World News: અમેરિકામાં આર્ટિફિશિયલ ઇન્ટેલિજન્સ (AI) કંપનીઓ સામે હવે રાજકીય અને સામાજિક પડકારો વધી (US AI Companies) રહ્યો છે. એક તરફ કંપનીઓ AIના ઉપયોગથી કામ ઝડપી બનાવવા અને ખર્ચ ઘટાડવાની વાત કરી રહી છે, તો બીજી તરફ નોકરીઓમાં કાપ, વીજળીના વધતા વપરાશ અને પાણીની જરૂરિયાતને કારણે લોકોમાં અસંતોષ વધી રહ્યો છે. 3 નવેમ્બર, 2026ની મધ્યસત્ર ચૂંટણીમાં (US Midterm Election) ડેમોક્રેટિક પાર્ટીએ સેનેટ અને પ્રતિનિધિ ગૃહ બંનેમાં બહુમતી મેળવી છે. ટેક્સાસ, જ્યોર્જિયા અને ઓહિયો જેવા રાજ્યોમાં પણ ડેટા સેન્ટરો પર કડક નિયંત્રણોની તરફેણ કરનારા ડેમોક્રેટિક ઉમેદવારોની જીતથી AI કંપનીઓના વિસ્તરણ પર અસર (Data Center Restrictions) થવાની શક્યતા છે.

US AI Companies: 1. AIના કારણે 1.21 લાખ નોકરીઓમાં કાપની જાહેરાત

આઉટપ્લેસમેન્ટ કંપની ચેલેન્જર, ગ્રે એન્ડ ક્રિસમસના 5 નવેમ્બરના અહેવાલ મુજબ, અમેરિકાની કંપનીઓએ જાન્યુઆરીથી ઓક્ટોબર 2026 દરમિયાન કુલ 6,17,189 નોકરીઓમાં કાપની જાહેરાત કરી હતી. તેમાંથી 1,21,401 નોકરીઓમાં કાપ માટે AIને કારણ ગણાવવામાં આવ્યું હતું. આ કુલ જાહેરાતોના આશરે 20 ટકા થાય છે. જોકે, આ આંકડો કંપનીઓ દ્વારા જાહેર કરાયેલા કાપનો છે; તેનો અર્થ એ નથી કે તમામ કર્મચારીઓની નોકરી ખરેખર AIના કારણે જ ગઈ છે.

અહેવાલ પ્રમાણે ઓક્ટોબરમાં AIને કારણે 1,265 નોકરીઓમાં કાપની જાહેરાત થઈ હતી, જે 2026નો અત્યાર સુધીનો સૌથી ઓછો માસિક આંકડો છે. 2023માં AIને કારણે 4,247, 2024માં 12,742 અને 2025માં 54,836 નોકરીઓમાં કાપની જાહેરાત થઈ હતી. બીજી તરફ, 2026માં અત્યાર સુધીમાં બજાર અને આર્થિક પરિસ્થિતિઓને કારણે 1,30,531 નોકરીઓમાં કાપની જાહેરાત થઈ છે. એટલે હાલ નોકરીઓમાં કાપનું સૌથી મોટું કારણ AI નહીં, પરંતુ બજાર અને આર્થિક સ્થિતિ છે.

2. ડેટા સેન્ટરો ચૂંટણીનો મોટો મુદ્દો કેમ બન્યા?

AIના મોટા મોડેલ ચલાવવા માટે વિશાળ ડેટા સેન્ટરોની જરૂર પડે છે. આ કેન્દ્રોમાં હજારો સર્વર્સ સતત કાર્યરત રહે છે, જેના કારણે મોટા પ્રમાણમાં વીજળીનો વપરાશ થાય છે. સર્વર્સને ઠંડા રાખવા માટે પાણીની પણ જરૂર પડે છે. સ્થાનિક રહેવાસીઓને આશંકા છે કે ડેટા સેન્ટરોના કારણે વીજળીના બિલ વધી શકે છે, પાણીના સ્ત્રોતો પર દબાણ આવી શકે છે અને પર્યાવરણ પર અસર થઈ શકે છે.

5 નવેમ્બરના બિઝનેસ રિવ્યૂના અહેવાલ મુજબ, ડેટા સેન્ટરોના બાંધકામને ધીમું કરવા અથવા અટકાવવાની માંગ સાથે ઓછામાં ઓછી 21 ચૂંટણી સ્પર્ધાઓમાં લગભગ 9 કરોડ ડોલરનો જાહેરાત ખર્ચ થયો હતો. એક સર્વેમાં લગભગ બે તૃતીયાંશ અમેરિકન પુખ્ત વયના લોકોએ AIનો વિકાસ ખૂબ ઝડપથી થઈ રહ્યો હોવાનું કહ્યું હતું, જ્યારે લગભગ ત્રણ ચતુર્થાંશ લોકોએ પોતાના વિસ્તારમાં ડેટા સેન્ટરોનો વિરોધ કર્યો હતો. આ મુદ્દો હવે માત્ર ટેકનોલોજીનો નહીં, પરંતુ સ્થાનિક લોકોના ખર્ચ, રોજગાર અને પર્યાવરણ સાથે પણ જોડાઈ ગયો છે.

