Patan News: રાધનપુર-પાટણ સેક્શનના NH-68 પ્રોજેક્ટ (Patan NH 68 Land Acquisition)ને લઈને પાટણના ખેડૂતોમાં વિરોધનો સૂર ઉઠ્યો છે. જમીન સંપાદનથી પોતાની ખેતીની જમીન ગુમાવવાની આશંકા વ્યક્ત કરી અસરગ્રસ્ત ખેડૂતોએ પાટીદાર કિસાન સેના સાથે મળીને કલેક્ટર ફળજી ચૌધરીને વાંધા અરજી સુપરત કરી છે. ખેડૂતોનું કહેવું છે કે શહેરના વિકાસ નકશા, TP સ્કીમ અને પ્રસ્તાવિત માર્ગ માટેની જમીન કપાતને કારણે એક જ જમીન પર અનેક પ્રકારની કપાતનો બોજ આવી શકે છે. ખેડૂતોએ NH-68 માટેની પ્રક્રિયા અંગે પુનર્વિચાર કરવાની માંગ સાથે યોગ્ય વળતર અને સ્થળ પર સંયુક્ત માપણી કરવાની માગ કરી છે. જો પ્રશ્નોનો ઉકેલ નહીં આવે તો આંદોલન કરવાની ચીમકી પણ આપવામાં આવી છે.
Patan NH 68 Land Acquisition: પાટણના કયા વિસ્તારોની જમીન અંગે વાંધો?
ખેડૂતોની રજૂઆતમાં પાટણ તાલુકાના રાજપુર અને અનાવાડા, તેમજ પાટણ શહેરની નજીક આવેલા સાંડેસરપાટી અને બકરતપુરા વિસ્તારનો ઉલ્લેખ કરવામાં આવ્યો છે. ખેડૂતોના જણાવ્યા પ્રમાણે, સાંડેસરપાટી વિસ્તાર પાટણ શહેરની હદને અડીને આવેલો અને વિકસિત વિસ્તાર છે. અહીંથી રાષ્ટ્રીય ધોરીમાર્ગ પસાર થવાથી શહેરના ભવિષ્યના અર્બન પ્લાનિંગ પર અસર પડી શકે છે. સાથે જ ભારે વાહનોની અવરજવર વધવાથી અકસ્માત અને પ્રદૂષણની સમસ્યા ઊભી થવાની પણ આશંકા ખેડૂતો દ્વારા વ્યક્ત કરવામાં આવી છે.
DP અને TP બાદ ફરી જમીન કપાતની ચિંતા
ખેડૂતોની મુખ્ય ચિંતા જમીનની એકથી વધુ વખત થનારી કપાતને લઈને છે. રજૂઆત મુજબ, પાટણ શહેરના Development Plan (DP) અને Town Planning (TP) Schemeમાં કેટલીક જમીનોમાંથી રસ્તા માટેની કપાત અગાઉથી દર્શાવવામાં આવી છે. ખેડૂતોનો દાવો છે કે TP પ્રક્રિયામાં જમીનની નોંધપાત્ર ટકાવારી કપાતમાં જઈ શકે છે. આવી સ્થિતિમાં જો NH-68 માટેનો બાયપાસ અથવા અન્ય માર્ગ પણ આ જ વિસ્તારમાંથી પસાર થાય તો તેમની કિંમતી જમીનનો વધુ હિસ્સો સંપાદિત થવાની શક્યતા છે.
નવી જંત્રીના આધારે 4થી 6 ગણું વળતર માગ્યું
ખેડૂતોએ સંપાદન (Patan NH 68 Land Acquisition) થનારી જમીનના વળતરની ગણતરી જૂના જંત્રી દરે ન કરવા રજૂઆત કરી છે. તેમની માંગ છે કે ડ્રાફ્ટ જંત્રી-2024ને આધાર બનાવી જમીનની વાસ્તવિક કિંમતને ધ્યાનમાં લેવામાં આવે અને 4થી 6 ગણું વળતર આપવામાં આવે. કાયદાકીય રીતે જમીન સંપાદન (Patan NH 68 Land Acquisition)ના કિસ્સામાં બજાર મૂલ્ય નક્કી કરવા માટે સંબંધિત કાયદાની જોગવાઈઓ લાગુ પડે છે. Right to Fair Compensation and Transparency in Land Acquisition, Rehabilitation and Resettlement Act, 2013ની કલમ 26માં જમીનના બજાર મૂલ્યના નિર્ધારણ અંગે જોગવાઈ છે.
