Kheda News: ખેડા જિલ્લાના મહુધા તાલુકાના કપરૂપુર બારૈયાની મુવાડીમાં ગર્ભવતી મહિલા અરુણાબેનના શંકાસ્પદ મોતના (Pregnant Woman Death Case) કેસમાં ચોંકાવનારી વિગતો સામે આવી છે. શરૂઆતમાં મહિલાએ ગળેફાંસો ખાઈ આત્મહત્યા કરી હોવાનું દર્શાવવામાં આવ્યું હતું, પરંતુ પોલીસ તપાસ અને પોસ્ટમોર્ટમ રિપોર્ટના આધારે ઝેરી પદાર્થને કારણે મોત થયું હોવાની વિગતો સામે આવી છે. પોલીસે હત્યાને આત્મહત્યાનું રૂપ આપવાના કથિત કાવતરાના આરોપસર પતિ મિતુલ સોઢા અને જેઠ વિપુલ સોઢાની અટકાયત કરી છે.
Pregnant Woman Death Case: ચારિત્ર્ય પર શંકા રાખીને ત્રાસ આપતા હોવાનો આક્ષેપ
મૃતક અરુણાબેનના ભાઈ વીરેન્દ્રસિંહે નોંધાવેલી ફરિયાદ મુજબ, અરુણાબેનને તેમના(Arunaben Sodha Case) પતિ મિતુલ સોઢા, સાસુ કૈલાશબેન, જેઠ વિપુલ સોઢા અને જેઠાણી અલ્પાબેન દ્વારા ચારિત્ર્ય પર શંકા રાખીને શારીરિક અને માનસિક ત્રાસ આપવામાં આવતો હતો. પતિ-પત્ની વચ્ચે કથિત ગેરસંબંધોને લઈને વારંવાર ઝઘડા થતા હોવાનો પણ ફરિયાદમાં ઉલ્લેખ છે.
ફરિયાદના આધારે મહુધા પોલીસે ગુનો નોંધી તપાસ શરૂ કરી હતી. તપાસ દરમિયાન બનાવની રાત્રે પતિ-પત્ની વચ્ચે ઉગ્ર બોલાચાલી થઈ હોવાની વિગતો સામે આવી હતી.
ઝઘડા બાદ મોબાઇલમાં ગૂગલ પર સર્ચ કર્યું હોવાનો દાવો
ડીવાયએસપી વિમલ બાજપાઈના જણાવ્યા અનુસાર, બનાવની રાત્રે ઝઘડા બાદ મિતુલે પોતાના મોબાઇલમાં ગૂગલ પર ‘પત્નીની આત્મહત્યામાં પતિ કેટલો જવાબદાર?’ તે અંગે સર્ચ કર્યું હોવાની વિગતો તપાસમાં મળી છે.
પોલીસના આરોપ મુજબ, ત્યારબાદ મિતુલે અરુણાબેનને સોફા પર પાડી દઈને બળજબરીથી ખેતીમાં વપરાતું નેનો યુરિયાનું પ્રવાહી પીવડાવ્યું (Suspected Murder Case) હતું. જોકે, આ અંગેના તમામ આરોપો તપાસ હેઠળ છે અને તેમની ન્યાયિક પ્રક્રિયામાં ચકાસણી થવાની બાકી છે.
હત્યા બાદ મૃતદેહને લટકાવી આત્મહત્યા બતાવવાનો આરોપ
પોલીસ તપાસમાં એવો આરોપ સામે આવ્યો છે કે અરુણાબેનનું મોત થયા બાદ ઘટનાને આત્મહત્યા તરીકે દર્શાવવા માટે તેમના મૃતદેહને ઘરના પાછળના ખંડની બારી પાસે નાયલોનની દોરીથી લટકાવવામાં આવ્યો હતો.
પોલીસના જણાવ્યા મુજબ, પરિવારના અન્ય સભ્યોની કથિત મદદગારીની પણ તપાસ કરવામાં આવી રહી છે. આરોપ છે કે જેઠાણી અલ્પાબેને મહિલાના પગ પકડી રાખ્યા હતા, જ્યારે સાસુ કૈલાશબેને તેમના હાથ પકડી રાખ્યા હતા. આ ઉપરાંત, ઝેરી પદાર્થની પ્લાસ્ટિકની (Nano Urea Poisoning Allegation) કોથળી ચુલામાં સળગાવી દેવામાં આવી હોવાનો અને બનાવને સવાર સુધી છુપાવી રાખવાનો પણ પોલીસનો દાવો છે.
પતિ અને જેઠની અટકાયત, મુદ્દામાલ કબજે
મહુધા પોલીસે આ કેસમાં પતિ મિતુલ સોઢા અને જેઠ વિપુલ સોઢાની અટકાયત કરી છે. ઘટનાસ્થળેથી નાયલોનની દોરી, મોબાઇલ ફોન અને બ્લેડ સહિતનો મુદ્દામાલ કબજે કરવામાં આવ્યો હોવાનું જણાવાયું છે.
પોલીસ હવે અન્ય પરિવારજનોની કથિત ભૂમિકા, પુરાવા નષ્ટ કરવાના આરોપ અને સમગ્ર ઘટનાક્રમ અંગે વધુ તપાસ કરી રહી છે. આ કેસમાં અંતિમ નિષ્કર્ષ તપાસ અને કોર્ટની કાર્યવાહી બાદ જ સ્પષ્ટ થશે.
આ પણ વાંચો: વડોદરામાં ગરબા જોવા આવેલા યુવકની હત્યા, ₹30 લાખ અને બે મકાનની લાલચ આપ્યાનો પોલીસનો દાવો
આ પણ વાંચો: મુંબઈમાં 18 મહિનાની બાળકીના મોતનો કેસ: 7 દિવસ બાદ હત્યાની FIR, જાણો સમગ્ર મામલો
આ પણ વાંચો: નર્મદાના ડેડિયાપાડામાં માતાની હત્યાનો આરોપ, કામધંધો કરવા કહેતાં પુત્રે હુમલો કર્યો