3. ટેક્સાસ, જ્યોર્જિયા અને ઓહિયોમાં શું બદલાઈ શકે?

ટેક્સાસમાં ડેમોક્રેટિક ઉમેદવાર જીના હિનોજોસાએ રિપબ્લિકન ગવર્નર ગ્રેગ એબોટને હરાવ્યા છે. હિનોજોસાએ ડેટા સેન્ટરોના પ્રોજેક્ટને મંજૂરી આપતાં પહેલાં સ્થાનિક રહેવાસીઓના હિત અને તેમની ભાગીદારીને મહત્ત્વ આપવાની વાત કરી હતી. જ્યોર્જિયામાં ગવર્નરપદે ચૂંટાયેલા કીશા લાન્સ બોટમ્સે પર્યાવરણ અને વીજળીના દરોની સમીક્ષા ન થાય ત્યાં સુધી નવા ડેટા સેન્ટરોના બાંધકામ પર કામચલાઉ રોકની તરફેણ કરી હતી. ઓહિયોમાં ગવર્નરપદે ચૂંટાયેલા એમી એક્ટને પણ ડેટા સેન્ટર કંપનીઓ વીજળી અને પાણીનો ખર્ચ પોતે ઉઠાવે તથા કામગીરીમાં પારદર્શિતા રાખે તેવી માંગ કરી હતી.

અહેવાલ મુજબ, ગોલ્ડમેન સૅક્સના અંદાજ પ્રમાણે જે અમેરિકન રાજ્યોમાં ડેટા સેન્ટરના વિકાસ પર નિયંત્રણો આવી શકે છે, ત્યાં દેશની અંદાજિત પ્રસ્તાવિત ડેટા સેન્ટર ક્ષમતાનો આશરે 45 ટકા હિસ્સો છે. તેમાં માત્ર ટેક્સાસનો હિસ્સો આશરે 25 ટકા છે. આનો અર્થ એ નથી કે આટલા પ્રોજેક્ટ રદ થઈ ગયા છે, પરંતુ મંજૂરીમાં વિલંબ અથવા કામચલાઉ પ્રતિબંધથી તેમના વિસ્તરણ પર અસર થઈ શકે છે. ચૂંટણી પરિણામો બાદ AI ઇન્ફ્રાસ્ટ્રક્ચર સાથે જોડાયેલી કેટલીક કંપનીઓના શેરમાં પણ ઘટાડો નોંધાયો હતો.

4. શું અમેરિકામાં AI પર પ્રતિબંધ લાગી શકે?

ડેમોક્રેટિક પાર્ટીની જીતનો અર્થ એવો નથી કે અમેરિકામાં AI પર સીધો પ્રતિબંધ લાગી જશે. જોકે, રાજ્ય અને સ્થાનિક સરકારો ડેટા સેન્ટરોની મંજૂરી, વીજળી અને પાણીના વપરાશ, પર્યાવરણીય નિયમો તથા ટેક્સમાં મળતી છૂટ અંગે કડક શરતો લાવી શકે છે. કોંગ્રેસમાં ડેમોક્રેટ્સની બહુમતીને કારણે AI કંપનીઓની કામગીરી અને નિયમો અંગે વધુ તપાસ તથા સુનાવણી પણ થઈ શકે છે.

બીજી તરફ, રાષ્ટ્રપતિ ડોનાલ્ડ ટ્રમ્પ AI ક્ષેત્રના વિકાસના સમર્થક (Donald Trump AI Policy) છે અને અમેરિકા ચીન સાથેની ટેકનોલોજીકલ સ્પર્ધામાં આગળ રહેવા માગે છે. રાષ્ટ્રપતિ પાસે કાયદા પર વીટો કરવાની સત્તા હોવાથી સંઘીય સ્તરે મોટા ફેરફારો સરળ નહીં હોય. તેથી આગામી સમયમાં મુખ્ય સવાલ AIને રોકવાનો નહીં, પરંતુ તેના વિકાસ માટે કઈ શરતો લાગુ કરવી અને ડેટા સેન્ટરોનો ખર્ચ કોણ ભોગવશે તેનો રહેશે. કંપનીઓએ હવે સ્થાનિક લોકોને રોજગાર, વીજળી અને પાણીના ખર્ચ તથા પર્યાવરણ પર થતી અસર અંગે જવાબ આપવો પડી શકે છે.

આ પણ વાંચો: વિરોધીઓને ઘેરવા AI ડીપફેકનો ભરપૂર ઉપયોગ; 80%થી વધુ જાહેરાતોમાં રિપબ્લિકન કેમ્પ આગળ

આ પણ વાંચો: માર્કેટ કેપમાં ₹1.08 લાખ કરોડનો જોરદાર ઉછાળો, Airtel-Infosysના રોકાણકારોને પણ મોટો ફાયદો

આ પણ વાંચો: AIથી વૈશ્વિક શાસન સુધીના મુદ્દે ચર્ચા, દિલ્હીમાં યોજાશે 12મો BRICS સંસદીય મંચ