શેરબજારની શરૂઆત આજે એક્સપ્રેસ ગતિ સાથે થઈ છે. કુલ ટ્રેડેડ શેરોમાંથી લગભગ 2100 શેરમાં વધારો જોવા મળી રહ્યો છે અને માત્ર 200 શેરો જ ઘટી રહ્યા છે. આજે શેરબજારની શરૂઆત થતા જ BSE સેન્સેક્સ 250 પોઈન્ટ અથવા 0.35 ટકાના ઉછાળા સાથે 71,907 ના સ્તર પર ખુલ્યો હતો. NSE નો નિફ્ટી 69.30 પોઈન્ટ અથવા 0.32 ટકાના વધારા સાથે 21,688 ના સ્તર પર ખુલવામાં સફળ રહ્યો છે. આજે ટ્રેડિંગ શરૂ થતાની સાથે જ નિફ્ટીએ ફરીથી 21700 ના સ્તરને પાર કરી લીધું છે અને તેમાં જોરદાર અપટ્રેન્ડ જોવા મળી રહ્યો છે.
સેન્સેક્સના 30 શેરોમાંથી 24માં વધારો જોવા મળી રહ્યો છે અને માત્ર 6માં ઘટાડો જોવા મળી રહ્યો છે. સેન્સેક્સના સૌથી વધુ વધતા શેરોમાં એક્સિસ બેન્ક 1.50 ટકાના વધારા સાથે ટોપ ગેનર છે. બજાજ ફિનસર્વ 1.20 ટકા અને રિલાયન્સ ઇન્ડસ્ટ્રીઝ 0.97 ટકાના વધારા સાથે ટોપ ગેઇનર્સમાં છે. આવતા અઠવાડિયે વીમા કંપનીઓને થર્ડ પાર્ટી એડમિનિસ્ટ્રેશન સેવાઓ પૂરી પાડતી મેડી આસિસ્ટ હેલ્થકેર સર્વિસીસ કંપનીનો IPO આવી રહ્યો છે. Jyoti CNG IPO બાદ વર્ષ 2024નો આ બીજો મોટો IPO છે. 15 જાન્યુઆરીએ મેડી આસિસ્ટ હેલ્થકેર સર્વિસિસનો IPO ખુલવા જઈ રહ્યો છે અને રોકાણકારો 17 જાન્યુઆરી, 2024 સુધી IPO માટે અરજી કરી શકશે.
મેડી આસિસ્ટ હેલ્થકેર સર્વિસિસના IPOમાં તમામ શેર્સ ઓફર ફોર સેલ દ્વારા વેચવામાં આવી રહ્યા છે. કંપનીના પ્રમોટરો અને રોકાણકારો IPOમાં 2.8 કરોડ શેરનું વેચાણ કરી રહ્યા છે. IPOમાં, ઑફર ફોર સેલ દ્વારા નાણાં એકત્ર કરવામાં આવે છે, તેથી કંપનીને IPOમાંથી આવતા નાણાંમાંથી કંઈપણ મળવાનું નથી. IPOમાં 50 ટકા હિસ્સો સંસ્થાકીય રોકાણકારો માટે, 35 ટકા રિટેલ રોકાણકારો માટે અને 15 ટકા બિન-સંસ્થાકીય રોકાણકારો માટે અનામત રાખવામાં આવ્યો છે.