Allahabad News : ભારતીય સેનાના સિપાહી રજત સિંહ(Rajat Singh) છેલ્લાં આઠ વર્ષથી રહસ્યમય રીતે લાપતા છે. અલ્હાબાદ હાઈકોર્ટે તાજેતરમાં કેન્દ્રીય તપાસ બ્યૂરો (CBI)ને 28 પંજાબ રેજિમેન્ટના સિપાહી રજત સિંહના લાપતા થવાના મામલાની તપાસ કરવાનો નિર્દેશ આપ્યો છે. રજત સિંહ 28 જુલાઈ, 2018થી લાપતા છે. આ મામલે હાઈકોર્ટ પણ ભાવુક થઈ ઊઠી હતી. કોર્ટે સાત વર્ષથી વધુ સમયથી પડતર ‘હેબિયસ કોર્પસ’ (બંદી પ્રત્યક્ષીકરણ) અરજીના નિકાલ પર વિચાર કરતા પહેલાં સૈનિકને શોધવાનો ‘એક છેલ્લો પ્રયાસ’ કરવા કહ્યું છે.

સિપાહી(Rajat Singh)ને છેલ્લે 28 જુલાઈ, 2018ના રોજ જોવામાં આવ્યો હતો

જસ્ટિસ અતુલ શ્રીધરન અને જસ્ટિસ અચલ સચદેવની ખંડપીઠે 4 નવેમ્બર, 2026ના રોજ આ નિર્દેશ જારી કર્યો. બેન્ચે નોંધ્યું કે વારંવાર થયેલી તપાસ અને અદાલતી કાર્યવાહી છતાં લાપતા સૈનિક રજત સિંહ અંગે કોઈ નક્કર માહિતી મળી શકી નથી. સિપાહી રજત સિંહ ઉત્તરાખંડના પિથોરાગઢમાં 28 પંજાબ રેજિમેન્ટમાં તૈનાત હતા, ત્યારે તેમને કથિત રીતે કર્નલ (નિવૃત્ત) એ.કે. દુબે દ્વારા ઉત્તર પ્રદેશના બરેલીમાં પ્રતિનિયુક્તિ પર મોકલવામાં આવ્યા હતા. આરોપ છે કે આ પ્રતિનિયુક્તિ નિયમો મુજબ ન હતી.

રજત સિંહને છેલ્લે 28 જુલાઈ, 2018ના રોજ બરેલીમાં ‘હેડક્વાર્ટર્સ, ઉત્તર ભારત એરિયા’ના ઓફિસર્સ મેસમાં જોવામાં આવ્યા હતા. ત્યારથી તેમના વિશે કોઈ માહિતી નથી. લાપતા સૈનિક(Missing Soldier)ના મામલે સેનાના અધિકારીઓની જવાબદારી પર પણ સવાલ ઊભા થયા છે.

પંજાબના પિતા લાપતા પુત્ર અંગે માગી રહ્યા છે જવાબ

પંજાબના હોશિયારપુર જિલ્લાના ડમોવાલ ગામના રહેવાસી રજત સિંહના પિતા ઉપદેશ સિંહ વર્ષોથી આ મામલે સંઘર્ષ કરી રહ્યા છે અને પુત્રના લાપતા થવા અંગે જવાબ માગી રહ્યા છે. આ ઘટના બાદ 30 જુલાઈ 2019ના રોજ બરેલી કેન્ટ પોલીસ સ્ટેશનમાં ભારતીય દંડ સંહિતા (IPC)ની કલમ 364 હેઠળ FIR નોંધવામાં આવી હતી. આ કલમ હત્યાના ઇરાદે અપહરણ કરવા સાથે સંબંધિત છે.

તપાસ દરમિયાન તપાસ અધિકારીએ બરેલીમાં મિલિટરી પોલીસની મદદ માગી હતી અને લાન્સ નાયક બલવંત સિંહને પૂછપરછ માટે ઉપલબ્ધ કરાવવા વિનંતી કરી હતી. જોકે, કથિત રીતે આ વિનંતીનો કોઈ જવાબ મળ્યો ન હતો અને તપાસમાં લાપતા સૈનિકનો પત્તો લાગી શક્યો ન હતો.

તપાસમાં કોઈ ખાસ પ્રગતિ ન થતાં પિતા ઉપદેશ સિંહે અલ્હાબાદ હાઈકોર્ટ(Allahabad High Court)ના તત્કાલીન મુખ્ય ન્યાયાધીશ ગોવિંદ માથુરને પત્ર લખીને ન્યાયિક હસ્તક્ષેપની માગ કરી. ત્યારબાદ હાઈકોર્ટે પિતાના પત્રને ‘સુઓ મોટો’ સંજ્ઞાન લઈને ‘હેબિયસ કોર્પસ'(Habeas Corpus) અરજી તરીકે નોંધ્યો. તેને ‘હેબિયસ કોર્પસ રિટ પિટિશન નંબર 919/2019’ તરીકે રજિસ્ટર્ડ કરવામાં આવી, જેનું શીર્ષક હતું – ‘ઇન રે: મિસિંગ સિપાહી રજત સિંહ, પુત્ર ઉપદેશ સિંહ’.

