India News: વૈશ્વિક બજારમાં ક્રૂડ ઓઇલના સતત (Crude Oil Price) વધી રહેલા ભાવને લઈને ભારતના નાણા મંત્રાલયે ગંભીર ચિંતા વ્યક્ત કરી છે. મંત્રાલયે પોતાના તાજેતરના માસિક આર્થિક અહેવાલમાં જણાવ્યું છે કે જો ક્રૂડ ઓઇલના ભાવ લાંબા સમય સુધી ઊંચા રહેશે, તો તેની સીધી અસર ભારતની નાણાકીય સ્થિતિ, વેપાર સંતુલન અને અર્થવ્યવસ્થા પર પડી શકે છે.

Crude Oil Price: રાજકોષીય ખાધ અને ચાલુ ખાતાની ખાધ પર દબાણ

નાણા મંત્રાલયના જણાવ્યા અનુસાર, ભારત પોતાની ઊર્જાની જરૂરિયાતનો મોટો હિસ્સો આયાત દ્વારા પૂરો કરે છે. આવી સ્થિતિમાં ક્રૂડ ઓઇલના ભાવમાં (Crude Oil Price) વધારો થવાથી આયાત ખર્ચ વધે છે, જેના કારણે રાજકોષીય ખાધ (Fiscal Deficit) અને ચાલુ ખાતાની ખાધ (Current Account Deficit) બંને પર દબાણ વધી શકે છે. લાંબા ગાળે આ સ્થિતિ દેશના આર્થિક સંતુલન માટે પડકારરૂપ બની શકે છે.

ફુગાવાનું જોખમ પણ વધી શકે

અહેવાલમાં જણાવાયું છે કે ખાડી ક્ષેત્રમાં તણાવ અને હોર્મુઝ સ્ટ્રેટમાં શિપિંગ પ્રવૃત્તિઓમાં વિક્ષેપને કારણે ઊર્જાના વૈશ્વિક ભાવ વધી રહ્યા છે. ભારત જેવા ઇંધણ આયાત કરનારા દેશોમાં આ સ્થિતિ ફુગાવો (Inflation) વધારવાનું કારણ બની શકે છે, કારણ કે પેટ્રોલ-ડીઝલ સહિત પરિવહન અને ઉત્પાદન ખર્ચમાં વધારો થાય છે.

ભારતનું બાહ્ય ક્ષેત્ર હજુ પણ મજબૂત

વૈશ્વિક પડકારો છતાં નાણા મંત્રાલયે જણાવ્યું છે કે ભારતનું બાહ્ય ક્ષેત્ર હાલ મજબૂત સ્થિતિમાં છે. એપ્રિલ-મે દરમિયાન ચાલુ ખાતામાં 2.8 બિલિયન ડોલરનો સરપ્લસ નોંધાયો હતો, જ્યારે ગયા વર્ષના સમાન સમયગાળામાં 4.1 બિલિયન ડોલરની ખાધ નોંધાઈ હતી. આ સુધારો ભારતની આર્થિક સ્થિરતાનો મહત્વપૂર્ણ સંકેત માનવામાં આવે છે.

વિદેશી મુદ્રા ભંડારથી મળશે સુરક્ષા

10 જુલાઈ સુધીમાં ભારતનું વિદેશી મુદ્રા ભંડાર (Forex Reserves) 675.2 બિલિયન ડોલર સુધી પહોંચ્યું હતું, જે દેશના ઇતિહાસના સૌથી ઊંચા સ્તરોમાંનું એક છે. આ ભંડાર લગભગ 10 મહિનાની આયાત માટે પૂરતું માનવામાં આવે છે અને વૈશ્વિક આર્થિક આંચકાઓ સામે મજબૂત સુરક્ષા કવચ પૂરું પાડે છે.

મજબૂત અર્થવ્યવસ્થા આપશે પડકારોનો સામનો કરવાની શક્તિ

નાણા મંત્રાલયના અહેવાલમાં જણાવાયું છે કે ભારતની અર્થવ્યવસ્થા મજબૂત નિકાસ, સેવા ક્ષેત્રમાં સરપ્લસ, વિદેશમાં રહેતા ભારતીયો પાસેથી મળતા રેકોર્ડ રેમિટન્સ અને મજબૂત વિદેશી મુદ્રા ભંડારના કારણે હાલ સ્થિર છે. ઉપરાંત, સરકાર દ્વારા લેવામાં આવેલા તાજેતરના નીતિગત નિર્ણયો આગામી સમયમાં મૂડી રોકાણ અને વિદેશી મૂડી પ્રવાહને વધુ મજબૂત બનાવવામાં મદદરૂપ થશે.

શું છે સૌથી મોટી ચિંતા?

નાણા મંત્રાલયનું માનવું છે કે જો વૈશ્વિક સ્તરે ક્રૂડ ઓઇલના ભાવમાં લાંબા સમય સુધી ઘટાડો નહીં થાય, તો ભારત માટે આયાત ખર્ચ વધશે, જેના કારણે ફુગાવો, વેપાર ખાધ અને સરકારના નાણાકીય સંતુલન પર દબાણ વધી શકે છે. જોકે, હાલના મજબૂત આર્થિક પાયા અને વિદેશી મુદ્રા ભંડારને કારણે ભારત પાસે આ પડકારોનો સામનો કરવાની પૂરતી ક્ષમતા હોવાનું પણ અહેવાલમાં જણાવાયું છે.

આ પણ વાંચો: ભારતીય રેલવેએ 12 વર્ષમાં 5.56 લાખ ભરતી, રેલવે મંત્રીએ આપ્યા આંકડા

આ પણ વાંચો: 31 જુલાઈ સુધી ITR ફાઇલ ન કરો તો શું થશે? કોને રિટર્ન ભરવું ફરજિયાત છે અને સંપૂર્ણ પ્રક્રિયા શું છે?

આ પણ વાંચો: ભારતની ચોખાની નિકાસમાં 5%નો વધારો, બિન-બાસમતી ચોખાએ સંભાળી બજાર