Sabarkantha News: વડાલી તાલુકાના હાથયવા કંપામાં સાયબર ઠગો (Cyber Fraud) એ ફરી એકવાર માથું ઊંચક્યું છે. ગત ગુરુવારે રાત્રિના 10થી 11 વાગ્યા દરમિયાન, ગામના પટેલ નરસિંહભાઈના બેંક ખાતામાંથી ₹9900ની આઠ ટ્રાન્ઝેક્શનમાં કુલ ₹84000 ઉપડી જતાં ખળભળાટ મચી ગયો છે. નરસિંહભાઈના મોબાઈલ પર એકાઉન્ટ (Account) માંથી પૈસા કપાયાના મેસેજ આવતા જ તેમને પોતાની સાથે સાયબર ફ્રોડ થયું હોવાની જાણ થઈ હતી.
પ્રાપ્ત વિગતો મુજબ, ગુરુવારે રાત્રે નરસિંહભાઈના મોબાઈલ પર અચાનક OTP આવવાના શરૂ થયા હતા. તેમણે કોઈ ઓનલાઈન ટ્રાન્ઝેક્શન ન કર્યું હોવા છતાં, ગણતરીની જ મિનિટોમાં તેમના બેંક ખાતામાંથી ₹9900ના આઠ ટુકડામાં કુલ ₹84000થી વધુ ઉપડી ગયા હતા. ખાતામાંથી પૈસા કપાયાના મેસેજ આવતા જ નરસિંહભાઈ ચોંકી ઉઠ્યા હતા અને તેમને છેતરપિંડીનો ભોગ બન્યા હોવાનું સમજાયું હતું.
આ ગંભીર સાયબર ગુના અંગે તાત્કાલિક પગલાં લેતા, નરસિંહભાઈએ સાયબર ક્રાઈમમાં લેખિત ફરિયાદ નોંધાવી હતી અને વડાલી પોલીસને પણ જાણ કરી હતી. પોલીસે આ મામલે તપાસનો ધમધમાટ શરૂ કર્યો છે. જોકે, ગ્રામીણ વિસ્તારોમાં સાયબર ફ્રોડના કિસ્સાઓ સતત વધી રહ્યા છે, જે ચિંતાનો વિષય છે.
આ ઘટના ફરી એકવાર બેંક ખાતાધારકો માટે લાલબત્તી સમાન છે. કોઈપણ અજાણ્યા નંબર પરથી આવતા OTP, લિંક કે શંકાસ્પદ મેસેજ પર ધ્યાન ન આપવા અને પોતાની બેંકિંગ વિગતો કોઈની સાથે શેર ન કરવા પોલીસ દ્વારા વારંવાર અપીલ કરવામાં આવે છે. સાયબર ઠગો નવી નવી મોડસ ઓપરેન્ડી અપનાવી રહ્યા હોવાથી, જનતાએ અત્યંત સાવચેત રહેવાની અને આવા ફ્રોડથી બચવા ડિજિટલ સાક્ષરતા કેળવવાની તાતી જરૂર છે.
આ પણ વાંચો: PM મોદીએ સાબર ડેરી મિલ્ક પાવડર પ્લાન્ટનું કર્યું ઉદ્ઘાટન
આ પણ વાંચો: સાબર ડેરી ચીઝ પ્લાન્ટ: સાબરકાંઠાના પશુપાલકોને વાર્ષિક રૂ. 700 કરોડની વધારાની આવક થશે
