New Delhi News : સંસદના ચોમાસુ સત્ર દરમિયાન લોકસભા (Parliament)માં ‘એન્ટિ-પેપર લીક બિલ’ પર ચર્ચા દરમિયાન ભારે હોબાળો જોવા મળ્યો હતો. વિપક્ષના નેતા રાહુલ ગાંધી (Rahul Gandhi)એ NTAમાં પેપર લીક અને પરીક્ષા વ્યવસ્થાની અનિયમિતતાઓને લઈને કેન્દ્ર સરકાર પર આકરા પ્રહારો કર્યા. તેમણે વિદ્યાર્થીઓના વિરોધ પ્રદર્શનને સમર્થન આપતાં કહ્યું કે દેશના યુવાનોનો અવાજ લોકશાહીની તાકાત દર્શાવે છે અને તમામ રાજકીય પક્ષોએ તેમની ભાવનાઓનો આદર કરવો જોઈએ.
ચર્ચા દરમિયાન રાહુલ ગાંધીએ દાવો કર્યો કે વિદ્યાર્થીઓના વિરોધ દરમિયાન ગૃહ મંત્રાલયે સુરક્ષા દળોને પેલેટ ગન (Pellet Gun)થી ફાયરિંગ કરવાનો આદેશ આપ્યો હતો. આ નિવેદન બાદ લોકસભામાં ભારે હોબાળો મચી ગયો અને શાસક પક્ષના સભ્યોએ કડક વિરોધ નોંધાવ્યો.
કેન્દ્રીય સંસદીય કાર્યમંત્રી કિરેન રિજિજુ (Kiren Rijiju)એ રાહુલ ગાંધીના આરોપોને સખત શબ્દોમાં ફગાવતાં કહ્યું કે જો એવો કોઈ આદેશ હોય તો તેની નકલ રજૂ કરવામાં આવે. તેમણે રાહુલ ગાંધીને ગૃહમાં આધારવિહોણા ગંભીર આરોપો ન લગાવવાની સલાહ આપી અને માફી માંગવાની માંગ પણ કરી.
રાજનાથ સિંહ સહિત અન્ય મંત્રીઓએ પણ રાહુલ ગાંધી (Rahul Gandhi)ના નિવેદન સામે વાંધો ઉઠાવ્યો
આ દરમિયાન રક્ષા મંત્રી રાજનાથ સિંહ સહિત અન્ય મંત્રીઓએ પણ રાહુલ ગાંધીના નિવેદન સામે વાંધો ઉઠાવ્યો. વિપક્ષના સાંસદોએ “રાહુલ ગાંધીને બોલવા દો”ના સૂત્રોચ્ચાર કર્યા, જ્યારે શાસક પક્ષે સતત વિરોધ ચાલુ રાખ્યો.
હોબાળો વધતા લોકસભા અધ્યક્ષે પણ સ્પષ્ટ જણાવ્યું કે પુરાવા વિના ગૃહમાં આવા ગંભીર આરોપો લગાવવું યોગ્ય નથી. ત્યારબાદ ગૃહમાં સ્થિતિ વધુ તંગ બનતાં કાર્યવાહી થોડા સમય માટે સ્થગિત કરવામાં આવી.
રાહુલ ગાંધીએ પોતાના ભાષણમાં વિદ્યાર્થીઓના વિરોધને દેશના ભવિષ્યની અભિવ્યક્તિ ગણાવી હતી. તેમણે કહ્યું કે પેપર લીક (Paper Leak)ના કારણે લાખો વિદ્યાર્થીઓનું ભવિષ્ય જોખમમાં છે અને શિક્ષણ વ્યવસ્થામાં પારદર્શિતા લાવવાની જરૂર છે. તેમણે શિક્ષણના વધતા ખાનગીકરણની પણ ટીકા કરી અને આરોપ લગાવ્યો કે પરીક્ષા વ્યવસ્થામાં ગંભીર ખામીઓના કારણે મહેનતુ વિદ્યાર્થીઓને નુકસાન થઈ રહ્યું છે.
ચર્ચા દરમિયાન રાહુલ ગાંધી (Rahul Gandhi)એ વિદ્યાર્થી, ‘મૂર્ખ’ અને ‘અંધ અનુયાયી’ જેવી ત્રણ શ્રેણીઓનો ઉલ્લેખ કરતા ઉદાહરણ આપ્યું હતું, જેના કારણે પણ શાસક પક્ષના સભ્યોએ ભારે વિરોધ વ્યક્ત કર્યો. આ મુદ્દે બંને પક્ષ વચ્ચે ઉગ્ર બોલાચાલી થતાં સમગ્ર ગૃહનું વાતાવરણ ગરમાયું હતું.
