Ahmedabad News: શહેરમાં બેઠા રહીને વિદેશી નાગરિકોને નિશાન બનાવતી સાયબર ઠગાઈનો નરોડા પોલીસે પર્દાફાશ કર્યો છે. હંસપુરા રાજચંદ્ર સર્કલ નજીક આવેલા સાહિત્ય આર્કેડની દુકાન નંબર 112માંથી કથિત બોગસ કોલ સેન્ટર (Ahmedabad Fake Call Centre) ઝડપાયું છે. પોલીસના જણાવ્યા મુજબ અહીંથી અમેરિકન નાગરિકોને લોન સેટલમેન્ટના નામે સંપર્ક કરવામાં આવતો હતો.

પોલીસે દરોડા દરમિયાન 2 યુવતી અને 5 યુવક સહિત કુલ 7 લોકોને ઝડપી લીધા છે. પ્રાથમિક તપાસમાં આ ગેંગ છેલ્લા આશરે પાંચથી છ મહિનાથી સક્રિય હોવાની માહિતી સામે આવી છે.

પોલીસની બાતમી બાદ દરોડો

નરોડા પોલીસને હંસપુરા વિસ્તારમાં ગેરકાયદેસર કોલ સેન્ટર (Ahmedabad Fake Call Centre) ચાલતું હોવાની બાતમી મળી હતી. માહિતીના આધારે પોલીસે સાહિત્ય આર્કેડની દુકાન નંબર 112માં દરોડો પાડ્યો હતો. દરોડા દરમિયાન કેટલાક યુવક-યુવતીઓ લેપટોપ અને હેડફોનની મદદથી વિદેશી નાગરિકો સાથે સંપર્ક કરતા હોવાનું પોલીસને મળ્યું હતું. તપાસ બાદ પોલીસે સાત વ્યક્તિઓને ઝડપી કાર્યવાહી હાથ ધરી હતી.

અમેરિકન નાગરિકોને કેવી રીતે બનાવાતા શિકાર?

પોલીસ તપાસ મુજબ આ ગેંગનો મુખ્ય સૂત્રધાર હોવાનું જણાવાતા જીગેશ ગૌરવભાઈ ઝાલાહર દ્વારા અમેરિકન નાગરિકોને લગતો લોન સંબંધિત ડેટા મેળવવામાં આવતો હતો. આ પછી કોલ સેન્ટર (Ahmedabad Fake Call Centre)માં કામ કરતા લોકો અમેરિકન બેંક અથવા કાયદાકીય પ્રતિનિધિ તરીકે ઓળખ આપી ગ્રાહકોનો સંપર્ક કરતા હોવાનો પોલીસનો આરોપ છે.

અમેરિકન નાગરિકોને તેમની બેંક લોન ઓછી રકમમાં સેટલ કરાવવાની ઓફર આપવામાં આવતી હતી. ત્યારબાદ કથિત રીતે ઈ-મેલ અને અન્ય ડિજિટલ માધ્યમથી સંપર્ક કરી તેમની પાસેથી ક્રેડિટ કાર્ડ તથા અન્ય નાણાકીય માહિતી મેળવવામાં આવતી હતી. પોલીસના જણાવ્યા મુજબ ત્યારબાદ વેન્ડરોની મદદથી નાણાં ઉપાડવામાં આવતા હતા.

200થી વધુ અમેરિકન નાગરિકો ભોગ બન્યા હોવાનો પોલીસનો દાવો

પ્રાથમિક તપાસમાં 200થી વધુ અમેરિકન નાગરિકો સાથે આ રીતે સંપર્ક અને છેતરપિંડી થઈ હોવાની માહિતી સામે આવી છે. પોલીસના જણાવ્યા મુજબ અત્યાર સુધીની તપાસમાં રૂ. 38 લાખથી વધુની કથિત છેતરપિંડી સામે આવી છે. જોકે, સમગ્ર નાણાકીય વ્યવહાર અને ભોગ બનેલા લોકોની ચોક્કસ સંખ્યા અંગે વધુ તપાસ ચાલી રહી છે.

Ahmedabad Fake Call Centre: 10 લાખ અમેરિકનોને મેસેજ મોકલ્યાનો ખુલાસો

આ કેસમાં સૌથી મહત્વની બાબતોમાંની એક એ છે કે “છેલ્લા પાંચથી છ મહિનામાં આ ગેંગ દ્વારા અંદાજે 10 લાખ અમેરિકન નાગરિકોને મેસેજ મોકલવામાં આવ્યા હોવાની માહિતી પોલીસ તપાસમાં સામે આવી છે. ગેંગ કથિત રીતે સીધા બેંક ખાતામાં નાણાં મેળવવાને બદલે ક્રિપ્ટોકરન્સીનો ઉપયોગ કરતી હતી.”

