Patan News : પાટણ જિલ્લાના રૂની ગામ પાસે તાજેતરમાં જ એક ચોંકાવનારી ઘટના સામે આવી છે. જિલ્લાની સ્પેશિયલ ઓપરેશન ગ્રુપ (SOG)ની ટીમે રાજધાની ટ્રાવેલ્સની બસમાંથી મોટી માત્રામાં શંકાસ્પદ ઘીનો જથ્થો ઝડપી પાડ્યો છે. આ ઘીના 105 ડબ્બા હતા, જેની કિંમત અંદાજે 4 લાખ રૂપિયાથી વધુ હોવાનું અનુમાન છે.
પાટણના નાયબ પોલીસ અધિક્ષક કે. કે. પંડ્યા અનુસાર, આ ઘીનો જથ્થો પાટણથી મુંબઈ મોકલવામાં આવી રહ્યો હતો, પરંતુ SOGની સતર્કતાના કારણે તે પહેલાં જ પકડાઈ ગયો. પોલીસને શંકા છે કે આ ઘીમાં ભેળસેળ કરવામાં આવી છે, જે લોકોના સ્વાસ્થ્ય માટે હાનિકારક હોઈ શકે છે. આ મામલે SOGએ 7 વેપારીઓને પૂછપરછ માટે અટકાયતમાં લીધા છે.
રાજધાની ટ્રાવેલ્સની બસમાંથી આ પહેલાં પણ ભેળસેળવાળા ઘીના ડબ્બા મળી આવ્યા હતા, જેના કારણે ટ્રાવેલ્સની કામગીરી પર અનેક સવાલો ઊભા થયા છે. વારંવાર આવી ઘટનાઓ બનવાથી ટ્રાવેલ્સની પ્રતિષ્ઠાને પણ નુકસાન થઈ રહ્યું છે.
આ ઘટના બાદ પાટણના સ્થાનિક લોકોમાં ચિંતાનો માહોલ છે. તેઓ ભેળસેળવાળા ખોરાકના વેચાણ સામે કડક કાર્યવાહીની માંગ કરી રહ્યા છે. જિલ્લાના આરોગ્ય વિભાગે પણ આ મામલે તપાસ શરૂ કરી છે અને ઘીના નમૂના પરીક્ષણ માટે લેબોરેટરીમાં મોકલવામાં આવ્યા છે. પોલીસ આ કેસની ગંભીરતાથી તપાસ કરી રહી છે અને ભેળસેળવાળા ઘીના રેકેટમાં સંડોવાયેલા તમામ લોકો સામે કડક પગલાં લેવાની ખાતરી આપી છે.
@ Pravin Dargi
આ પણ વાંચો: પાટણ SOG અને ફૂડ વિભાગની સંયુક્ત કાર્યવાહી! નકલી ઘી બાદ નકલી તેલ જપ્ત કર્યુ
આ પણ વાંચો: દિવાળીમાં ઝેર પીરસવાની તૈયારી, નકલી માવો, ઘી અને પનીર કેમિકલ વડે બનતું હતું; લાખોનો માલ કબજે કર્યો હતો
આ પણ વાંચો: દિવાળીના તહેવારમાં જ કડી અને ડીસામાં હજારો કિલો શંકાસ્પદ ઘી-તેલ ઝડપાયું, મહેસાણામાં પનીરનો કરાયો નાશ
