ભારતીય ક્રિકેટ કંટ્રોલ બોર્ડ (BCCI)ના સેક્રેટરી જય શાહે પુષ્ટિ કરી છે કે ઈન્ડિયન પ્રીમિયર લીગ (IPL-2024) વિદેશમાં શિફ્ટ કરવામાં આવશે નહીં. શનિવારે ભારતના ચૂંટણી પંચે સામાન્ય ચૂંટણીની તારીખોની જાહેરાત કરી હતી. આ પછી, BCCI સચિવ જય શાહ અને IPL અધ્યક્ષ અરુણ ધૂમલે પુષ્ટિ કરી કે આગામી IPL સિઝનની તમામ મેચો તેમના દેશમાં રમાશે. તમને જણાવી દઈએ કે ચૂંટણીના કારણે આઈપીએલ 2024ની 21 મેચોના શેડ્યૂલની જાહેરાત કરવામાં આવી હતી, જે 7 એપ્રિલ સુધી રમાવવાની છે. હવે ટુર્નામેન્ટનું બાકીનું શેડ્યૂલ પણ ટૂંક સમયમાં જાહેર કરવામાં આવે તેવી શક્યતા છે.
જય શાહે નિવેદન આપ્યુ
બીસીસીઆઈના સચિવ જય શાહે (jay shah) આઈપીએલને વિદેશમાં સ્થાનાંતરિત કરવાની કોઈપણ અટકળોને નકારી કાઢી હતી અને ‘ક્રિકબઝ’ને સ્પષ્ટતા કરી હતી કે સમગ્ર લીગ ભારતમાં જ આયોજિત કરવામાં આવશે. એવા અહેવાલો હતા કે કેટલીક IPL ટીમોએ આગામી ચૂંટણીઓને કારણે મેચો શિફ્ટ કરવાની વિનંતી કરી હતી અને એવો દાવો પણ કરવામાં આવ્યો હતો કે BCCI સભ્યો UAEમાં IPLના બીજા તબક્કાનું આયોજન કરવાની શક્યતાઓ શોધી રહ્યા છે. જો કે શાહના નિવેદનથી આ અટકળો પર પૂર્ણવિરામ મુકાઈ ગયું છે. હવે બાકીનું શિડ્યુલ ક્યારે જાહેર થશે તે જોવું રહ્યું.
આઈપીએલના ચેરમેને પણ સમર્થન આપ્યું હતું
આઈપીએલના અધ્યક્ષ અરુણ ધૂમલે (Arun Dhumal) પણ આ વાતની પુષ્ટિ કરી છે કે ટૂર્નામેન્ટ સંપૂર્ણ રીતે ભારતમાં જ યોજાશે. ધૂમલે પીટીઆઈને કહ્યું, ‘આઈપીએલ ક્યાંય શિફ્ટ થઈ રહી નથી. બાકીનો કાર્યક્રમ અમે ટૂંક સમયમાં જાહેર કરીશું. પીટીઆઈ સાથેની અગાઉની વાતચીતમાં, બીસીસીઆઈના સચિવ જય શાહે સ્પષ્ટપણે કહ્યું હતું કે આખી ટુર્નામેન્ટ ભારતમાં જ યોજાશે, જેમ કે ગત લોકસભા ચૂંટણી વર્ષ 2019માં પણ થયું હતું. તેઓ માત્ર ચૂંટણી પંચ દ્વારા ચૂંટણીની તારીખો જાહેર કરવાની રાહ જોઈ રહ્યા હતા.
ટુર્નામેન્ટ 22મી માર્ચથી શરૂ થશે
આઈપીએલ 2024 22મી માર્ચથી શરૂ થઈ રહી છે. બીસીસીઆઈએ તેનું શેડ્યુલ જાહેર કરી દીધું છે. જો કે, 7 એપ્રિલ સુધી યોજાનારી પ્રથમ 21 મેચોનું જ શિડ્યુલ જાહેર કરવામાં આવ્યું છે. આ આગામી ટુર્નામેન્ટની શરૂઆતની મેચ ડિફેન્ડિંગ ચેમ્પિયન ચેન્નઈ સુપર કિંગ્સ અને રોયલ ચેલેન્જર્સ બેંગ્લોર વચ્ચે થવાની છે. તે જ સમયે, 7મી એપ્રિલે યોજાનારી પ્રથમ તબક્કાની છેલ્લી મેચ લખનૌ સુપર જાયન્ટ્સ અને ગુજરાત ટાઇટન્સ વચ્ચે લખનૌમાં રમાશે.
