Gandhinagar News: ગુજરાત હાઇકોર્ટના નિવૃત્ત ન્યાયાધીશ બિરેન વૈષ્ણવ (Biren Vaishnav) ગુજરાતના લોકાયુક્ત (Lokayukt) બન્યા છે. તેઓ ગુજરાત હાઇકોર્ટના પૂર્વ જજ (Judge) છ અને કાર્યકારી ન્યાયાધીશ તરીકે સેવા પણ આપી ચૂક્યા છે. તેમની નિમણૂકને ભ્રષ્ટાચાર વિરોધી કામગીરીની દિશામાં અત્યંત મહત્વનું પગલું માનવામાં આવે છે. તેઓ સામાન્યજન સાથે સંવાદ માટે જાણીતા છે.
રાજ્યપાલે શપથ લેવડાવ્યા
રાજ્યપાલ આચાર્ય દેવવ્રતે બિરેન વૈષ્ણવને પદ અને ગુપ્તતાના શપથ લેવડાવ્યા. મુખ્યમંત્રી ભૂપેન્દ્ર પટેલ, વિધાનસભા અધ્યક્ષ શંકર ચૌધરી અને નાયબ મુખ્યમંત્રી હર્ષ સંઘવી ખાસ મહેમાનો તરીકે હાજર રહ્યા હતા. રાજ્ય મંત્રીમંડળના સભ્યો, વરિષ્ઠ સચિવો અને ન્યાયતંત્રના મહાનુભાવો પણ હાજર રહ્યા હતા અને નવનિયુક્ત લોકાયુક્તને અભિનંદન આપ્યા હતા.
આ નિમણૂક શા માટે મહત્વપૂર્ણ છે?
ભ્રષ્ટાચારમુક્ત શાસન અને વહીવટી પારદર્શિતા માટે લોકાયુક્ત સંસ્થા લોકશાહીનો મજબૂત સ્તંભ છે. ન્યાયતંત્રમાં ન્યાયાધીશ બિરેન વૈષ્ણવનો બહોળો અનુભવ જટિલ વહીવટી ફરિયાદોના નિરાકરણ અને જવાબદારી સુનિશ્ચિત કરવામાં ખૂબ મદદ કરશે. આ સંસ્થા સામાન્ય નાગરિકોની ફરિયાદોના ન્યાયિક અને ઝડપી નિવારણ સુનિશ્ચિત કરવામાં મહત્વપૂર્ણ ભૂમિકા ભજવશે.
આ અગાઉ તેઓ ગુજરાત રાજ્ય કાનૂની સેવા સત્તામંડળના કાર્યકારી અધ્યક્ષ હતા ત્યારે તેમણે લીધેલા ઘણા બધા પગલાં આજે પણ લોકોને યાદ છે. તેમણે તેના અન્વયે કાનૂની જાગૃતિ શિબિરની મુલાકાત લીધી. આ શિબિર ગુજરાત રાજ્ય કાનૂની સેવા સત્તામંડળ, જિલ્લા કાનૂની સેવા સત્તામંડળ, અમદાવાદ (ગ્રામીણ), અમદાવાદ શહેર નાગરિક કાનૂની સેવા સમિતિ અને ગાંધીનગર જિલ્લા કાનૂની સેવા સત્તામંડળ દ્વારા સંયુક્ત રીતે યોજવામાં આવી હતી. આ શિબિરનું આયોજન રાષ્ટ્રીય કાનૂની સેવા સત્તામંડળ દ્વારા અસંગઠિત કામદારોના કલ્યાણ માટે શરૂ કરાયેલી યોજનાના સંદર્ભમાં કરવામાં આવ્યું હતું.
કામદારોને કલ્યાણ યોજનાનો લાભ મળે તે સુનિશ્ચિત કર્યુ
આ પ્રસંગે, ન્યાયાધીશ બિરેન વૈષ્ણવે અસંગઠિત કામદારો અને તેમના પરિવારો સાથે વાતચીત કરી. તેમણે કાનૂની સેવા સત્તામંડળના પેરાલીગલ સ્વયંસેવકોને આ કલ્યાણ યોજનાનો લાભ કામદારોને મળે તે સુનિશ્ચિત કરવા નિર્દેશ આપ્યો. ગુજરાત મકાન અને અન્ય બાંધકામ કામદારો કલ્યાણ બોર્ડના અધિકારીઓ પણ હાજર હતા. તેમણે ગુજરાત રાજ્યમાં બાંધકામ કામદારો માટે હાલમાં અમલમાં રહેલી યોજના અને તેના અમલીકરણ વિશે માહિતી પૂરી પાડી.
ન્યાયાધીશ બિરેન વૈષ્ણવે કામદારોના બાળકો સાથે થોડી આરામની ક્ષણો વીતાવી. આ પ્રસંગે અન્ય ન્યાયાધીશો પણ હાજર રહ્યા. હાઇકોર્ટના ન્યાયાધીશે કામદારોના બાળકો સાથે વાતચીત કરી અને કામદારોના ખોરાકની ગુણવત્તાનું પણ નિરીક્ષણ કર્યું. તેમણે કામદારોની કાર્યકારી પરિસ્થિતિઓનું પણ મૂલ્યાંકન કર્યું અને તેમના બાળકોના શિક્ષણ વિશે પૂછપરછ કરી.
