Kutch Chopadva Plywood Company Fire: કચ્છ જિલ્લાના ચોપડવા નજીક આવેલી એક વિશાળ પ્લાયવુડ કંપનીમાં અચાનક વિકરાળ આગ ફાટી નીકળતા ભારે દોડધામ અને અફરાતફરી મચી ગઈ હતી. કંપનીમાં લાકડું અને અન્ય જ્વલનશીલ પદાર્થો હોવાને કારણે આગે જોતજોતામાં જ આખી ફેક્ટરીને પોતાની લપેટમાં લઈ લીધી હતી. ફાયર બ્રિગેડની ટીમે રાત-દિવસ એક કરીને સતત 10 કલાકની મહાજહેમત બાદ આ ભયાનક આગ પર સંપૂર્ણપણે કાબૂ મેળવ્યો છે.

Kutch : 4 ફાયર ફાઈટર્સે 10 કલાક ચલાવ્યું ઓપરેશન

પ્લાયવુડ કંપનીમાં આગ લાગી હોવાની જાણ થતાં જ આસપાસના વિસ્તારોમાંથી ફાયર વિભાગનો કાફલો ઘટનાસ્થળે દોડી આવ્યો હતો. આગનું સ્વરૂપ એટલું રૌદ્ર હતું કે તેને ઓલવવી ખૂબ જ મુશ્કેલ બની રહી હતી. આગને કાબૂમાં લેવા માટે કુલ 4 જેટલા ફાયર ફાઈટર્સ કામે લગાડવામાં આવ્યા હતા અને ફાયરના જવાનોએ સતત પાણીનો મારો ચલાવીને અંદાજે 10 કલાક લાંબા ઓપરેશન બાદ આગને સંપૂર્ણપણે બુઝાવી હતી.

મશીનરી અને કાચો માલ બળીને ખાખ 

આ આગની ઘટનામાં કંપની માલિકને લાખો રૂપિયાનો આર્થિક ફટકો પડ્યો છે. ફેક્ટરીમાં રહેલી મોંઘીદાટ મશીનરી, તૈયાર કરાયેલા લાકડાના પ્લાયવુડનો મસમોટો જથ્થો અને મોટા પ્રમાણમાં રો-મટીરિયલ (કાચો માલ) બળીને સંપૂર્ણપણે ખાખ થઈ ગયા છે. જોકે, સૌથી મોટી રાહતની વાત એ રહી કે આટલી મોટી દુર્ઘટના હોવા છતાં કોઈ પણ વ્યક્તિનો જીવ ગયો નથી કે કોઈ મોટી જાનહાનિના સમાચાર નથી.

આગ લાગવાનું કારણ શું?

પ્રાથમિક તપાસમાં એવું અનુમાન લગાવવામાં આવી રહ્યું છે કે, ફેક્ટરીમાં આગ શોર્ટ સર્કિટના કારણે લાગી હોઈ શકે છે. હાલમાં ફાયર વિભાગ અને સ્થાનિક તંત્ર દ્વારા નુકસાનીનો સચોટ અંદાજ મેળવવા અને આગ લાગવા પાછળનું ચોક્કસ કારણ જાણવા માટે ઊંડાણપૂર્વક તપાસ હાથ ધરવામાં આવી છે.

આ પણ વાંચો: ગુજરાતના કચ્છમાં મળ્યા ‘વાસુકી ઇન્ડિકસ’ના પુરાવા! 4.7 કરોડ વર્ષ જૂનો 50 ફૂટ સાપ

આ પણ વાંચો: કચ્છ જિલ્લામાં ફ્લાઈંગ સ્ક્વૉડનો સપાટો, ગેરકાયદે ખનન કરતા 4 ડમ્પર અને 2 મશીનો જપ્ત

આ પણ વાંચો:કચ્છના કોરી ક્રીકમાં BSFની મોટી કાર્યવાહી, 15 પાકિસ્તાની ઘૂસણખોરો બે બોટ સાથે ઝડપાયા