Mumbai News : મુંબઈમાં છઠ પૂજા (Chhath Puja)ના આયોજનને લઈને રાજકીય વિવાદ વકર્યો છે. એક તરફ મહારાષ્ટ્ર નવનિર્માણ સેના (MNS), કોંગ્રેસ અને ઉદ્ધવ ઠાકરે જૂથની શિવસેના (UBT) દરિયા અને નદી કિનારે છઠ પૂજાના આયોજનનો વિરોધ કરી રહી છે. બીજી તરફ, મુંબઈના વડાલા રેલવે સ્ટેશન પર ભોજપુરી ગીતો વગાડવાના મુદ્દે પણ રાજકીય ટકરાવ શરૂ થયો છે. આ વિવાદે મહારાષ્ટ્રમાં મરાઠી અને બિનમરાઠી રાજકારણને (Mumbai Chhath Puja Controversy)ફરી ચર્ચામાં લાવી દીધું છે.
વિપક્ષી પક્ષોનું કહેવું છે કે છઠ પૂજાના નામે દરિયાકિનારે જળ પ્રદૂષણ અને અવ્યવસ્થા ઊભી ન થવી જોઈએ. તેના બદલે ઉત્તર ભારતીય વિસ્તારોમાં કૃત્રિમ તળાવો બનાવીને પૂજાની વ્યવસ્થા કરવામાં આવે. જોકે, ભાજપ અને એકનાથ શિંદે જૂથની શિવસેનાએ આ વિરોધને તહેવારના મુદ્દે રાજકીય વિવાદ ઊભો કરવાનો પ્રયાસ ગણાવ્યો છે.
મુંબઈમાં છઠ પૂજા વિવાદ: કૃત્રિમ તળાવમાં પૂજાની માંગ
મુંબઈમાં છઠ પૂજા (Chhath Puja)ના આયોજનને લઈને MNS અને UBT શિવસેનાએ દરિયાકિનારા પર પૂજા યોજવા સામે સવાલો ઉઠાવ્યા છે. UBT નેતા અને BMCમાં વિપક્ષનાં નેતા કિશોરી પેડણેકરે જણાવ્યું કે છઠ પૂજા સામે તેમનો વિરોધ નથી, પરંતુ પર્યાવરણને નુકસાન ન થાય તે જરૂરી છે.
તેમણે ઉત્તર ભારતીય વિસ્તારોમાં કૃત્રિમ તળાવો બનાવવાની માંગ કરી છે. તેમનું કહેવું છે કે ગણેશોત્સવ દરમિયાન મુંબઈમાં અનેક કૃત્રિમ તળાવો બનાવવામાં આવે છે અને મૂર્તિઓનું વિસર્જન કરવામાં આવે છે. તેવી જ વ્યવસ્થા છઠ પૂજા માટે પણ થઈ શકે છે. તેમણે મુંબઈમાં જળ, વાયુ અને ધ્વનિ પ્રદૂષણને મંજૂરી ન આપવાની વાત કરી હતી.
વડાલા સ્ટેશન પર ભોજપુરી ગીતો વગાડવા સામે વિરોધ
છઠ પૂજાના વિવાદમાં મુંબઈના વડાલા રેલવે સ્ટેશન પર ભોજપુરી ગીતો (Bhojpuri Songs)વગાડવાનો મુદ્દો પણ જોડાયો છે. UBT શિવસેનાએ આ અંગે રેલવે વહીવટીતંત્રને ફરિયાદ કરી છે. પક્ષના નેતાઓનું કહેવું છે કે રેલવે સ્ટેશન મુસાફરોને ટ્રેનની માહિતી આપવા માટે છે, ગીતો વગાડવા માટે નહીં.
