West Bengal News : પશ્ચિમ બંગાળની રાજનીતિમાં તૃણમૂલ કોંગ્રેસ (TMC)ની અંદર ચાલી રહેલો આંતરિક વિવાદ હવે તપાસ એજન્સીઓ સુધી પહોંચ્યો છે. મંગળવારે CIDની એક ટીમ પૂર્વ મુખ્યમંત્રી મમતા બેનર્જી (Mamata Banerjee)ના કાલીઘાટ સ્થિત નિવાસસ્થાન પર પહોંચી હતી. આ જ પરિસરમાં TMCનું કેન્દ્રીય કાર્યાલય પણ કાર્યરત હોવાથી તપાસ ટીમે અહીં મહત્વપૂર્ણ દસ્તાવેજો અને માહિતીની ચકાસણી હાથ ધરી હતી.
મળતી માહિતી અનુસાર, શરૂઆતમાં તપાસ અધિકારીઓને પરિસરમાં પ્રવેશવાની મંજૂરી આપવામાં આવી નહોતી. જોકે બાદમાં સ્થાનિક પોલીસ અને વધારાના સુરક્ષા બંદોબસ્તની હાજરીમાં CID અધિકારીઓને અંદર પ્રવેશ અપાયો હતો. ત્યારબાદ સંબંધિત દસ્તાવેજોની તપાસ અને ચકાસણીની પ્રક્રિયા શરૂ કરવામાં આવી હતી.
શું છે સમગ્ર વિવાદ?
TMCના કેટલાક ધારાસભ્યોએ વિધાનસભા અધ્યક્ષ સમક્ષ ફરિયાદ નોંધાવી હતી કે વિરોધ પક્ષના નેતાની પસંદગી સાથે સંબંધિત એક દરખાસ્તમાં તેમની મંજૂરી વગર તેમના નામ અને હસ્તાક્ષર દર્શાવવામાં આવ્યા હતા. ફરિયાદમાં એવો પણ આક્ષેપ કરવામાં આવ્યો હતો કે આ પ્રસ્તાવ માટે કેટલાક દસ્તાવેજોમાં નકલી સહીઓનો ઉપયોગ થયો હતો.
ધારાસભ્યોનો દાવો છે કે શોભનદેવ ચટ્ટોપાધ્યાયને વિરોધ પક્ષના નેતા તરીકે રજૂ કરતી પ્રક્રિયામાં ગેરરીતિ થઈ હતી. આ મામલે પક્ષના રાષ્ટ્રીય મહાસચિવ અભિષેક બેનર્જીનું નામ પણ ચર્ચામાં આવ્યું છે અને કેટલાક બળવાખોર ધારાસભ્યોએ તેમના પર ગંભીર આક્ષેપો કર્યા છે.
અભિષેક બેનર્જીના જવાબ બાદ CID સક્રિય
CIDના સૂત્રો મુજબ, એજન્સી દ્વારા મોકલાયેલી નોટિસના જવાબમાં અભિષેક બેનર્જીએ જણાવ્યું હતું કે સંબંધિત ધારાસભ્યોની સહીઓ કાલીઘાટ સ્થિત પાર્ટીના કેન્દ્રીય કાર્યાલયમાં એકત્રિત કરવામાં આવી હતી. આ માહિતીના આધારે જ તપાસ ટીમે મમતા બેનર્જીના નિવાસસ્થાન પરિસરમાં આવેલા કાર્યાલયની મુલાકાત લીધી હતી.
આ પહેલા પણ CIDની ટીમ અભિષેક બેનર્જીના નિવાસસ્થાને પહોંચી હતી અને કેટલાક દસ્તાવેજો અંગે માહિતી એકત્રિત કરી હતી. એજન્સી હવે સમગ્ર પ્રક્રિયાની સત્યતા ચકાસવાનો પ્રયાસ કરી રહી છે.
