લેફ્ટનન્ટ જનરલ અમરદીપ સિંહ ઔજલાએ કાશ્મીરના ચિનાર કોર્પ્સની કમાન સંભાળી લીધી છે, જે ભારતીય સેના માટે વ્યૂહાત્મક મહત્વ ધરાવે છે. ખાસ વાત એ છે કે ઔજલાએ પોતાની 35 વર્ષની કારકિર્દીમાં લાંબો સમય કાશ્મીર ઘાટીમાં વિતાવ્યો છે. ચિનાર કોર્પ્સના નવા કમાન્ડરને આતંકવાદ વિરોધી નિષ્ણાત તેમજ ઈન્ફોર્મેશન ટેક્નોલોજી (આઈટી)માં અત્યંત કુશળ માનવામાં આવે છે.
શ્રીનગર સ્થિત આર્મીના ચિનાર કોર્પ્સ (15 મી કોર્પ્સ) ના નવા કમાન્ડર, લેફ્ટનન્ટ જનરલ ઔજલાએ કુપવાડા ખાતે વજ્ર વિભાગના GOC તરીકે સેવા આપી છે. અગાઉ, ચિનાર કોર્પ્સમાં જ તેઓ BGS એટલે કે બ્રિગેડિયર જનરલ સ્ટાફ અને LoCના ફરકિયા-બ્રિગેડના કમાન્ડર પણ રહી ચૂક્યા છે. તેમણે ઉધમપુર (જમ્મુ અને કાશ્મીર) સ્થિત નોર્ધન કમાન્ડમાં MGS એટલે કે મેજર-જનરલ જનરલ સ્ટાફ તરીકે પણ સેવા આપી છે.
નોંધનીય છે કે, 1987માં ભારતીય સેનાની રાજપૂતાના રાઈફલ્સમાં આર્મી ઓફિસર તરીકે જોડાયેલા લેફ્ટનન્ટ જનરલ ઔજલાએ પાકિસ્તાન સાથેની સરહદ પર બટાલિયનની કમાન પણ સંભાળી છે. ચિનાર કોર્પ્સની કમાન સંભાળતા પહેલા, તેઓ રાજધાની દિલ્હીમાં આર્મી હેડક્વાર્ટરમાં ડીજી-આઈટી એટલે કે ઇન્ફોર્મેશન ટેક્નોલોજી વિંગના ડાયરેક્ટર જનરલ તરીકે પોસ્ટેડ હતા.
ચિનાર કોર્પ્સની કમાન સંભાળ્યા પછી, લેફ્ટનન્ટ. જનરલ ઔજલાએ ખાતરી આપી હતી કે કાશ્મીર ઘાટીમાં છેલ્લા કેટલાક સમયથી જે પરિસ્થિતિ બદલાઈ છે તેને વધુ સારી બનાવવા માટે કામ કરશે. ઉલ્લેખનીય છે કે, સોમવારે જ ચિનાર કોર્પ્સે માહિતી આપી હતી કે છેલ્લા એક વર્ષમાં કાશ્મીર ઘાટીમાં આતંકવાદીઓની સંખ્યામાં મોટો ઘટાડો થયો છે. હવે ઘાટીમાં માત્ર 150 આતંકવાદીઓ બચ્યા છે, જ્યારે છેલ્લા ઘણા સમયથી આ સંખ્યા 200-250ની આસપાસ હતી.
જે દિવસે લે.જનરલ ઔજલાએ ચિનાર કોર્પ્સની કમાન સંભાળી તે દિવસે આતંકવાદીઓએ શોપિયાં જિલ્લામાં સુરક્ષા દળોથી પોતાનો જીવ બચાવવા માટે સ્થાનિક નાગરિકોને પણ છોડ્યા ન હતા. આતંકવાદીઓના અંધાધૂંધ ગોળીબારમાં એક સ્થાનિક નાગરિકનું મોત થયું હતું અને એક સૈનિક સહિત બે લોકો ગંભીર રીતે ઘાયલ થયા હતા.
