ 200 થી 250 મિલિયન ઓસ્ટ્રેલિયન ડોલર એકત્ર થઈ શકે છે. આ રકમને સમાચાર સંગઠનો દ્વારા કાર્યરત પત્રકારોની સંખ્યાના આધારે વહેંચવામાં આવશે.

અગાઉ પણ થઈ ચૂક્યો છે પ્રયાસ

આ ઓસ્ટ્રેલિયાનો બીજો મોટો પ્રયાસ છે. અગાઉ, 2021 માં લાગુ કરાયેલ ન્યૂઝ મીડિયા બાર્ગેનિંગ કોડમાં પણ ડિજિટલ કંપનીઓને સમાચાર સંસ્થાઓને ચૂકવણી કરવા દબાણ કરવાનો પ્રયાસ કરવામાં આવ્યો હતો.

આ કંપનીઓએ કર્યો વિરોધ

મેટાએ આને “જબરદસ્તી સંપત્તિ હસ્તાંતરણ” જેવું ગણાવ્યું છે અને કહ્યું છે કે સમાચાર સંસ્થાઓ સ્વેચ્છાએ પ્લેટફોર્મનો ઉપયોગ કરે છે. ગુગલે કહ્યું છે કે તે પહેલાથી જ ઘણા કરારો કરી ચૂક્યું છે અને આ નીતિ બદલાતી ડિજિટલ જાહેરાત બજારને અવગણે છે. ટિકટોક તરફથી હાલ સુધી કોઈ સત્તાવાર પ્રતિસાદ આવ્યો નથી.

આ પણ વાંચો: બાલેન શાહ પર સંકટ, મંત્રીઓના રાજીનામા બાદ સંસદ સત્ર સસ્પેન્ડ, શું નેપાળમાં ફરી પલટાશે સત્તા?