New Delhi : પુણેથી નવી દિલ્હી જતી ફ્લાઈટમાં એક મહિલાએ હંગામો મચાવ્યો હતો. મહિલા તેના પતિ સાથે દિલ્હી જઈ રહી હતી ત્યારે તેણીના બે સહ-યાત્રીઓ, જેઓ ભાઈ અને બહેન હતા, સાથે ઉગ્ર બોલાચાલી થઈ હતી. આ દરમિયાન મહિલાએ પહેલા ભાઈ પર હુમલો કર્યો અને પછી બહેન સાથે પણ મારપીટ કરવા લાગી. આ ઘટના શનિવારની સવારે બની હતી, જ્યારે આરોપી મહિલા પુણેના લોહેગાંવ એરપોર્ટથી દિલ્હી જવાની ફ્લાઈટ લેવા જઈ રહી હતી.
એરપોર્ટ એડમિનિસ્ટ્રેશન અનુસાર, લડાઈ બાદ ફ્લાઈટના ક્રૂએ પરિસ્થિતિને સંભાળવાનો પ્રયાસ કર્યો અને CISFને બોલાવવામાં આવી. કોન્સ્ટેબલ પ્રિયંકા રેડ્ડી અને સોનિકા પાલ મામલો ઉકેલવા ફ્લાઈટમાં પહોંચ્યા, પરંતુ આરોપી મહિલાએ તેમની સાથે પણ આક્રમક વર્તન કર્યું. પરિસ્થિતિ ત્યારે વણસી ગઈ જ્યારે મહિલાએ કોન્સ્ટેબલ રેડ્ડીને થપ્પડ મારી અને પછી ગુસ્સામાં તેને કરડ્યો.
સીઆઈએસએફના અધિકારીઓએ દરમિયાનગીરી કરી અને કોઈક રીતે મહિલાને કાબૂમાં લીધી અને તેણી અને તેના પતિને ફ્લાઈટમાંથી ઉતારી દેવામાં આવ્યા. બાદમાં મહિલાને એરપોર્ટ પોલીસને સોંપવામાં આવી હતી અને તેની સામે કેસ નોંધવામાં આવ્યો હતો. વરિષ્ઠ નિરીક્ષક અજય સંકેશ્વરીના જણાવ્યા અનુસાર, મહિલાને એક નોટિસ સાથે મુક્ત કરવામાં આવી છે જેમાં કહેવામાં આવ્યું છે કે જ્યારે તપાસ અધિકારી બોલાવશે ત્યારે તેણે પૂછપરછ માટે હાજર થવું પડશે.
મહિલા ગૃહિણી છે, જ્યારે તેનો પતિ પૂણેમાં સોફ્ટવેર એન્જિનિયર તરીકે કામ કરે છે. બંને એક સંબંધીના અંતિમ સંસ્કારમાં સામેલ થવા માટે દિલ્હી જઈ રહ્યા હતા. સીઆઈએસએફ અધિકારીના જણાવ્યા અનુસાર, મહિલા ઊંડા ડિપ્રેશનમાં હોવાનું જણાયું હતું અને સહ-યાત્રીઓ સાથે ઝઘડો થતાં પાયલટે તેની સાથે ઉડાન ભરવાનો ઇનકાર કર્યો હતો. આ પછી એરલાઈને સીઆઈએસએફની મદદ લેવી પડી, પરંતુ મહિલાનું આક્રમક વલણ ચાલુ રહ્યું. જે ભાઈ-બહેન સાથે મહિલાની લડાઈ થઈ હતી તેણે દિલ્હીની યાત્રા પૂરી કરી. કેસની તપાસ દરમિયાન તેમનું નિવેદન નોંધવામાં આવશે.
આ પણ વાંચો:પશ્ચિમ બંગાળના ભૂતપૂર્વ મુખ્ય પ્રધાન બુદ્ધદેવ ભટ્ટાચાર્યનું 80 વર્ષે થયું નિધન
