Vadodara News: વડોદરા સહિત રાજ્યની વિવિધ સરકારી મેડિકલ કોલેજોમાં પ્રોફેસર તરીકે સેવા આપી ચૂકેલા એક ડૉક્ટરના અવસાન બાદ તેમની કરોડોની સંપત્તિને લઈને કાનૂની વિવાદ (Vadodara Doctor Property Case) ઊભો થયો છે. ડૉક્ટરની પત્ની અને પુત્રીએ મિલકત પર પોતાનો હક દર્શાવ્યો છે, જ્યારે તેમના ઘરે કામ કરતી મહિલાએ રજિસ્ટર્ડ વસિયતનામાના આધારે સંપત્તિ પર દાવો કર્યો છે. વર્ષ 2019માં ટ્રાયલ કોર્ટે પત્ની અને પુત્રીનો દાવો ફગાવી દીધો હતો. જોકે, સેશન્સ કોર્ટે અપીલ મંજૂર કરીને કેસ ફરીથી સુનાવણી માટે ટ્રાયલ કોર્ટમાં મોકલ્યો છે.

Vadodara Doctor Property Case: લગ્નજીવનમાં અણબનાવ બાદ શરૂ થયો વિવાદ

મળતી વિગતો મુજબ, ડૉક્ટરનાં લગ્ન વર્ષ 1982માં થયાં હતાં અને તેમને એક પુત્રી છે. પતિ-પત્ની વચ્ચે અણબનાવ થતાં ડૉક્ટરે છૂટાછેડા માટે કોર્ટમાં અરજી કરી હતી. બીજી તરફ, પત્નીએ ભરણપોષણની માગણી કરતાં અદાલતે અગાઉ તેમને દર મહિને રૂ. 4,000 ચૂકવવાનો આદેશ આપ્યો હતો.

વર્ષ 2010માં ડૉક્ટરનું અવસાન થયા બાદ તેમની મિલકતો અને નાણાકીય લાભો કોને મળવા જોઈએ તે મુદ્દે વિવાદ શરૂ થયો હતો.

પત્ની અને પુત્રીએ મિલકતમાં હક માગ્યો

ડૉક્ટરની પત્ની અને પુત્રીએ કોર્ટ (Vadodara Court News)માં દાવો કર્યો હતો કે તેઓ તેમના કાયદેસરના વારસદાર હોવાથી ગ્રેચ્યુઇટી, પ્રોવિડન્ટ ફંડ (PF), પેન્શન અને LICની પોલિસી સહિતના નાણાકીય લાભો મેળવવા હકદાર છે.

આ ઉપરાંત, વડોદરાના પ્રતાપનગર, નિઝામપુરા અને માંજલપુર વિસ્તારોમાં આવેલી ત્રણ સ્થાવર મિલકતો પર પણ તેમણે પોતાનો હક દર્શાવ્યો હતો. પત્નીના જણાવ્યા અનુસાર, ડૉક્ટરની આવકમાંથી બચત અને રોકાણ કરવામાં આવ્યાં હતાં. જોકે, અલગ રહેવાને કારણે તેમને બેંક ખાતાં અને રોકાણોની સંપૂર્ણ વિગતોની જાણ નહોતી.

કામવાળી મહિલાએ રજિસ્ટર્ડ વસિયતનામાનો આધાર લીધો

આ કેસમાં ડૉક્ટરના ઘરે કામ કરતી મહિલાએ પણ સંપત્તિ પર પોતાનો હક દર્શાવ્યો હતો. મહિલાના દાવા મુજબ, તે ડૉક્ટરની બીમારી અને વૃદ્ધાવસ્થા દરમિયાન તેમની સંભાળ રાખતી હતી. ડૉક્ટર તેની સેવાથી પ્રભાવિત થયા હોવાથી તેમણે પોતાની હયાતીમાં સબ-રજિસ્ટ્રાર સમક્ષ સાક્ષીઓની હાજરીમાં રજિસ્ટર્ડ વસિયતનામું કર્યું હતું.

મહિલાનો દાવો છે કે વસિયતનામા દ્વારા ડૉક્ટરે પોતાની મિલકતો અને અન્ય હકો તેના નામે કર્યા હતા. આ દાવાના સમર્થનમાં કોર્ટમાં વીડિયો અને DVD સહિતના પુરાવા રજૂ કરવામાં આવ્યા હોવાનું જણાવાયું છે. LIC અને બિરલા સન લાઇફની વીમા પોલિસીમાં પોતાનું નામ નોમિની તરીકે નોંધાયેલું હોવાનો પણ મહિલાનો દાવો (LIC Nominee Dispute) છે.

ટ્રાયલ કોર્ટે દાવો ફગાવ્યો હતો

કેસની અગાઉની સુનાવણી દરમિયાન પત્નીએ સોગંદનામું રજૂ કર્યું હતું, પરંતુ ઉલટતપાસ માટે કોર્ટમાં હાજર ન રહેતાં તેમનો પુરાવો રજૂ કરવાનો હક બંધ કરવામાં આવ્યો હતો. પરિણામે, સંબંધિત દસ્તાવેજો પુરવાર થઈ શક્યા નહોતા.

ટ્રાયલ કોર્ટે નોંધ્યું હતું કે પત્ની અને પુત્રી પોતાના દાવાને સમર્થન આપવા પૂરતા પુરાવા રજૂ કરી શક્યાં નથી. આ આધારે વર્ષ 2019માં તેમનો દાવો રદ કરવામાં આવ્યો હતો.

સેશન્સ કોર્ટે કેસ ફરીથી સાંભળવાનો આદેશ આપ્યો

ટ્રાયલ કોર્ટના નિર્ણય સામે પત્ની અને પુત્રીએ સેશન્સ કોર્ટમાં અપીલ કરી હતી. સેશન્સ કોર્ટે અપીલ મંજૂર કરીને કેસ ફરીથી ટ્રાયલ કોર્ટમાં મોકલવાનો આદેશ આપ્યો છે. હવે સમગ્ર મામલે ફરીથી સુનાવણી કરવામાં આવશે.

સરકારી વિભાગો અને વીમા કંપનીઓ પણ પક્ષકાર

આ કેસમાં રાજ્ય સરકાર, મેડિકલ કોલેજના ડીન, સિટી સર્વે સુપરિન્ટેન્ડન્ટ, PF કમિશનર, LIC, બિરલા સન લાઇફ ઇન્સ્યોરન્સ અને ડૉક્ટરના ઘરે કામ કરતી મહિલાને પક્ષકાર બનાવવામાં આવ્યા છે.

સરકારી વિભાગો અને વીમા કંપનીઓએ અગાઉ જણાવ્યું હતું કે સંબંધિત રેકોર્ડ, નોમિનેશન અને કાયદેસરના દસ્તાવેજોને આધારે તેઓ અદાલતના અંતિમ આદેશનું પાલન કરવા તૈયાર છે. હવે સંપત્તિ અને નાણાકીય લાભો અંગેનો અંતિમ નિર્ણય કોર્ટની આગળની કાર્યવાહી પર નિર્ભર રહેશે.

આ પણ વાંચો: સૂરતમાં સંપત્તિના વિવાદે લીધો ભયાનક વળાંક, માતા-નાના ભાઈની હત્યા

આ પણ વાંચો: ચેક બાઉન્સ કેસમાં રાજપાલ યાદવને સુપ્રીમ કોર્ટની મોટી રાહત, સંપત્તિ વેચીને ચૂકવશે દેવું

આ પણ વાંચો: અમિતાભ બચ્ચનની સંપત્તિ ₹4,000 કરોડ, 145%નો વધારો