Karnataka News : કર્ણાટકની રાજનીતિમાં ફરી એકવાર સત્તા પરિવર્તનની ચર્ચાઓ ગરમાઈ ગઈ છે. રાજ્યના મુખ્યમંત્રી (CM) Siddaramaiahને લઈને એવા અહેવાલો સામે આવી રહ્યા છે કે કોંગ્રેસ હાઈકમાન્ડે તેમને પદ છોડવાનો સંકેત આપ્યો છે. બદલામાં તેમને દિલ્હીમાં મહત્વપૂર્ણ જવાબદારી અને રાજ્યસભાની બેઠક આપવાનો પ્રસ્તાવ આપવામાં આવ્યો હોવાનું કહેવાઈ રહ્યું છે.
તાજેતરમાં કોંગ્રેસે કર્ણાટકના વરિષ્ઠ નેતાઓને દિલ્હીમાં બેઠક માટે બોલાવ્યા હતા. આ બેઠકમાં મુખ્યમંત્રી (CM) Siddaramaiah અને નાયબ મુખ્યમંત્રી D. K. Shivakumar પણ હાજર રહ્યા હતા. મંગળવારે સિદ્ધારમૈયાએ કોંગ્રેસ મુખ્યાલય ઈન્દિરા ભવન ખાતે પાર્ટીના સંગઠન મહાસચિવ અને રાજ્ય પ્રભારી Randeep Surjewala સાથે મહત્વપૂર્ણ બેઠક કરી હતી.
રાજ્યસભાની ચૂંટણી વચ્ચે રાજકીય ગરમાવો
કર્ણાટકમાં રાજ્યસભાની ચાર બેઠકો માટે ટૂંક સમયમાં ચૂંટણી યોજાવાની છે. માનવામાં આવે છે કે કોંગ્રેસ આમાંથી ત્રણ બેઠકો જીતવામાં સફળ રહેશે. રાજકીય વર્તુળોમાં એવી ચર્ચા છે કે સિદ્ધારમૈયાને રાજ્યસભામાં મોકલીને દિલ્હી રાજકારણમાં મોટી ભૂમિકા સોંપવામાં આવી શકે છે.
જોકે કોંગ્રેસ નેતૃત્વે અત્યાર સુધી સત્તાવાર રીતે મુખ્યમંત્રી બદલાવની અટકળોને નકારી છે, પરંતુ રાજ્યમાં મંત્રીમંડળમાં ફેરફાર અને નેતૃત્વ પરિવર્તનની ચર્ચાઓ સતત તેજ બની રહી છે.
ડીકે શિવકુમાર સૌથી મોટા દાવેદાર?
જો સિદ્ધારમૈયા પદ છોડે તો નવા મુખ્યમંત્રી (CM) તરીકે D. K. Shivakumarનું નામ સૌથી આગળ માનવામાં આવી રહ્યું છે. ઉપરાંત G. Parameshwaraનું નામ પણ ચર્ચામાં છે.
૨૦૨૩ની વિધાનસભા ચૂંટણી બાદ કોંગ્રેસમાં અઢી-અઢી વર્ષના ફોર્મ્યુલા અંગે ચર્ચાઓ થઈ હતી. શિવકુમાર સમર્થકોનો દાવો છે કે તે સમજૂતી મુજબ હવે તેમને મુખ્યમંત્રી બનાવવાનો સમય આવી ગયો છે. જોકે સિદ્ધારમૈયા સતત કહેતા આવ્યા છે કે તેઓ પાંચ વર્ષનો કાર્યકાળ પૂર્ણ કરશે.
ત્રણ વર્ષ પૂર્ણ થતા ચર્ચાઓ તેજ
કર્ણાટકમાં કોંગ્રેસ સરકારે 20 મેના રોજ ત્રણ વર્ષ પૂર્ણ કર્યા છે. આ વચ્ચે નેતૃત્વ પરિવર્તન અને મંત્રીમંડળમાં ફેરફાર અંગે લાંબા સમયથી અટકળો ચાલી રહી છે. દિલ્હીમાં થયેલી બેઠકો બાદ હવે રાજકીય પરિસ્થિતિ વધુ રસપ્રદ બની ગઈ છે.
