Vadodara News : સેન્ટ્રલ બ્યુરો ઓફ ઇન્વેસ્ટિગેશન (CBI) એ રેલ્વે વિભાગીય પરીક્ષાઓ સંબંધિત ભ્રષ્ટાચાર કૌભાંડના સંબંધમાં પશ્ચિમ રેલ્વેના ત્રણ વરિષ્ઠ અધિકારીઓ અને એક ખાનગી વ્યક્તિની ધરપકડ કરી છે. રેલ્વે ભરતી પ્રણાલીમાં લાંચ અને ગેરરીતિની ચાલી રહેલી તપાસના ભાગ રૂપે, વડોદરા ડિવિઝનલ રેલ્વે મેનેજરની ઓફિસ સહિત અનેક સ્થળોએ દરોડા પાડ્યા બાદ આ ધરપકડ કરવામાં આવી હતી.
18મી ફેબ્રુઆરીના રોજ દાખલ કરાયેલી FIR મુજબ, આરોપી વ્યક્તિઓમાં પશ્ચિમ રેલ્વે વડોદરાના ડિવિઝનલ પર્સનલ ઓફિસર (IRPS 2018) અંકુશ વાસન-ચર્ચગેટ, પશ્ચિમ રેલ્વે-મુંબઈ ખાતે ડેપ્યુટી ચીફ કોમર્શિયલ મેનેજર સંજય કુમાર તિવારી, ડેપ્યુટી સ્ટેશન સુપરિન્ટેન્ડેન્ટ નીરજ સિંહા અને મુકેશ મીણા એક ખાનગી વ્યક્તિનો સમાવેશ થાય છે. તપાસમાં જાણવા મળ્યું છે કે આ અધિકારીઓ રેલ્વે વિભાગીય પરીક્ષામાં બેઠેલા ઉમેદવારો પાસેથી લાંચ લેવામાં સામેલ હતા, જેના બદલામાં તેમને અનુકૂળ પસંદગી પરિણામોની ઓફર કરવામાં આવતી હતી.
તપાસમાં જાણવા મળ્યું કે 13 ફેબ્રુઆરીના રોજ અંકુશ વાસને સંજય કુમાર તિવારીને આગામી મર્યાદિત વિભાગીય પરીક્ષામાં સ્થાન મેળવવા માટે લાંચ આપવા તૈયાર ઓછામાં ઓછા દસ ઉમેદવારોને ઓળખવાનો નિર્દેશ આપ્યો હતો. તિવારીને મુકેશ મીણા સાથે સંકલન કરવાનો પણ નિર્દેશ આપવામાં આવ્યો હતો, જેમણે પહેલાથી જ 5 ઉમેદવારો પાસેથી પૈસા વસૂલ્યા હતા. વધુ પુરાવા દર્શાવે છે કે 17મી ફેબ્રુઆરીના રોજ તિવારીના નિવાસસ્થાને વાસન અને તિવારી વચ્ચે થયેલી બેઠક બાદ તિવારીએ વડોદરામાં ધનરાજ જ્વેલર્સના માલિક રાજેન્દ્ર લાડલાનો સંપર્ક કરીને બિલ વિના રોકડમાં ૪૦૦ ગ્રામ સોનું ખરીદવા અંગે પૂછપરછ કરી હતી, જેના માટે લાડલા સંમત થયા હતા. બીજા દિવસે તિવારી ગુજરાતના આણંદમાં મીણાને મળ્યો, જ્યાં તેણે 5 ઉમેદવારોની છેતરપિંડીથી પસંદગી કરાવવા માટે રોકડ રકમ એકઠી કરી. આ ઘટનાક્રમને કારણે CBIએ વડોદરામાં આવેલી આરોપીઓની ઓફિસો અને રહેઠાણો પર દરોડા પાડ્યા, જેના કારણે ધરપકડ કરવામાં આવી. કાર્યવાહી દરમિયાન અધિકારીઓએ મહત્વપૂર્ણ દસ્તાવેજો અને ડિજિટલ પુરાવા જપ્ત કર્યા.
ધરપકડ કરાયેલા વ્યક્તિઓ પર ભારતીય ન્યાય સંહિતા (BNS) ની કલમ 61 અને ભ્રષ્ટાચાર નિવારણ અધિનિયમ 1988 ની કલમ 7 અને 8 હેઠળ ગુનો નોંધવામાં આવ્યો છે. આ કેસમાં રેલ્વે ભરતી અને આંતરિક પરીક્ષાઓની પારદર્શિતા પર ગંભીર ચિંતાઓ ઉભી થઈ છે, જે સિસ્ટમમાં ભ્રષ્ટાચારની હદને ઉજાગર કરે છે. આગામી દિવસોમાં વધુ ધરપકડ થવાની સંભાવના સાથે CBI એ તેની તપાસને વધુ વિસ્તૃત કરી શકે છે.
આ પણ વાંચો: AAP સરકારે દિલ્હી છોડતાની સાથે જ CBI દ્વારા મોટી કાર્યવાહી, DTCના છ અધિકારીઓની ધરપકડ
આ પણ વાંચો: તિરૂપતિ લાડુ વિવાદમાં CBIની મોટી કાર્યવાહી, ભેળસેળ મામલે 4ની ધરપકડ
આ પણ વાંચો: 350 કરોડના ક્રિપ્ટોકરન્સી કૌભાંડ મામલે CBIના 10થી વધુ સ્થળોએ દરોડા, 7ની ધરપકડ
