Surat News: સુરતના અશ્વિનીકુમાર વિસ્તારમાં આવેલા અટલજીનગરમાં થયેલી ચકચારી હત્યાના બનાવમાં સુરત ક્રાઈમ બ્રાન્ચને મોટી સફળતા મળી છે. રાજેન્દ્ર સુરેશભાઈ કુલી (Rajendra Kuli)ની તીક્ષ્ણ હથિયારોથી હત્યા કરવાના ગુનામાં સંડોવાયેલા ત્રણ આરોપીઓને ક્રાઈમ બ્રાન્ચે ગણતરીના સમયમાં ઝડપી પાડ્યા છે. જ્યારે અન્ય એક આરોપી હજુ પોલીસ પકડથી દૂર છે.

Rajendra Kuli : અટલજીનગરમાં જાહેર રસ્તા પર હુમલો

ગત 10 નવેમ્બર 2026ના રોજ સાંજે આશરે પાંચ વાગ્યાના અરસામાં અશ્વિનીકુમાર રોડ પર અટલજીનગરમાં શનિદેવ મંદિરની બાજુના જાહેર રસ્તા પર આ બનાવ બન્યો હતો. આરોપીઓ રાજુ રામકિશોર સરોજ, રમેશ સુભાષ બિંદ, સાહિલ સોનકર અને રાહુલ ગુપ્તાએ એકબીજાની મદદગારીથી રાજેન્દ્ર કુલી પર તીક્ષ્ણ હથિયારો વડે જીવલેણ હુમલો કર્યો હતો. ગંભીર ઇજાઓ થતાં રાજેન્દ્રનું મોત નીપજ્યું હતું.

પોલીસ કમિશનરની સૂચનાથી અલગ-અલગ ટીમો કામે લાગી

ઘટનાની ગંભીરતા જોતાં સુરત પોલીસ કમિશનરે આરોપીઓને સત્વરે ઝડપી પાડવા સૂચના આપી હતી. ક્રાઈમ બ્રાન્ચ (Surat Crime Branch)ની અલગ-અલગ ટીમો બનાવવામાં આવી હતી, જેમણે ઘટનાસ્થળની મુલાકાત લઈ આસપાસના સીસીટીવી ફૂટેજ (CCTV) તપાસ્યા હતા. ટેકનિકલ સર્વેલન્સ અને બાતમીદારોના નેટવર્કના આધારે આરોપીઓની શોધખોળ હાથ ધરાઈ હતી.

ત્રણ પકડાયા, એક વોન્ટેડ

ચોક્કસ બાતમીના આધારે ક્રાઈમ બ્રાન્ચે ત્રણ આરોપીઓને ઝડપી પાડ્યા હતા. ઝડપાયેલા આરોપીઓમાં 22 વર્ષીય રાજુ રામકિશોર સરોજ, 21 વર્ષીય રમેશ સુભાષભાઈ બિંદ અને 19 વર્ષીય સાહિલ પપ્પુભાઈ સોનકરનો સમાવેશ થાય છે. તમામ અશ્વિનીકુમાર રોડ, સુરતના રહેવાસી છે અને મૂળ ઉત્તર પ્રદેશના જૌનપુરના વતની છે. જ્યારે રાહુલ ગુપ્તા નામનો આરોપી હજુ ફરાર છે.

અશ્વિનીકુમાર પોલીસ સ્ટેશનમાં ગુનો નોંધાયો

આ મામલે અશ્વિનીકુમાર પોલીસ સ્ટેશન (Ashwinikumar Police Station)માં ગુનો નોંધી આગળની તપાસ હાથ ધરવામાં આવી છે. ફરાર આરોપી રાહુલ ગુપ્તા સુરતના અમરોલી આવાસ વિસ્તારમાં રહેતો હોવાનું ક્રાઈમ બ્રાન્ચના ધ્યાને આવ્યું છે, જેને ઝડપી પાડવા વધુ તપાસ અને શોધખોળ ચાલી રહી છે.

આ પણ વાંચો: જેતપુરમાં આડા સંબંધોનો ભયાનક અંજામ! ભત્રીજીઓએ ઝેર આપી, ગળે ટૂંપો દઈ સગી ફોઈની હત્યા કરી

આ પણ વાંચો: ઝારખંડમાં આદિવાસી મહિલાની ક્રૂર હત્યા, શરીરના અંગો કઢાઈમાં રાંધ્યાનો આરોપ

આ પણ વાંચો: કિશ્તવાડમાં 2 SPOની હત્યા: જંગલમાંથી મળ્યા મૃતદેહ, હથિયારો ગાયબ