સંજય રાઉતે આ મુદ્દે કહ્યું કે ઉત્તર પ્રદેશમાં ચૂંટણી ચાલી રહી હોવાથી મુંબઈના રેલવે સ્ટેશનો પર હિન્દી અને ભોજપુરી ગીતો (Bhojpuri Songs)વગાડવામાં આવી રહ્યાં છે. તેમણે સવાલ કર્યો કે દિવાળી, ઈદ અને ક્રિસમસ જેવા તહેવારો દરમિયાન આવી વ્યવસ્થા કેમ કરવામાં આવતી નથી? જોકે, રેલવે વહીવટીતંત્રનું કહેવું છે કે રેલવે બોર્ડની સૂચના પ્રમાણે ઉત્તર ભારતીય મુસાફરોની સુવિધા માટે છઠ પૂજા (Chhath Puja)ને લગતી જાહેરાતો અને ગીતો વગાડવામાં આવી રહ્યાં છે.
શિંદે જૂથ અને ભાજપે વિપક્ષ પર સાધ્યું નિશાન
આ વિવાદ વચ્ચે ભાજપ અને શિંદે જૂથની શિવસેનાએ વિપક્ષ પર નિશાન સાધ્યું છે. શિંદે શિવસેનાના પ્રવક્તા આનંદ દુબેએ કહ્યું કે બાળાસાહેબ ઠાકરેએ છઠ પૂજાને પ્રોત્સાહન આપ્યું હતું, પરંતુ આજે તેમના રાજકીય વારસદારો જ હિન્દુ તહેવારનો વિરોધ કરી રહ્યા છે. તેમણે સવાલ કર્યો કે શું વિપક્ષ ઉત્તર પ્રદેશની ચૂંટણીને ધ્યાનમાં રાખીને આ મુદ્દે રાજકારણ કરી રહ્યો છે?
મહારાષ્ટ્રના નાણા રાજ્યમંત્રી આશિષ જયસ્વાલે પણ લોકોને એકબીજા સાથે લડવાને બદલે વિકસિત ભારત અને વિકસિત મહારાષ્ટ્ર માટે સાથે મળીને કામ કરવાની અપીલ કરી હતી. ગૃહ રાજ્યમંત્રી પંકજ ભોયરે કહ્યું કે દરેક સમાજને પોતાના તહેવારો ઉજવવાની છૂટ છે, પરંતુ ધ્વનિ પ્રદૂષણ સહિતના નિયમોનું પાલન કરવું જરૂરી છે.
હાઈકોર્ટના નિર્ણય બાદ ચોપાટી પર પણ વિવાદ
મુંબઈમાં છઠ પૂજાના આયોજનને લઈને ગિરગાંવ ચોપાટીનો મુદ્દો પણ ચર્ચામાં છે. બોમ્બે હાઈકોર્ટે ગિરગાંવ ચોપાટી પર છઠ પૂજા (Chhath Puja)યોજવાની માંગ અંગે તાત્કાલિક રાહત આપવાનો ઇનકાર કર્યો હતો. આ પછી MNS નેતા યશવંત કિલ્લેદારે જુહુ સહિત અન્ય ચોપાટીઓ પર પણ છઠ પૂજા યોજવાના પ્રયાસો સામે વિરોધ નોંધાવ્યો હતો.
તેમણે કહ્યું કે જ્યારે ગણેશ વિસર્જન માટે કૃત્રિમ તળાવોની વ્યવસ્થા થઈ શકે છે, ત્યારે છઠ પૂજા (Chhath Puja)માટે પણ આવી વ્યવસ્થા અપનાવવી જોઈએ. બીજી તરફ, શાસક પક્ષના નેતાઓનું કહેવું છે કે દરેક સમાજને પોતાના તહેવારો ઉજવવાનો અધિકાર છે. આમ, મુંબઈમાં છઠ પૂજાનો મુદ્દો હવે ધાર્મિક પરંપરા, પર્યાવરણ અને રાજકીય ખેંચતાણ વચ્ચે ચર્ચાનું કેન્દ્ર બન્યો છે.
