ભારતીય હવામાન વિભાગ (IMD) એ મહારાષ્ટ્રના કોલ્હાપુર, પાલઘર, નાસિક, પુણે અને રત્નાગીરી જિલ્લાઓ માટે 14 જુલાઈ સુધી ભારે વરસાદ માટે રેડ એલર્ટ જાહેર કર્યું છે. રાજ્યની રાજધાની મુંબઈ માટે આગામી 3 દિવસ માટે ઓરેન્જ એલર્ટ જારી કરવામાં આવ્યું છે. મહારાષ્ટ્રમાં છેલ્લા બે દિવસમાં અવિરત વરસાદ અને સંબંધિત ઘટનાઓને કારણે નવ લોકોના મોત થયા છે.
રાજ્યના ગઢચિરોલીમાં ભારે વરસાદ બાદ ઓછામાં ઓછા પાંચ લોકોના મોત થયા હતા અને અન્ય બે લોકો ગુમ થયા હતા. બીજી તરફ, અવિરત વરસાદને કારણે નાશિક જિલ્લામાં ઘણી નદીઓના જળસ્તરમાં વધારો થયો છે, જ્યારે મુંબઈ અને તેની આસપાસના વિસ્તારોમાં સોમવારે હળવો વરસાદ થયો હતો. અધિકારીઓએ જણાવ્યું હતું કે ગઢચિરોલીમાં કેટલાક લોકો એક ટ્રકમાં ગામવાસીના અંતિમ સંસ્કારમાં ભાગ લઈ રહ્યા હતા જ્યારે તેમનું વાહન વરસાદમાં વહી ગયું હતું. ત્રણ મૃતદેહ મળી આવ્યા હતા જ્યારે બે લાપતા હોવાનું કહેવાય છે. અલગ-અલગ બનાવમાં વધુ બેના મોત નિપજ્યા હતા.
ઘણા ભાગોમાં ભારેથી અતિભારે વરસાદની સંભાવના છે
સ્કાયમેટ વેધર અનુસાર, મુંબઈ, જલગાંવ, ધુલે, નંદુરબાર, અહમદનગર, નાસિક, પુણે અને મહારાષ્ટ્રના દરિયાકાંઠાના ભાગોમાં પણ આજે 12 જુલાઈએ વરસાદ પડી શકે છે. મહારાષ્ટ્રની વાત કરીએ તો રાજ્યની ઘણી નદીઓ ચેતવણીના સ્તરે પહોંચી ગઈ છે કારણ કે રાજ્યમાં ભારે વરસાદ થઈ રહ્યો છે. IMD એ મુંબઈ, તેના ઉપનગરો અને થાણે માટે નારંગી ચેતવણી જારી કરી છે, જેમાં કહ્યું છે કે 14 જુલાઈ સુધી અમુક સ્થળોએ “ભારેથી અતિ ભારે વરસાદ” થવાની સંભાવના છે. મહારાષ્ટ્રના અન્ય જિલ્લાઓમાં 14 જુલાઈ સુધી રેડ એલર્ટ જારી કરવામાં આવ્યું છે.
આ પણ વાંચો:ભારે વરસાદ વચ્ચે ઘણી ટ્રેનો અને બસો રદ્દ કરાઈ, અહીં જુઓ સંપૂર્ણ યાદી
