New Delhi News : દેશમાં ટ્રેન મુસાફરી કરતા લાખો મુસાફરો (Railway Passengers)માટે મહત્ત્વપૂર્ણ સમાચાર સામે આવ્યા છે. સુપ્રીમ કોર્ટે (Supreme Court)ભારતીય રેલવેને રિઝર્વેશન કાઉન્ટર પરથી ખરીદવામાં આવતી ટિકિટો પર પણ મુસાફરી વીમો (Railway Travel Insurance) આપવાનો નિર્દેશ આપ્યો છે. આ વ્યવસ્થા લાગુ થતાં ઓફલાઇન ટિકિટ ખરીદનારા મુસાફરોને પણ ઓનલાઇન ટિકિટ ખરીદનારા મુસાફરોની જેમ વીમા કવચ મળી શકશે.
Railway Passengers : કાઉન્ટર ટિકિટ પર પણ મળશે વીમા કવચ
હાલમાં ઓનલાઇન ટિકિટ બુકિંગ દરમિયાન ઉપલબ્ધ મુસાફરી વીમા (Travel Insurance) અને કાઉન્ટર પરથી ટિકિટ (Counter Ticket)ખરીદતા મુસાફરોને મળતી સુવિધાઓ વચ્ચેનો તફાવત દૂર કરવા સુપ્રીમ કોર્ટે આ નિર્દેશ આપ્યો છે. કોર્ટના આદેશ મુજબ, 27 ઓક્ટોબર 2026થી બે અઠવાડિયાની અંદર તમામ રેલવે સ્ટેશનો પર રિઝર્વેશન કાઉન્ટર પરથી વેચાતી ટિકિટો પર પણ ઓનલાઇન ટિકિટની જેમ વીમા કવચ ઉપલબ્ધ કરાવવાનું રહેશે.
કોર્ટે ખાસ ભાર મૂક્યો કે આ સુવિધા સમાજના ગરીબ અને સામાન્ય વર્ગના મુસાફરો સુધી પહોંચવી જોઈએ. આવા અનેક મુસાફરો આજે પણ રેલવે સ્ટેશનના કાઉન્ટર પરથી ટિકિટ ખરીદવાનું પસંદ કરે છે. તેથી તેમની સુરક્ષા માટે સમાન વ્યવસ્થા ઊભી કરવી જરૂરી છે.
રેલવેના વલણ સામે સુપ્રીમ કોર્ટ નારાજ
આ મામલે સુનાવણી દરમિયાન જસ્ટિસ અહસાનુદ્દીન અમાનુલ્લાહ અને જસ્ટિસ આર. મહાદેવનની ખંડપીઠે રેલવેના વલણ સામે નારાજગી વ્યક્ત કરી હતી. 6 ઓક્ટોબરની સુનાવણીમાં કોર્ટે નોંધ્યું હતું કે આ ગંભીર મુદ્દે રેલવે દ્વારા આપવામાં આવેલા આશ્વાસનોના અમલીકરણમાં પૂરતી પ્રગતિ જોવા મળી નથી.
કોર્ટે સ્પષ્ટ કર્યું કે મુસાફરોની સુરક્ષા સાથે જોડાયેલા મુદ્દે માત્ર વચનો આપવાથી ચાલશે નહીં, પરંતુ નક્કર પગલાં લેવા જરૂરી છે. કાઉન્ટર પરથી ટિકિટ ખરીદનારા મુસાફરોને પણ ઓનલાઇન મુસાફરો જેવી જ સુવિધા મળે તે સુનિશ્ચિત કરવાની જવાબદારી રેલવેની રહેશે.
રેલવે બોર્ડના અધિકારીઓને હાજર થવાનો આદેશ
સુપ્રીમ કોર્ટે (Supreme Court)આ મામલે રેલવે બોર્ડના ચેરમેન અને તમામ સભ્યોને 16 નવેમ્બરે બપોરે 3 વાગ્યે વ્યક્તિગત રીતે હાજર રહેવાનો આદેશ આપ્યો છે. કોર્ટના નિર્દેશોનું પાલન કરવામાં નિષ્ફળતા મળે તો રેલવે બોર્ડની જવાબદારી નક્કી થઈ શકે છે.
આ આદેશથી રેલવે મુસાફરો માટે ઓનલાઇન અને કાઉન્ટર ટિકિટ વચ્ચેની વીમા સુવિધાની અસમાનતા દૂર કરવાનો માર્ગ ખુલ્યો છે. જોકે, મુસાફરોએ વીમાની ચોક્કસ શરતો, કવરેજ અને અમલીકરણની વિગતો માટે રેલવેની સત્તાવાર જાહેરાતની રાહ જોવી પડશે.
