Ahmedabad Bhopal Underpass Construction: અમદાવાદ શહેરના પશ્ચિમ વિસ્તારમાં આવેલા બોપલના રસ્તાઓ પર અત્યારે સ્થાનિક રહીશો માટે પસાર થવું મુશ્કેલ બન્યું છે. બોપલ અંડરપાસની ગોકળગતિએ ચાલતી કામગીરી હવે લોકો માટે માથાનો દુખાવો બની ગઈ છે. આ પ્રોજેક્ટને કારણે માત્ર વાહનચાલકો જ નહીં, પણ સ્કૂલે જતા માસૂમ બાળકો અને સિનિયર સિટીઝનો પણ ભારે હાલાકી વેઠી રહ્યા છે.
200થી વધુ સોસાયટીઓનો સંપર્ક મુશ્કેલ
બોપલ અને આસપાસની અંદાજે 200થી વધુ સોસાયટીઓના હજારો રહીશો આ અંડરપાસની કામગીરીને કારણે પ્રભાવિત થયા છે. ડાયવર્ઝન અને સાંકડા રસ્તાઓને લીધે કલાકો સુધી ટ્રાફિક જામની સમસ્યા સર્જાય છે. સૌથી વધુ મુશ્કેલી સ્કૂલ બસો અને વાલીઓને પડી રહી છે, કારણ કે બાળકોને સમયસર સ્કૂલે પહોંચાડવા હવે એક મોટો પડકાર બની ગયો છે.
સ્ટ્રીટ લાઈટો પણ ગુલ
સ્થાનિકોનો આક્ષેપ છે કે કામગીરીના સ્થળે પૂરતી વ્યવસ્થા નથી. રાત્રિના સમયે આ વિસ્તારમાં સ્ટ્રીટ લાઈટો બંધ રહેતી હોવાથી અંધારામાં અકસ્માત થવાની પૂરેપૂરી શક્યતા છે. અધૂરા ખોદકામ અને ઉડતી ધૂળને કારણે લોકોના સ્વાસ્થ્ય પર પણ માઠી અસર પડી રહી છે.
હજુ કેટલો સમય લાગશે?
સૌથી ચોંકાવનારી વિગત એ છે કે આ અંડરપાસની કામગીરી હજુ આગામી એક થી બે વર્ષ સુધી ચાલે તેવી શક્યતા છે. લાંબા સમયથી ચાલી રહેલા આ પ્રોજેક્ટમાં વહીવટી તંત્રની ઉદાસીનતા સ્પષ્ટ દેખાઈ રહી છે.
Bhopal : સ્થાનિક નેતાઓ સામે જનતાનો રોષ
બોપલના રહીશોમાં સ્થાનિક નેતાઓ અને કોર્પોરેટરો સામે ભારે રોષ જોવા મળી રહ્યો છે. લોકોનું કહેવું છે કે ચૂંટણી સમયે મત માંગવા આવતા નેતાઓ અત્યારે આટલી મોટી સમસ્યા હોવા છતાં ડોકિયું પણ કરતા નથી. રજૂઆતો કરવા છતાં નક્કર પરિણામ ન મળતા લોકોમાં હવે આંદોલનના સૂર ઉઠી રહ્યા છે.
