New Delhi: દેશના મુખ્ય ન્યાયાધીશ (CJI) જસ્ટિસ સૂર્યકાંતની એક ટિપ્પણી બાદ સોશિયલ મીડિયા પર શરૂ થયેલી ‘કોકરોચ જનતા પાર્ટી’ (Cockroach Janata Party) ફરી ચર્ચામાં આવી છે. આ પાર્ટીનું સત્તાવાર X (પૂર્વ ટ્વિટર) એકાઉન્ટ ભારતમાં પ્રતિબંધિત કરી દેવામાં આવ્યું છે, જેને લઈને સોશિયલ મીડિયા પર નવી ચર્ચા શરૂ થઈ છે.
Cockroach Janata Partyનું Instagram પર હજુ પણ સક્રિય
X એકાઉન્ટ બંધ થયા બાદ પણ ‘કોકરોચ જનતા પાર્ટી’ (Cockroach Janata Party)નું Instagram પેજ હજુ કાર્યરત છે. ખાસ વાત એ છે કે આ પેજે ફોલોઅર્સની સંખ્યામાં ભાજપને પણ પાછળ છોડી દીધું હોવાનું કહેવાય છે.માહિતી મુજબ Instagram પર આ પેજના 1 કરોડથી વધુ ફોલોઅર્સ થઈ ચૂક્યા છે, જ્યારે ભાજપના ફોલોઅર્સની સંખ્યા આશરે 87 લાખ હોવાનું ચર્ચાઈ રહ્યું છે.
ફાઉન્ડર અભિજિત દીપકનો આક્ષેપ
પેજના ફાઉન્ડર અને સોશિયલ મીડિયા એક્ટિવિસ્ટ અભિજિત દીપકે X એકાઉન્ટ બેન થયા બાદ નારાજગી વ્યક્ત કરી છે. તેમણે Instagram પર વીડિયો શેર કરીને કહ્યું કે પહેલા એકાઉન્ટ હેક કરવાનો પ્રયાસ થયો અને પછી ભારતમાં સત્તાવાર X એકાઉન્ટ બંધ કરી દેવામાં આવ્યું. તેમણે દાવો કર્યો કે તેઓ માત્ર સરકાર પાસે જવાબદારી માંગતા હતા અને કોઈ ખોટી માહિતી શેર કરવામાં આવી નહોતી. સાથે જ તેમણે આ પગલાને “ડિજિટલ સેન્સરશિપ” ગણાવી યુવાનોને અવાજ ઉઠાવવાની અપીલ કરી છે.
શું હતો સમગ્ર વિવાદ?
આ સમગ્ર વિવાદની શરૂઆત સુપ્રીમ કોર્ટ (Supreme Court)માં ચાલી રહેલી એક સુનાવણી દરમિયાન થઈ હતી. સુનાવણી દરમિયાન CJI જસ્ટિસ સૂર્યકાંતે કથિત રીતે કેટલાક યુવાનો અંગે ટિપ્પણી કરી હતી, જેને લઈને સોશિયલ મીડિયા પર ભારે ચર્ચા અને વિરોધ જોવા મળ્યો હતો.ટિપ્પણી વાયરલ થયા બાદ અનેક યુવાનો અને સોશિયલ મીડિયા યુઝર્સે તેનો વિરોધ કર્યો હતો. બાદમાં જસ્ટિસ સૂર્યકાંતે સ્પષ્ટતા આપતા જણાવ્યું હતું કે તેમનો ઈશારો માત્ર નકલી ડિગ્રી ધારકો તરફ હતો અને દેશના સાચા યુવાનોની લાગણી દુભાવવાનો કોઈ ઈરાદો નહોતો.
સોશિયલ મીડિયા પર જનઆંદોલન જેવી સ્થિતિ
વિવાદ બાદ ‘કોકરોચ જનતા પાર્ટી’ નામે સોશિયલ મીડિયા પર અભિયાન શરૂ થયું હતું. થોડા સમયમાં જ આ પેજને લાખો લોકોનું સમર્થન મળ્યું અને તે યુવાનોના વિરોધનું પ્રતીક બની ગયું.હવે X એકાઉન્ટ બેન થયા બાદ ફરી એકવાર સોશિયલ મીડિયા પર અભિવ્યક્તિની સ્વતંત્રતા, ડિજિટલ સેન્સરશિપ અને સોશિયલ મીડિયા નિયંત્રણ અંગે ચર્ચા તેજ બની છે.
આ પણ વાંચો:સોશિયલ મીડિયા પર વાઇરલ થઈ ‘કોકરોચ જનતા પાર્ટી’, માત્ર 24 કલાકમાં જ જોડાયા હજારો યુવાનો
આ પણ વાંચો:ભારતીય જનતા પાર્ટીની સરકાર ડ્રગ્સના દૂષણ સામે કટિબદ્ધ
આ પણ વાંચો:જનનાયક જનતા પાર્ટી નેતા રવિન્દ્ર સૈનીના હત્યાના કાવતરાખોરો ગુજરાતમાંથી ઝડપાયા, પોલીસ લેશે રીમાન્ડ પર
