કોંગ્રેસે મોંઘવારી અને રોજબરોજની વસ્તુઓની વધતી કિંમતો સામે દેશભરમાં વિરોધ પ્રદર્શન કરવાનું નક્કી કર્યું છે. કોંગ્રેસનો આ વિરોધ રાહુલ ગાંધીની પ્રેસ કોન્ફરન્સથી શરૂ થયો હતો. રાહુલ ગાંધીએ કહ્યું કે, આજે દેશમાં લોકશાહી નથી. માત્ર સરમુખત્યારશાહી છે. અમે મોંઘવારીનો મુદ્દો ઉઠાવીએ છીએ. અમને સંસદમાં બોલવા દેવામાં આવતા નથી. બહાર વિરોધ કરવા બદલ ધરપકડ કરવામાં આવી હતી.
રાહુલ ગાંધીએ કહ્યું, દેશ 70 વર્ષમાં બન્યો, પરંતુ ભાજપે 8 વર્ષમાં ખતમ કરી નાખ્યો. બેરોજગારી, હિંસા અને મોંઘવારીનો મુદ્દો હોય, સરકારનો એક જ એજન્ડા છે કે આ મુદ્દાઓ ઉઠાવવામાં ન આવે.આજે ભારતમાં સૌથી વધુ બેરોજગારી છે. પેટ્રોલ, ડીઝલ અને ગેસના ભાવ વધી રહ્યા છે. પરંતુ નાણામંત્રી દેખાતા નથી. કોઈપણ ગામ, શહેરમાં જાઓ, લોકો કહેશે કે ત્યાં મોંઘવારી છે. પરંતુ સરકારને તે દેખાતું નથી.
કેન્દ્ર વિરુદ્ધ કોંગ્રેસનો આ હંગામો એવા સમયે થઈ રહ્યો છે જ્યારે એન્ફોર્સમેન્ટ ડિરેક્ટોરેટે નેશનલ હેરાલ્ડ કેસમાં કાર્યવાહી તેજ કરી છે. રાજસ્થાનના મુખ્યમંત્રી અશોક ગેહલોતે પણ નેશનલ હેરાલ્ડ કેસમાં EDની કાર્યવાહીનો મુદ્દો ઉઠાવ્યો હતો. તેમણે કહ્યું, સોનિયા ગાંધી અને મલ્લિકાર્જુન ખડગેને એવા સમયે સવાલ કરવામાં આવી રહ્યા છે જ્યારે સંસદની કાર્યવાહી ચાલી રહી છે.
