Banaskantha News: બનાસકાંઠા જિલ્લામાં ભારે વરસાદે તબાહી મચાવી છે, જેના કારણે પાલનપુર-મહેસાણા હાઇવે પર પાણી ભરાતાં વાહનોની કિલોમીટરો સુધી લાંબી લાઇનો લાગી છે. વડગામ પંથકમાં 9 ઇંચ જેટલો ભારે વરસાદ ખાબકતાં ખેરાલુ-વડગામ હાઇવે સહિત અનેક માર્ગો પાણીમાં ગરકાવ થયા છે, જેના કારણે વાહનચાલકોને ભારે મુશ્કેલીનો સામનો કરવો પડી રહ્યો છે.
પાલનપુર-મહેસાણા હાઇવે પર પાણી ભરાતાં વાહનોનો ખડકલો થયો છે. પીલુચા નજીક નેશનલ હાઇવે પર પાણી નિકાલની વ્યવસ્થાના અભાવે રસ્તો બંધ થયો છે, જેના કારણે વાહનચાલકો અટવાયા છે. વડગામથી ખેરાલુને જોડતો મુખ્ય માર્ગ પણ પાણીમાં ડૂબી ગયો છે, જેના લીધે ટ્રાફિક જામની સ્થિતિ સર્જાઈ છે.
ભારે વરસાદના પગલે જિલ્લાના 20 ગામોનો બાહ્ય વિશ્વ સાથેનો સંપર્ક તૂટી ગયો છે. કોઝવે અને રસ્તાઓ પર પાણી ભરાતાં અનાપુર, માંડલ, કુંડી, વાસડા, ડેટા, ઋણી, નેગાળા, ગોળીયા અને રવિયા સહિતના ગામોનો સંપર્ક કપાઈ ગયો છે. ધાનેરા પંથકમાં પણ અનેક માર્ગો બંધ થયા છે, જેના કારણે સ્થાનિક લોકોને મુશ્કેલીનો સામનો કરવો પડી રહ્યો છે.
વરસાદની આફતને પહોંચી વળવા વહીવટી તંત્ર દ્વારા રાહત અને બચાવ કામગીરી શરૂ કરવામાં આવી છે. જોકે, પાણી ભરાયેલા રસ્તાઓ અને સંપર્ક વિહોણા ગામોને કારણે રાહત કામગીરીમાં પણ મુશ્કેલીઓ ઉભી થઈ રહી છે. જિલ્લામાં વરસાદનું જોર યથાવત રહેવાની આગાહી હોવાથી, વહીવટી તંત્રે લોકોને સુરક્ષિત સ્થળોએ રહેવા અને જરૂરી સાવચેતી રાખવા અપીલ કરી છે.
આ પણ વાંચો: હવામાન વિભાગની આગાહી, 2 ઓગસ્ટથી ફરી વરસાદી સિસ્ટમ સક્રિય થતા ભારે વરસાદનું જોર રહેશે
આ પણ વાંચો:આજે સવારથી ખેડા જિલ્લામાં પડ્યો 3.68 ઇંચ વરસાદ, જનજીવન થયું પ્રભાવિત
આ પણ વાંચો:ગુજરાતમાં થશે જળબંબાકાર, ભારેથી અતિ ભારે વરસાદ પાડવાની આગાહી