રાજપુરમાં જમીનના ઊંચા બજારભાવનો દાવો
ખેડૂતોની રજૂઆત મુજબ, રાજપુર ગામના કેટલાક સર્વે નંબરો બિનખેતી (NA) થઈ ચૂક્યા છે અને આ સમગ્ર વિસ્તાર ઝડપથી કોમર્શિયલ ડેવલપમેન્ટ તરફ આગળ વધી રહ્યો છે. ખેડૂતોના દાવા પ્રમાણે રાજપુર વિસ્તારમાં હાલના બજારભાવ આશરે રૂ.5 કરોડ પ્રતિ વીઘા સુધી હોવાનો અંદાજ છે. તેથી જૂના જંત્રી દરના આધારે વળતર નક્કી કરવામાં આવે તો ખેડૂતોને તેમની જમીનની વાસ્તવિક કિંમતની સરખામણીમાં યોગ્ય વળતર નહીં મળે તેવી રજૂઆત કરવામાં આવી છે.
સર્વે નંબર છે, પરંતુ કેટલા ભાગની જમીન જશે?
ખેડૂતો દ્વારા રજૂ કરાયેલા અન્ય મહત્વના મુદ્દામાં જમીન માપણીનો સમાવેશ થાય છે. તેમની રજૂઆત મુજબ, જાહેરનામામાં સર્વે નંબરોનો ઉલ્લેખ કરવામાં આવ્યો છે, પરંતુ કયા ખેડૂતની જમીનમાંથી કેટલો હિસ્સો સંપાદિત થશે તેની સ્પષ્ટ વિગતો અંગે ખેડૂતોને વાંધો છે. આથી ખેડૂતોની માંગ છે કે અગાઉ કરવામાં આવેલી સીમાંકન પ્રક્રિયાની ફરી તપાસ કરવામાં આવે અને ખેડૂતોની હાજરીમાં Joint Survey હાથ ધરવામાં આવે. આ પ્રક્રિયા દરમિયાન દરેક સર્વે નંબરની જમીનમાંથી કેટલો ભાગ પ્રોજેક્ટમાં જશે તેની સ્પષ્ટતા કરવામાં આવે તેવી પણ માંગ છે.
ખેતીની જમીનના બદલે હયાત રસ્તા કે સરકારી જમીનનો ઉપયોગ કરવાની માંગ
ખેડૂતોએ શક્ય હોય ત્યાં નવી ખેતીની જમીન સંપાદિત કરવાને બદલે હયાત રસ્તા અથવા સરકારી ખરાબાની જમીનનો ઉપયોગ કરવાનો વિકલ્પ વિચારવા પણ રજૂઆત કરી છે. તેમનું કહેવું છે કે માર્ગનું આયોજન એવી રીતે કરવામાં આવે કે ખેડૂતોની કિંમતી ખેતીની જમીનને ઓછામાં ઓછું નુકસાન થાય.
Patan NH 68 Land Acquisition: NH-68 માટે જમીન સંપાદનની સરકારી પ્રક્રિયા
કેન્દ્ર સરકારના રોડ ટ્રાન્સપોર્ટ અને હાઇવે મંત્રાલયે NH-68ના પાટણ જિલ્લામાં આવેલા વિવિધ ભાગો માટે જમીન સંપાદન (Patan NH 68 Land Acquisition)ની પ્રક્રિયા અંગે અગાઉથી નોટિફિકેશન બહાર પાડ્યાં છે. 2024ના એક નોટિફિકેશનમાં પાટણ જિલ્લામાં Km 52થી Km 128.94 વચ્ચે NH-68ના વિકાસ, પહોળીકરણ, જાળવણી અને સંચાલન માટે જમીન સંપાદન (Patan NH 68 Land Acquisition)ની પ્રક્રિયાનો ઉલ્લેખ હતો.
જ્યારે જુલાઈ 2026માં બહાર પડેલા નોટિફિકેશનમાં Km 0થી Km 52.9 સુધીના Radhanpur–Patan Section માટે જમીન સંપાદન (Patan NH 68 Land Acquisition) અને NH-68ના વિકાસ સંબંધિત કામગીરી માટે સક્ષમ સત્તાધિકારીઓને અધિકૃત કરવામાં આવ્યા છે. આ વિસ્તારના શેડ્યૂલમાં રાધનપુર, પાટણ, હારીજ, સામી અને પાટણ સિટી સહિતના વિસ્તારોના ગામોના નામનો સમાવેશ થાય છે. આ સમગ્ર પ્રક્રિયા વચ્ચે પાટણના અસરગ્રસ્ત ખેડૂતો હવે પોતાની જમીન, વળતર અને માર્ગના રૂટ અંગે વાંધા રજૂ કરી રહ્યા છે. ખેડૂતોની માંગણીઓ અંગે સંબંધિત તંત્ર દ્વારા શું નિર્ણય લેવામાં આવે છે તેના પર હવે સૌની નજર છે.
આ પણ વાંચો:હળવદના સાપકડા ગામમાં વીજપોલના વળતર મુદ્દે ખેડૂતોનો વિરોધ
આ પણ વાંચો:સાણંદના ડરણ ગામે પાઇપલાઇન કામગીરી સામે ખેડૂતોનો ઉગ્ર વિરોધ, પોલીસ બંદોબસ્ત વચ્ચે કામ શરૂ
