Ahmedabad News/ અમદાવાદમાં ડ્રગ્સ સામે ઝોન-7 પોલીસની મોટી કાર્યવાહી: એક જ રાતમાં NDPSના બે કેસ, રૂ.54.59 લાખનો મુદ્દામાલ જપ્ત

અમદાવાદમાં ઝોન-7 પોલીસે ડ્રગ્સ સામે મોટી કાર્યવાહી કરી છે. બોડકદેવ અને સરખેજના બે NDPS કેસમાં ગાંજા તથા રૂ.53.51 લાખ રોકડ સહિત રૂ.54.59 લાખનો મુદ્દામાલ જપ્ત થયો.

Ahmedabad Top Stories Gujarat Breaking News
Ahmedabad Drugs Case: ઝોન-7 પોલીસની મોટી કાર્યવાહી, રૂ.54.59 લાખનો મુદ્દામાલ જપ્ત

Ahmedabad News: અમદાવાદ (Ahmedabad) શહેરમાં નશીલા પદાર્થોના ગેરકાયદેસર વેપાર સામે પોલીસની કાર્યવાહી તેજ બની છે. ‘નો ડ્રગ્સ ઇન અમદાવાદ સિટી’ અભિયાન હેઠળ ઝોન-7 પોલીસે એક જ રાતમાં (NDPS) ના બે અલગ-અલગ કેસમાં કાર્યવાહી કરી છે. પોલીસે બોડકદેવ અને સરખેજ વિસ્તારમાં દરોડા પાડી ગાંજાનો જથ્થો અને રોકડ સહિત કુલ રૂ.54.59 લાખથી વધુનો મુદ્દામાલ જપ્ત કર્યો છે.

ડ્રગ્સ સામે અમદાવાદ પોલીસની મોટી કાર્યવાહી

શહેરમાં યુવાધનને નશાની લતથી દૂર રાખવા અને નશીલા પદાર્થોના ગેરકાયદેસર વેપાર પર અંકુશ મેળવવા માટે અમદાવાદ પોલીસ દ્વારા ‘નો ડ્રગ્સ ઇન અમદાવાદ સિટી’ અભિયાન ચલાવવામાં આવી રહ્યું છે. આ અભિયાન અંતર્ગત ઝોન-7 પોલીસે મળેલી બાતમીના આધારે બોડકદેવ અને સરખેજ વિસ્તારમાં કાર્યવાહી કરી હતી.

બંને કેસમાં પોલીસે ગાંજાનો જથ્થો ઝડપી પાડ્યો છે. સરખેજના કેસમાં ગાંજાની સાથે રૂ.53.51 લાખની રોકડ મળી આવતા (Ahmedabad Drug News) માં આ કાર્યવાહી મહત્વની બની છે. પોલીસ દ્વારા હવે આ નાણાંના સ્ત્રોત અને આરોપીઓના નાણાકીય વ્યવહારો અંગે પણ તપાસ શરૂ કરવામાં આવી છે.

બોડકદેવમાં 131 ગ્રામથી વધુ ગાંજા સાથે આરોપી ઝડપાયો

Ahmedabad Drugs Case: ઝોન-7 પોલીસની મોટી કાર્યવાહી, રૂ.54.59 લાખનો મુદ્દામાલ જપ્ત
Ahmedabad Drugs Case: ઝોન-7 પોલીસની મોટી કાર્યવાહી, રૂ.54.59 લાખનો મુદ્દામાલ જપ્ત

ઝોન-7 પોલીસની પ્રથમ કાર્યવાહી બોડકદેવ પોલીસ સ્ટેશન વિસ્તારમાં કરવામાં આવી હતી. બાતમીના આધારે પોલીસે દરોડો પાડીને ગાંજાના જથ્થા સાથે રાજુ મંગાજી ભીલ નામના 23 વર્ષીય આરોપીને ઝડપી પાડ્યો હતો.

પોલીસના જણાવ્યા મુજબ આરોપી સરખેજ વિસ્તારમાં શાંતિપુરા પાસે સાણંદ ચોકડી નજીક સાબર હોટલની પાછળ આવેલા પતરાના ગોડાઉનમાં રહેતો હતો. તેનું મૂળ વતન રાજસ્થાનના ડુંગરપુર જિલ્લાના હડમતિયા ગામ હોવાનું સામે આવ્યું છે.

આ કાર્યવાહી દરમિયાન પોલીસે કુલ 131 ગ્રામ 220 મિલિગ્રામ ગાંજો કબજે કર્યો હતો. તેની કિંમત આશરે રૂ.6,561 હોવાનું જણાવાયું છે. આ મામલે બોડકદેવ પોલીસ સ્ટેશનમાં NDPS એક્ટની કલમ 8(C), 20(B)(2)(A) અને 29 હેઠળ ગુનો નોંધવામાં આવ્યો છે.

આ કેસમાં સુનીતાબેન છારા નામની મહિલા ફરાર હોવાનું જણાવાયું છે. તેને ઝડપી પાડવા માટે પોલીસ દ્વારા તપાસ હાથ ધરવામાં આવી છે.

