હિમાચલ પ્રદેશ અને ગુજરાત વિધાનસભા ચૂંટણીના પરિણામો ગુરુવારે (8 ડિસેમ્બર) જાહેર કરવામાં આવશે. હાલ બંને રાજ્યોમાં ભાજપની સરકાર છે. સવારે 8 વાગ્યાથી મતગણતરી શરૂ થશે. હિમાચલ પ્રદેશમાં 12 નવેમ્બરે મતદાન થયું હતું. જ્યારે ગુજરાતમાં 1 અને 5 ડિસેમ્બરના રોજ બે તબક્કામાં મતદાન થયું હતું. મુખ્ય ચૂંટણી અધિકારી પી. ભારતીએ જણાવ્યું હતું કે ગુજરાતમાં 37 કેન્દ્રો પર ગુરુવારે સવારે 8 વાગ્યાથી મતગણતરી શરૂ થશે.ગુજરાતમાં મતગણતરી કેન્દ્રોની આસપાસ ચુસ્ત સુરક્ષા વ્યવસ્થા ગોઠવવામાં આવી છે. 182 સભ્યોની રાજ્ય વિધાનસભા માટે બહુમતીનો આંકડો 92 છે. આ વખતે ગુજરાતમાં 64.33 ટકા મતદાન થયું છે.
ગુજરાતમાં 27 વર્ષથી ભાજપની સરકાર છે
રાજ્યમાં છેલ્લા 27 વર્ષથી ભાજપની સરકાર છે. ગુજરાતમાં ભાજપનું અગાઉનું શ્રેષ્ઠ પ્રદર્શન 2002માં હતું, જ્યારે તેણે 182 સભ્યોની વિધાનસભામાં 127 બેઠકો જીતી હતી. ગુજરાતમાં પરંપરાગત રીતે ભાજપ અને કોંગ્રેસ વચ્ચે સ્પર્ધા રહી છે, પરંતુ આ વખતે AAP મેદાનમાં ઉતરતા ત્રિકોણીય બની છે. જો કે, એક્ઝિટ પોલના અનુમાનમાં કહેવામાં આવ્યું છે કે ભાજપને મોટી જીત મળશે.
એક્ઝિટ પોલમાં ભાજપની જીતની આગાહી કરવામાં આવી છે
એબીપી ન્યૂઝ સી-વોટરના એક્ઝિટ પોલ મુજબ ગુજરાતમાં ભાજપને 128-140 બેઠકો, કોંગ્રેસને 31-43 બેઠકો, AAPને 3-11 બેઠકો અને અન્યને 2-6 બેઠકો મળવાની આગાહી કરવામાં આવી છે. ગુરુવારે મુખ્યમંત્રી ભૂપેન્દ્ર પટેલ, AAPના મુખ્યમંત્રી પદના ઉમેદવાર ઇસુદાન ગઢવી, હાર્દિક પટેલ સહિત કુલ 1,621 ઉમેદવારોના ભાવિનો ફેંસલો થશે.
હિમાચલ પ્રદેશ વિધાનસભા ચૂંટણી માટે, મત ગણતરી 10,000 સુરક્ષા કર્મચારીઓ, ચૂંટણી અધિકારીઓ અને અન્ય સહાયક કર્મચારીઓની દેખરેખ હેઠળ કરવામાં આવશે. મુખ્ય ચૂંટણી અધિકારી (CEO) મનીષ ગર્ગે બુધવારે જણાવ્યું હતું કે રાજ્યભરમાં 59 સ્થળોએ સ્થાપિત 68 કેન્દ્રો પર સવારે 8 વાગ્યે મત ગણતરી શરૂ થશે. સવારે 8 વાગ્યે પોસ્ટલ બેલેટથી મત ગણતરી શરૂ થશે અને ત્યારબાદ સવારે 8.30 વાગ્યે ઈવીએમથી મતગણતરી કરવામાં આવશે. આ ચૂંટણીમાં કુલ 412 ઉમેદવારો મેદાનમાં છે.
હિમાચલની 68 સભ્યોની વિધાનસભા માટે 12 નવેમ્બરે યોજાયેલી ચૂંટણીમાં લગભગ 76.44 ટકા મતદારોએ મતદાન કર્યું હતું. 6 ડિસેમ્બર સુધીમાં, રાજ્યભરના ચૂંટણી અધિકારીઓ દ્વારા ઓછામાં ઓછા 52,859 (આશરે 87 ટકા) પોસ્ટલ બેલેટ પ્રાપ્ત થયા છે, જે 2017 કરતા 17 ટકા વધારે છે. 2017 માં, કુલ 45,126 પોસ્ટલ બેલેટ પ્રાપ્ત થયા હતા.
હિમાચલ પ્રદેશમાં 1985 થી, કોઈપણ પક્ષ સતત બે વિધાનસભા ચૂંટણી જીતી શક્યો નથી. જો આ પહાડી રાજ્યમાં ભારતીય જનતા પાર્ટી સત્તામાં રહેશે તો તે એક રેકોર્ડ હશે. હિમાચલ પ્રદેશના એક્ઝિટ પોલમાં પણ ભાજપની જીતની આગાહી કરવામાં આવી છે. એબીપી ન્યૂઝ સી-વોટરના એક્ઝિટ પોલ મુજબ, હિમાચલ પ્રદેશની ચૂંટણીમાં ભાજપને 33-41 બેઠકો, કોંગ્રેસને 24-32 બેઠકો, AAPને શૂન્ય અને અન્યને 0-4 બેઠકો મળવાની ધારણા છે.
