Ahmedabad Crime: અમદાવાદના શાહઆલમ વિસ્તારમાં રહેતા 50 વર્ષીય બિલ્ડર આરીફ કુરેશીના મોત (Ahmedabad Builder Death)ના મામલે જમીનના વિવાદ અને વ્યાજે આપેલા નાણાંની ઉઘરાણી અંગે ગંભીર આક્ષેપો સામે આવ્યા છે. મૃતકના પુત્ર અબ્દુલહમીદ કુરેશીએ દાણીલીમડા પોલીસ (Dani Limda Police) સ્ટેશનમાં જમીન માલિક દિલાવરખાન પઠાણ સહિત ચાર વ્યક્તિઓ સામે ફરિયાદ નોંધાવી છે.
ફરિયાદ મુજબ, જમીનના બાકી પાવર ઓફ એટર્ની માટે રૂ. 2 કરોડની માંગણી કરવામાં આવતી હતી અને વ્યાજે આપેલા નાણાંની ઉઘરાણી દરમિયાન ધમકીઓ આપવામાં આવતી હતી. પોલીસે આત્મહત્યા માટે દુષ્પ્રેરણા અને ગુજરાત નાણાં ધીરધાર અધિનિયમ હેઠળ ગુનો નોંધી તપાસ શરૂ કરી છે.
Ahmedabad Builder Death: જમીનના પાવર ઓફ એટર્નીને લઈને વિવાદ
ફરિયાદ મુજબ, શાહઆલમ (Shah Alam News)ની કીર્તિ કુંજ સોસાયટીમાં રહેતા આરીફ કુરેશીએ સપ્ટેમ્બર 2022માં પોતાના મિત્ર દિલાવરખાન ઉમરખાન પઠાણ પાસેથી દાણીલીમડાના સિકંદર માર્કેટ નજીક આવેલી આશરે 275 વાર જમીન રૂ. 1.64 કરોડથી વધુની રકમ ચૂકવીને ખરીદી હતી. ત્યારબાદ તેમણે અન્ય જમીનો પણ ખરીદી હતી.
ફરિયાદમાં જણાવ્યા અનુસાર, દિલાવરખાને આશરે 1,500 વાર જમીનના પાવર ઓફ એટર્ની કરી આપ્યા હતા, પરંતુ બાકીની આશરે 700 વાર જમીનના નાણાં ચૂકવાઈ ગયા હોવા છતાં જરૂરી લખાણ કે પાવર કરી આપ્યો નહોતો. જમીનના ભાવ વધ્યા બાદ બાકીની જમીનનો પાવર આપવા માટે વધુ રૂ. 2 કરોડની માંગણી કરવામાં આવી હોવાનો આક્ષેપ છે.
ઓફિસે બોલાવી ધમકી અને મારપીટ કર્યાનો આરોપ
મૃતકના પુત્રની ફરિયાદ મુજબ, દિલાવરખાન વારંવાર આરીફ કુરેશીને ઓફિસે બોલાવતા હતા. ત્યાં તેમની સાથે મારપીટ અને અપમાનજનક વર્તન કરવામાં આવતું હોવાનો પણ આક્ષેપ છે. રૂપિયા નહીં આપે તો ફ્લેટ તોડી પાડવાની ધમકી આપવામાં આવી હોવાની ફરિયાદમાં વિગતો છે.
આ પરિસ્થિતિમાંથી બહાર નીકળવા માટે આરીફ કુરેશીએ પરિચિત ફિરોજખાન સુલતાનખાન પાસે નાણાંની વ્યવસ્થા કરવા મદદ માગી હતી. (Gujarat Crime News)
30 ટકા વ્યાજે રૂ. 20 લાખ આપ્યાનો આક્ષેપ
ફરિયાદ અનુસાર, ફિરોજખાને પોતાના પુત્ર પરવેઝખાન મારફતે આરીફ કુરેશીને 30 ટકા વ્યાજના દરે રૂ. 20 લાખ અપાવ્યા હતા. આ રકમ વ્યાજ સહિત વર્ષ 2025 સુધીમાં ચૂકવી દેવામાં આવી હોવા છતાં પરવેઝખાન અને ફિરોજખાન વધુ નાણાંની ઉઘરાણી કરવા ઘરે આવતા હોવાનો આરોપ છે.
આ ઉપરાંત, પરવેઝખાને પોતાના મામા હકીમખાન વસીરખાન પઠાણ પાસેથી રોજના રૂ. 15 હજાર વ્યાજ ચૂકવવાની શરતે રૂ. 15 લાખ અપાવ્યા હોવાનો પણ ફરિયાદમાં ઉલ્લેખ છે.
જાનથી મારી નાખવાની ધમકી આપ્યાનો આરોપ
ફરિયાદમાં જણાવ્યા પ્રમાણે, 23 સપ્ટેમ્બર 2026ના રોજ આરીફ કુરેશી અને તેમનો પુત્ર રિવરફ્રન્ટ પરથી પસાર થઈ રહ્યા હતા ત્યારે પરવેઝખાને તેમનો પીછો કરીને રસ્તામાં રોક્યા હતા અને જાનથી મારી નાખવાની ધમકી આપી હતી.
આ ઉપરાંત, આશરે બે મહિના પહેલાં પરવેઝખાન અને હકીમખાન ફરિયાદીના ઘરે ગયા હતા અને પરિવારની મહિલા સભ્યોને ધમકાવી ઘરમાં પૂરી બહારથી તાળું મારી દીધું હોવાનો પણ આક્ષેપ છે.
બિલ્ડરના મોત બાદ ચાર સામે પોલીસ ફરિયાદ
ફરિયાદ મુજબ, સતત ધમકીઓ અને ઉઘરાણીને કારણે આરીફ કુરેશી પર માનસિક દબાણ વધ્યું હતું. 10 ઓક્ટોબર 2026ના રોજ બપોરે આશરે ત્રણ વાગ્યે તેમના ઘરે તેમનું મોત થયું હતું. પોલીસે આ મામલે દિલાવરખાન પઠાણ સહિત ચાર વ્યક્તિઓ સામે આત્મહત્યા માટે દુષ્પ્રેરણા અને ગુજરાત નાણાં ધીરધાર અધિનિયમ હેઠળ ગુનો નોંધ્યો છે.
હાલ પોલીસ જમીનના વ્યવહાર, નાણાંની લેવડદેવડ, વ્યાજની માંગણી અને ધમકીઓ અંગેના આક્ષેપોની તપાસ કરી રહી છે. આરોપીઓ સામેના આક્ષેપો તપાસ હેઠળ છે અને તેમની કાનૂની જવાબદારી અંગેનો નિર્ણય પુરાવા તથા ન્યાયિક પ્રક્રિયાના આધારે થશે.
આ પણ વાંચો: બિલ્ડરના બ્રોશરમાં કરેલા વાયદા કાયદેસર જવાબદારી બની શકે, સુપ્રીમ કોર્ટની કડક ટકોર
આ પણ વાંચો: મુંબઈમાં મિલકત ખરીદીના નામે બિલ્ડર સાથે રૂ.2 કરોડની ઠગાઈ, બનાવટી ટોકનથી આંગડિયામાંથી રકમ ઉપાડી