સરખેજમાં ગાંજાની સાથે રૂ.53.51 લાખની રોકડ મળી

ઝોન-7  પોલીસની   (Police’s ) બીજી કાર્યવાહી સરખેજ પોલીસ સ્ટેશન વિસ્તારમાં કરવામાં આવી હતી. ચોક્કસ બાતમીના આધારે પોલીસે દરોડો પાડીને સુનીતા દીપકકુમાર રાઠોડ નામની 42 વર્ષીય મહિલાની ધરપકડ કરી હતી.

દરોડા દરમિયાન પોલીસને 2 કિલો 174 ગ્રામ ગાંજો મળી આવ્યો હતો. આ ગાંજાની અંદાજિત કિંમત રૂ.1,08,700 હોવાનું જણાવાયું છે. આ ઉપરાંત પ્લાસ્ટિકની થેલીઓ અને 28 ઝિપ બેગ પણ કબજે કરવામાં આવ્યા હતા.

જોકે, આ કાર્યવાહીમાં સૌથી મહત્વપૂર્ણ બાબત સ્થળ પરથી મળી આવેલી મોટી રોકડ રકમ હતી. પોલીસને ત્યાંથી રૂ.53,51,100 રોકડા મળી આવ્યા હતા. આમ, ગાંજો, રોકડ અને અન્ય સામગ્રી સહિત કુલ રૂ.54,59,800નો મુદ્દામાલ જપ્ત કરવામાં આવ્યો છે.

આ કેસમાં સરખેજ પોલીસ સ્ટેશનમાં NDPS એક્ટની કલમ 8(C), 20(B)(2)(B) અને 29 હેઠળ ગુનો નોંધાયો છે. આ કેસમાં દીપકભાઇ રાઠોડ નામનો અન્ય આરોપી હાલ ફરાર હોવાનું પોલીસે જણાવ્યું છે.

રૂ.53.51 લાખની રોકડના સ્ત્રોતની તપાસ

સરખેજમાંથી મળી આવેલી રૂ.53.51 લાખની રોકડને લઈને પોલીસ દ્વારા હવે તેના સ્ત્રોત અને નાણાકીય વ્યવહારોની તપાસ કરવામાં આવી રહી છે. આ માટે અલગ-અલગ ટીમો બનાવી તપાસ શરૂ કરવામાં આવી છે.

પોલીસ દ્વારા ગાંજાના જથ્થા અને મળી આવેલી રોકડ રકમ વચ્ચે કોઈ સંબંધ છે કે નહીં, આરોપીઓની આવકનો સ્ત્રોત શું છે અને તેમની પાસે કેટલી સંપત્તિ છે તે અંગે તપાસ કરવામાં આવી રહી છે.

તપાસ દરમિયાન જરૂરિયાત જણાશે તો આવકવેરા વિભાગ અને એન્ફોર્સમેન્ટ ડિરેક્ટોરેટની પણ મદદ લેવામાં આવી શકે છે. આરોપીઓની મિલકતો અને સંપત્તિ અંગેની તપાસ બાદ કાયદા મુજબ મિલકત જપ્તી સહિતના પગલાં અંગે પણ કાર્યવાહી થઈ શકે છે.

ડ્રગ્સના નેટવર્ક સામે પોલીસની કાર્યવાહી તેજ

ઝોન-7 પોલીસની આ બંને કાર્યવાહીથી અમદાવાદ શહેરમાં નશીલા પદાર્થોના ગેરકાયદેસર વેપાર સામે પોલીસની સક્રિયતા જોવા મળી છે. ખાસ કરીને સરખેજમાંથી મળી આવેલી મોટી રોકડ રકમને કારણે હવે પોલીસનું ધ્યાન માત્ર ગાંજાના જથ્થા સુધી મર્યાદિત નહીં રહે, પરંતુ તેની પાછળના નાણાકીય નેટવર્ક સુધી પહોંચવા પર પણ રહેશે.

પોલીસનું લક્ષ્ય માત્ર નશીલા પદાર્થો જપ્ત કરવાનું નહીં, પરંતુ ડ્રગ્સના સપ્લાયર્સ, પેડલર્સ અને તેમની પાછળ કાર્યરત સમગ્ર નેટવર્ક સુધી પહોંચવાનું છે. ‘નો ડ્રગ્સ ઇન અમદાવાદ સિટી’ અભિયાન હેઠળ આગામી દિવસોમાં પણ આવી કાર્યવાહી વધુ તેજ કરવામાં આવે તેવી શક્યતા છે.


આ પણ વાંચો:અમદાવાદમાં ડાર્ક વેબ અને ટેલિગ્રામ મારફતે ડ્રગ્સના વેપારનો પર્દાફાશ

આ પણ વાંચો:અમદાવાદમાં ‘નો ડ્રગ્સ’ અભિયાન હેઠળ એક જ રાતમાં 4 NDPS કેસ, લાખોની કિંમતનો નશીલો પદાર્થ જપ્ત

આ પણ વાંચો:અમદાવાદના રખિયાલમાં 3.36 ગ્રામ MD ડ્રગ્સ સાથે આધેડ ઝડપાયો, સપ્લાયરની શોધખોળ