Valsad News: વલસાડ જિલ્લાના વાપી અને સંઘપ્રદેશ દાદરામાં પોલીસે માદક પદાર્થો સામેની કાર્યવાહીમાં ત્રણ અલગ-અલગ સ્થળોએ દરોડા (Vapi Cannabis Bust) પાડ્યા હતા. આ કાર્યવાહીમાં ગાંજા સહિત કુલ ₹13.88 કરોડથી વધુની કિંમતનો માદક જથ્થો જપ્ત કરવામાં આવ્યો હોવાનો અહેવાલ છે. પોલીસે ત્રણ આરોપીઓની ધરપકડ કરી છે, જ્યારે અન્ય કેટલાક શખ્સોને વોન્ટેડ જાહેર કરીને વધુ તપાસ હાથ ધરી છે.
Vapi Cannabis Bust: ડુંગરામાંથી ₹1.21 કરોડનો ગાંજો જપ્ત
વાપીના ડુંગરા વિસ્તારમાં આવેલી લેકવ્યુ રેસિડેન્સીના એક ફ્લેટમાં દરોડા દરમિયાન 243.670 કિલોગ્રામ ગાંજો (Vapi Drug Raid) મળી આવ્યો હતો. તેની કિંમત ₹1,21,83,500 હોવાનું જણાવાયું છે. ફ્લેટમાંથી પ્લાસ્ટિકના ડ્રમમાં ભરેલો શંકાસ્પદ પાવડર પણ મળ્યો હતો. FSL પરીક્ષણમાં તેમાં કેનાબિસનાં સક્રિય ઘટકો હોવાની પુષ્ટિ થયાનું જણાવાયું છે.
આ કેસમાં પોલીસે કાર્તિક ઉર્ફે પપ્પુ રવિન્દ્ર બિસ્વાલ (32), મૂળ ઓડિશા,ની ધરપકડ કરી છે. પોલીસના જણાવ્યા અનુસાર, પૂછપરછ દરમિયાન તેના કાકા બનમાલી પ્રભાકર પાત્રાનું નામ સામે આવતાં તેમને વોન્ટેડ જાહેર કરવામાં આવ્યા છે. આ કાર્યવાહી દરમિયાન મોબાઇલ ફોન સહિત કુલ ₹1,21,88,500નો મુદ્દામાલ જપ્ત કરાયો હતો. (Valsad News)
છીરી અને દાદરામાંથી માદક ગોળીઓનો જથ્થો
વાપીના છીરી ગાલામસાલા વિસ્તારમાં આવેલા એક મકાનમાં દરોડા દરમિયાન 387.750 કિલોગ્રામ માદક પદાર્થની ગોળીઓ મળી આવી હતી. તેની કિંમત ₹1,93,87,500 હોવાનું જણાવાયું છે. આ કેસમાં મોહમદ અમીન મોહમદ બાસુ ખાન (46), મૂળ ઝારખંડ,ની ધરપકડ કરવામાં આવી હતી.
પોલીસના જણાવ્યા અનુસાર, પૂછપરછમાં આ જથ્થો દાદરા વિસ્તારમાંથી મેળવ્યો હોવાની માહિતી મળતાં ત્યાંની એક દુકાનમાં તપાસ કરવામાં આવી હતી. દુકાનમાંથી વધુ 2,147.35 કિલોગ્રામ ગોળીઓનો જથ્થો મળી આવ્યો હતો, જેની કિંમત ₹10,73,67,500 હોવાનું જણાવાયું છે. આ કેસમાં પ્રદીપ ઉર્ફે મન્નુ રામતિર્થ વર્મા (28), મૂળ ઉત્તર પ્રદેશ,ની ધરપકડ કરવામાં આવી છે.
અન્ય આરોપીઓની શોધખોળ શરૂ
પોલીસના જણાવ્યા અનુસાર, છીરી અને દાદરામાંથી મળેલો કુલ જથ્થો 2,535.10 કિલોગ્રામ છે, જેની કિંમત ₹12,67,55,000 દર્શાવવામાં આવી છે. આ નેટવર્ક સાથે સંકળાયેલા હોવાના આક્ષેપસર અનુરાગ ગુપ્તા (કાનપુર, ઉત્તર પ્રદેશ) અને સલમાન ઇકબાલ સિદ્દીકી (ઘાટકોપર, મુંબઈ)ને વોન્ટેડ જાહેર કરવામાં આવ્યા છે.
ત્રણેય સ્થળોએ થયેલી કાર્યવાહીમાં કુલ ₹13.88 કરોડથી વધુનો માદક જથ્થો ઝડપાયો (Gujarat Police) હોવાનું જણાવાયું છે. પોલીસ હવે આ પદાર્થ ક્યાંથી લાવવામાં આવ્યો હતો અને તેની હેરાફેરીમાં અન્ય કોણ સંકળાયેલું છે તે દિશામાં તપાસ કરી રહી છે.
આ પણ વાંચો: મહેસાણામાં દારૂના બે સ્થળે દરોડા, રૂ.7.84 લાખનો મુદ્દામાલ જપ્ત, બે ઝડપાયા
આ પણ વાંચો: અમદાવાદના ગોતામાંથી 10 ટન નકલી સોસ ઝડપાયો, ફૂડ વિભાગના દરોડા
આ પણ વાંચો: શેરબજાર કૌભાંડમાં EDના દરોડા, ગુજરાત-મુંબઈમાં 29 સ્થળે તપાસ
