Uttarpradesh News : ઉત્તર પ્રદેશના મુખ્યમંત્રી યોગી આદિત્યનાથે (CM Yogi)અયોધ્યામાં ભગવાન રામના દર્શન અને પૂજા કર્યા બાદ એક કાર્યક્રમમાં સંબોધન દરમિયાન ભૂતકાળની સ્થિતિનો ઉલ્લેખ કર્યો હતો. તેમણે કહ્યું કે એક સમય એવો હતો જ્યારે અયોધ્યામાં ‘જય શ્રી રામ’ (Jai Shri Ram)ના નારા લગાવવા પર પ્રતિબંધ હતો અને ભગવાન રામના ભક્તો પર લાઠીચાર્જ કરવાની સાથે ગોળીબાર પણ કરવામાં આવતો હતો. જોકે, આજે અયોધ્યામાં ભક્તોનું ખુલ્લા દિલથી સ્વાગત કરવામાં આવે છે.

અયોધ્યામાં રામભક્તોનું સ્વાગત થાય છે: યોગી

રવિવારે અયોધ્યા પ્રવાસના બીજા દિવસે મુખ્યમંત્રી યોગી આદિત્યનાથે (CM Yogi)હનુમાનગઢી અને રામ જન્મભૂમિ મંદિરમાં દર્શન-પૂજા કરી હતી. ત્યારબાદ તેમણે રામઘાટ હોલ્ટ નજીક આવેલી નિષાદ બસ્તીની મુલાકાત લીધી હતી. અહીં આયોજિત દિવાળી મિલન કાર્યક્રમમાં સ્વચ્છતા સાથે જોડાયેલા કર્મચારીઓને દિવાળીની ભેટો આપી હતી. તેમણે લોકો સાથે મુલાકાત કરી અને તેમની સાથે સેલ્ફી પણ લીધી હતી.

મીડિયા સાથે વાતચીત દરમિયાન યોગી આદિત્યનાથે કહ્યું કે પહેલાં અયોધ્યામાં ભગવાન રામના નામના નારા લગાવવા પર પણ પ્રતિબંધ હતો. રામભક્તો પર લાઠીઓ ચલાવવામાં આવતી હતી અને ગોળીબાર થતો હતો. પરિક્રમા કરવા પર પણ રોક લગાવવામાં આવતી હતી. પરંતુ હવે પરિસ્થિતિ બદલાઈ છે અને ભગવાન રામના ભક્તોનું અયોધ્યામાં સ્વાગત કરવામાં આવે છે.

શ્રદ્ધા અને અર્થતંત્રનો સંગમ બની અયોધ્યા

મુખ્યમંત્રી યોગીએ કહ્યું કે આજે અયોધ્યામાં કોઈની સાથે ભેદભાવ કરવામાં આવતો નથી. દરેક વ્યક્તિને ધાર્મિક કાર્યક્રમોમાં ભાગ લેવાની તક મળે છે. અગાઉ જ્યાં પરિક્રમા પર પ્રતિબંધ મૂકવામાં આવતો હતો, ત્યાં હવે પરિક્રમાને પ્રોત્સાહન આપવામાં આવે છે.

તેમણે વધુમાં જણાવ્યું કે આજે લોકો સરકારી યોજનાઓનો લાભ મેળવી રહ્યા છે. અયોધ્યા હવે માત્ર ધાર્મિક આસ્થાનું કેન્દ્ર જ નહીં, પરંતુ વિકાસ અને આર્થિક પ્રવૃત્તિઓનું પણ મહત્વનું કેન્દ્ર બની રહી છે. શ્રદ્ધા અને અર્થતંત્રનો આ સંગમ દેશ માટે પ્રેરણાનો નવો સ્ત્રોત બન્યો છે.

યોગીએ સંતો સાથે પણ કરી મુલાકાત

અયોધ્યા પ્રવાસ દરમિયાન મુખ્યમંત્રી યોગી આદિત્યનાથે (CM Yogi)અશોક સિંઘલ વોર્ડ, દિગંબર અખાડા, બડા ભક્તમાલ અને મણિરામ દાસ છાવણીની મુલાકાત લીધી હતી. આ સ્થળોએ તેમણે સંતો સાથે મુલાકાત કરી હતી. કારસેવકપુરમમાં પણ સંતો સાથે તેમની મુલાકાતનો કાર્યક્રમ નિર્ધારિત હતો.

30 લાખથી વધુ દીવાઓથી ઝળહળી અયોધ્યા

ઉલ્લેખનીય છે કે શનિવારે મુખ્યમંત્રી યોગીની ઉપસ્થિતિમાં અયોધ્યામાં 10મા દીપોત્સવની ભવ્ય ઉજવણી કરવામાં આવી હતી. આ દરમિયાન સરયુ નદીના કિનારે રામ કી પૈડી સહિત વિવિધ ઘાટ પર 30 લાખથી વધુ માટીના દીવાઓ પ્રગટાવવામાં આવ્યા હતા. આ સાથે અયોધ્યાએ દીપોત્સવમાં વધુ એક વિશ્વ રેકોર્ડ નોંધાવ્યો હતો.

દિવાળીના અવસરે રામ મંદિર (Ram Mandir)ને પણ આકર્ષક રોશનીથી શણગારવામાં આવ્યું હતું. સમગ્ર રામનગરી રંગબેરંગી લાઇટોથી ઝળહળી ઊઠી હતી. દીવાઓની રોશની સાથે આકાશમાં ફટાકડા અને ડ્રોન શોએ દીપોત્સવની (Ayodhya Deepotsav)ભવ્યતામાં વધારો કર્યો હતો.

આ પણ વાંચો: રામમંદિર શિલાન્યાસને આજે એક વર્ષ પૂર્ણ, અયોધ્યામાં ભવ્ય કાર્યક્રમોનું આયોજન

આ પણ વાંચો: આઈ લવ મુહમ્મદ પોસ્ટર બરેલી રમખાણોના વિવાદ પર સીએમ યોગીએ આપી આકરી પ્રતિક્રિયા

આ પણ વાંચો: રામમંદિરની સાથે અયોધ્યાની પણ કયા પલટ થશે, મુખ્યમંત્રી યોગી તૈયારીઓનું કરશે નિરીક્ષણ