Bitcoin અને Telegram મારફતે નાણાંનો વ્યવહાર

પોલીસ તપાસ મુજબ અમેરિકન નાગરિકો પાસેથી મેળવવામાં આવેલા નાણાંમાંથી આશરે 50 ટકા હિસ્સો કથિત રીતે એક ‘ટ્રસ્ટ વોલેટ’માં Bitcoin/ક્રિપ્ટોકરન્સીના સ્વરૂપમાં રાખવામાં આવતો હતો.ત્યારબાદ Telegram ગ્રુપ્સ મારફતે ક્રિપ્ટોકરન્સીને ભારતીય ચલણમાં બદલવાની પ્રક્રિયા કરવામાં આવતી હોવાની પોલીસને શંકા છે.

ત્યારબાદ આંગડિયા મારફતે રોકડ અમદાવાદ લાવવામાં આવતી હોવાનો પણ તપાસમાં ઉલ્લેખ થયો છે. હવે પોલીસ આ સમગ્ર ક્રિપ્ટો ટ્રાન્ઝેક્શન, વોલેટ અને Telegram નેટવર્કની કડીઓ તપાસી રહી છે.

Ahmedabad Fake Call Centre: કર્મચારીઓને 10 હજાર રૂપિયાનો પગાર?

પોલીસના જણાવ્યા પ્રમાણે “મુખ્ય સૂત્રધાર દ્વારા અન્ય લોકોને આ ગેરકાયદેસર પ્રવૃત્તિમાં કામે રાખવામાં આવ્યા હતા અને તેમને આશરે રૂ. 10 હજાર માસિક પગાર આપવામાં આવતો હતો. હાલ પોલીસ એ પણ તપાસ કરી રહી છે કે આ લોકોની ભૂમિકા કેટલી હતી અને તેમને સમગ્ર ગેરકાયદેસર પ્રવૃત્તિની જાણકારી કેટલી હતી.”

21 ઈલેક્ટ્રોનિક સાધનો સહિત મુદ્દામાલ જપ્ત

દરોડા દરમિયાન નરોડા પોલીસે કુલ 21 ઈલેક્ટ્રોનિક સાધનો કબજે કર્યા છે. તેમાં:

• 1 લેપટોપ

• 1 ડેસ્કટોપ

• 8 મોબાઈલ ફોન

• અન્ય ઈલેક્ટ્રોનિક સાધનો

સહિત કુલ આશરે રૂ. 2.60 લાખનો મુદ્દામાલ જપ્ત કરવામાં આવ્યો હોવાનું સામે આવ્યું છે.

Ahmedabad Fake Call Centre: હવે ક્રિપ્ટો વોલેટ અને Telegram નેટવર્કની તપાસ

પોલીસ હવે માત્ર કોલ સેન્ટર (Ahmedabad Fake Call Centre) સુધી મર્યાદિત તપાસ ન રાખી આ સમગ્ર નેટવર્કની પાછળ કોણ છે, અમેરિકન નાગરિકોનો ડેટા ક્યાંથી મેળવવામાં આવ્યો, ક્રિપ્ટોકરન્સી કયા વોલેટમાં ટ્રાન્સફર થઈ અને નાણાંની અંતિમ કડી ક્યાં સુધી પહોંચે છે તેની તપાસ કરી રહી છે. આ કેસમાં વધુ લોકોની સંડોવણી છે કે નહીં અને અત્યાર સુધીમાં કુલ કેટલા અમેરિકન નાગરિકોને આ ગેંગે નિશાન બનાવ્યા છે તે અંગે પણ તપાસ આગળ વધી રહી છે.

અમદાવાદમાં ચાલતા આ કથિત બોગસ કોલ સેન્ટર (Ahmedabad Fake Call Centre)ના પર્દાફાશ બાદ સાયબર ક્રાઈમ (Cyber ​​Crime)ના આંતરરાષ્ટ્રીય નેટવર્ક અંગે અનેક સવાલો ઉભા થયા છે. નરોડા પોલીસની તપાસ આગળ વધતા આ કેસમાં વધુ ખુલાસા થવાની શક્યતા છે.

આ પણ વાંચો: અમદાવાદમાં ફાર્મ હાઉસમાં ચાલતું કોલ સેન્ટર ઝડપાયું

આ પણ વાંચો: અમદાવાદમાં સાયબર ક્રાઈમે ઝડપ્યું કોલ સેન્ટર, અમેરિકન નાગરિકોને લોન અપાવવાના બહાને થતી હતી છેતરપિંડી

આ પણ વાંચો: અમદાવાદ સાયબર ક્રાઇમે વધુ એક કોલસેન્ટર ઝડપ્યું