અસાધારણ રીતે મુખ્ય ન્યાયાધીશે રજાના દિવસે બેઠક યોજી

એક અસાધારણ ઘટનાક્રમમાં, તત્કાલીન મુખ્ય ન્યાયાધીશ ગોવિંદ માથુર અને જસ્ટિસ વિવેક વર્માની ખંડપીઠે 2 ઓક્ટોબર 2019 (ગાંધી જયંતી)ના રોજ રાષ્ટ્રીય રજાના દિવસે આ મામલાની સુનાવણી માટે વિશેષ બેઠક યોજી હતી.

તે સુનાવણી દરમિયાન કોર્ટે બરેલી કેન્ટ સ્થિત મિલિટરી પોલીસના કમાન્ડિંગ ઓફિસરને લાપતા સિપાહી સાથે જોડાયેલી તમામ જરૂરી માહિતી ઉપલબ્ધ કરાવવા નિર્દેશ આપ્યો હતો. ત્યારબાદ અનેક સુનાવણીઓ થઈ અને ઉત્તર પ્રદેશ પોલીસ અધિકારીઓ (જેમાં બરેલીના વરિષ્ઠ પોલીસ અધીક્ષક પણ સામેલ હતા)ને વારંવાર નિર્દેશ આપવામાં આવ્યા, પરંતુ તેમ છતાં તપાસ કોઈ નિષ્કર્ષ પર પહોંચી શકી નહીં.

હાઈકોર્ટે કહ્યું- ઘણો સમય વીતી ગયો

4 નવેમ્બર, 2026ના પોતાના તાજેતરના આદેશમાં હાઈકોર્ટે સૈનિકને શોધવામાં લાંબા સમયથી મળી રહેલી નિષ્ફળતા અંગે ચિંતા વ્યક્ત કરી. બેન્ચે ટિપ્પણી કરી કે જ્યારથી આ મામલો શરૂ થયો છે ત્યારથી ‘ઘણો સમય વીતી ચૂક્યો છે’ અને અનેક સુનાવણીઓ છતાં કોઈ નક્કર પરિણામ મળ્યું નથી. ન્યાયાધીશોએ નોંધ્યું કે રાજ્ય પોલીસ વર્ષોની તપાસ પછી પણ સિપાહી રજત સિંહને શોધવામાં કોઈ સફળતા મેળવી શકી નથી.

આ મામલો લાપતા વ્યક્તિના પિતા દ્વારા લખાયેલા પત્રના આધારે ‘સુઓ મોટો’ સંજ્ઞાન લઈને શરૂ કરવામાં આવ્યો હતો અને તે પણ આ કોર્ટના તત્કાલીન મુખ્ય ન્યાયાધીશ દ્વારા. આથી આ અદાલત આ અરજીનો અંતિમ નિકાલ કરતા પહેલાં એક છેલ્લો પ્રયાસ કરવો જરૂરી સમજે છે.

CBIને શોધવા કહ્યું

અલ્હાબાદ હાઈકોર્ટે CBIને આ લાપતા થવાના મામલાની તપાસ કરવા અને લાપતા સૈનિકને શોધવાનો પ્રયાસ કરવા કહ્યું છે. બેન્ચે એજન્સીને નિર્દેશ આપ્યો કે જો શક્ય હોય તો સિપાહી રજત સિંહને શોધી કાઢો અને તેમને કોર્ટ સમક્ષ રજૂ કરો. જો એજન્સી તેમને શોધવામાં અસમર્થ રહે, તો તેણે પોતાની તપાસ દરમિયાન લીધેલા પગલાંની વિગતો સાથેનો અહેવાલ સુપરત કરવો પડશે, જેથી હાઈકોર્ટ આગળના આદેશો પર વિચાર કરી શકે. આ તાજેતરનો ન્યાયિક હસ્તક્ષેપ આઠ વર્ષથી વધુ સમયથી વણઉકેલ્યા પડેલા મામલામાં મહત્ત્વપૂર્ણ ઘટનાક્રમ છે.

આ પણ વાંચો:પૂરગ્રસ્ત વિસ્તારોમાં ભારતીય સેના દ્વારા રેસ્ક્યૂ : વલસાડ, નવસારી અને અમદાવાદમાં ગોલ્ડન કટાર ડિવિઝનની ફ્લડ રિલીફ ટુકડીઓ તૈનાત
આ પણ વાંચો:યુદ્ધકાળમાં પાકિસ્તાની ડ્રોન ઘૂસણખોરી: ભારતીય સેનાની તીખી કાર્યવાહી
આ પણ વાંચો:બરફીલા પહાડોમાં આતંકીઓની શોધ, ભારતીય સેના સંપૂર્ણ તૈયારી સાથે મેદાનમાં