Ahmedabad News: જીવનમાં સકારાત્મકતા, સર્જનાત્મક વિચારસરણી અને આર્થિક સમૃદ્ધિ તરફ આગળ વધવા માટે પ્રેરણા આપતાં જાણીતા એવા લેખક જિજ્ઞેશ પટેલ (Jignesh Patel) નાં ત્રણ પુસ્તકોનું ભવ્ય વિમોચન કરવામાં આવ્યું હતું. “મનની વાત, મંતવ્ય રૂપે – A Conversation of Thoughts, Stories, and Perspectives” થીમ હેઠળ સોમવાર, 26 ઓક્ટોબર, 2026ના રોજ અમદાવાદ મેનેજમેન્ટ એસોસિએશન (AMA) ખાતે આ સમારોહ યોજાયો હતો.

આ કાર્યક્રમનું આયોજન ‘મંતવ્ય ન્યૂઝ 24×7’, ‘આદર્શ પ્રકાશન’ (Estd. 1943), ‘કર્મા ફાઉન્ડેશન’ અને ‘ગુજરાતી બુક ક્લબ’ના સંયુક્ત ઉપક્રમે કરવામાં આવ્યું હતું. સમારોહમાં રાજકીય, સામાજિક અને સાહિત્ય ક્ષેત્રના અનેક ગણમાન્ય મહાનુભાવો ઉપસ્થિત રહ્યા હતા.

ગણમાન્ય મહાનુભાવોની ઉપસ્થિતિમાં પુસ્તકોનું વિમોચન

પુસ્તક વિમોચન સમારોહમાં ગુજરાત વિધાનસભાના અધ્યક્ષ શંકર ચૌધરી, જાણીતા મોટિવેશનલ સ્પીકર સંજય રાવલ અને લોકપ્રિય આર.જે. દેવકી મુખ્ય અતિથિ તરીકે ઉપસ્થિત રહ્યાં હતાં. મહાનુભાવોના હસ્તે ત્રણેય પુસ્તકોનું વિમોચન કરવામાં આવ્યું હતું. આ પ્રસંગે સાહિત્યપ્રેમીઓ અને ઉપસ્થિત શ્રોતાઓએ પુસ્તકોને ઉષ્માભેર આવકાર્યાં હતાં.

ત્રણ પુસ્તકો, જીવનને નવી દિશા આપતા ત્રણ સંદેશ

1. ‘Love You જિંદગી’

આ પુસ્તક જીવનની દરેક પળને આનંદ, ઉત્સાહ અને આશા સાથે જીવવાની પ્રેરણા આપે છે. સકારાત્મક વિચારસરણી વિકસાવવા અને જિંદગી પ્રત્યે પ્રેમની ભાવના મજબૂત કરવા માટે પુસ્તકમાં માર્ગદર્શન આપવામાં આવ્યું છે.

2. ‘Think Outside The Box’

‘જૂની માન્યતાઓને ડિલીટ કરો અને સાચી આઝાદી ઇન્સ્ટોલ કરો’ના વિચાર સાથે રજૂ કરાયેલું આ પુસ્તક વ્યક્તિને પરંપરાગત અને મર્યાદિત વિચારસરણીમાંથી બહાર આવવા પ્રેરે છે. સર્જનાત્મક રીતે વિચારવું, નવી તકો ઓળખવી અને સફળતાની દિશામાં આગળ વધવું એ પુસ્તકનો મુખ્ય સંદેશ છે.

3. ‘The Richest Man in Babylon’

મૂળ લેખક જ્યોર્જ એસ. ક્લાસનના આ પુસ્તકનું ગુજરાતી આલેખન જિજ્ઞેશ પટેલે કર્યું છે. આ પુસ્તકમાં નાણાકીય શિસ્ત, બચત, સંપત્તિનું યોગ્ય આયોજન અને આર્થિક સ્થિરતા મેળવવા માટેના વ્યવહારુ સિદ્ધાંતો રજૂ કરવામાં આવ્યા છે. આર્થિક રીતે સક્ષમ અને આત્મનિર્ભર જીવન જીવવા ઇચ્છતા વાચકો માટે પુસ્તક માર્ગદર્શક બની શકે છે.

વાચકો માટે પ્રેરણાનો નવો માર્ગ

આ પુસ્તક વિમોચન સમારોહ માત્ર સાહિત્યિક કાર્યક્રમ પૂરતો સીમિત ન રહ્યો, પરંતુ જીવનને સકારાત્મક દૃષ્ટિકોણથી જોવા, વિચારસરણીમાં પરિવર્તન લાવવા અને આર્થિક સમજણ વિકસાવવા માટેનો પ્રેરણાદાયી અવસર બન્યો હતો. ત્રણેય પુસ્તકો જીવનનાં અલગ-અલગ પાસાંને સ્પર્શે છે અને વાચકોને વધુ જાગૃત, આત્મવિશ્વાસપૂર્ણ તથા સુવ્યવસ્થિત જીવન તરફ આગળ વધવાનો સંદેશ આપે છે.

સમારોહમાં ઉપસ્થિત મહાનુભાવો અને સાહિત્યપ્રેમીઓના ઉત્સાહભર્યા પ્રતિસાદ સાથે આ કાર્યક્રમ સફળતાપૂર્વક સંપન્ન થયો હતો.