હાજર થવા માટે વધુ સમય માંગ્યો
તપાસ સાથે જોડાયેલા સૂત્રોના જણાવ્યા અનુસાર અભિષેક બેનર્જી (Abhishek Banerjee)એ તપાસ અધિકારીઓ સમક્ષ હાજર થવા માટે વધારાનો સમય માંગ્યો હતો. તેમણે પોતાના અગાઉથી નક્કી થયેલા રાજકીય કાર્યક્રમો અને બેઠકોનો ઉલ્લેખ કરીને થોડો સમય આપવાની વિનંતી કરી હતી.
તેમ છતાં CIDએ તેમને નિર્ધારિત સમયમર્યાદામાં એજન્સી સમક્ષ હાજર થવા માટે સૂચના આપી હોવાનું જાણવા મળ્યું છે.
કાલીઘાટ ખાતે વધારાનો પોલીસ બંદોબસ્ત
CIDની ટીમ સ્થળ પર પહોંચ્યા બાદ કાલીઘાટ પોલીસ સ્ટેશનના વરિષ્ઠ અધિકારીઓ પણ ત્યાં પહોંચ્યા હતા. સુરક્ષા વ્યવસ્થાને ધ્યાનમાં રાખીને વધારાનો પોલીસ બંદોબસ્ત ગોઠવવામાં આવ્યો હતો. અધિકારીઓએ પરિસરના સુરક્ષાકર્મીઓ સાથે ચર્ચા કર્યા બાદ તપાસની કાર્યવાહી આગળ વધારી હતી.
આ જ કેસની તપાસના ભાગરૂપે CIDની બીજી ટીમે અભિષેક બેનર્જીની કેમેક સ્ટ્રીટ સ્થિત ઓફિસની પણ મુલાકાત લીધી હોવાનું જાણવા મળ્યું છે.
હાઈકોર્ટમાં પણ પહોંચ્યો મામલો
આ સમગ્ર વિવાદ હવે કાનૂની લડાઈમાં પણ પરિવર્તિત થયો છે. મમતા બેનર્જી (Mamata Banerjee)એ કલકત્તા હાઈકોર્ટમાં અરજી દાખલ કરીને પક્ષમાંથી હાંકી કાઢવામાં આવેલા ધારાસભ્ય ઋતબ્રત બેનર્જીને TMC ધારાસભ્ય દળના નેતા તરીકે માન્યતા આપવાના નિર્ણયને પડકાર્યો છે.
આ અરજી પર 10 જૂને સુનાવણી થવાની હોવાથી રાજ્યની રાજનીતિમાં આ કેસ વધુ ચર્ચાનો વિષય બન્યો છે.
બે ધારાસભ્યોની હકાલપટ્ટીથી વધ્યો વિવાદ
નકલી સહીના આક્ષેપો સાથે સ્પીકરને ફરિયાદ કરનાર ધારાસભ્યો સંદીપન સાહા અને ઋતબ્રત બેનર્જીને બાદમાં TMCમાંથી બહારનો રસ્તો બતાવવામાં આવ્યો હતો. બંને ધારાસભ્યોનો આરોપ છે કે તેમણે ગેરરીતિ સામે અવાજ ઉઠાવ્યો હોવાથી તેમના પર કાર્યવાહી કરવામાં આવી.
બીજી તરફ પક્ષના નેતૃત્વે આ નિર્ણયને આંતરિક શિસ્તનો મુદ્દો ગણાવ્યો છે. જોકે આ પગલાં બાદ પક્ષની અંદર અસંતોષ વધુ સ્પષ્ટ રીતે સામે આવ્યો છે.
બળવાખોર જૂથને મળ્યું સમર્થન
વિવાદ વચ્ચે 3 મેના રોજ TMCના કુલ 80 ધારાસભ્યોમાંથી 58 ધારાસભ્યોએ ઋતબ્રત બેનર્જીને સમર્થન આપ્યું હોવાનું સામે આવ્યું હતું. ત્યારબાદ તેમને વિરોધ પક્ષના નેતા તરીકે પસંદ કરવામાં આવ્યા હતા અને વિધાનસભા અધ્યક્ષ દ્વારા પણ આ નિર્ણયને માન્યતા આપવામાં આવી હતી.
હવે CIDની તપાસ, હાઈકોર્ટની સુનાવણી અને પક્ષની અંદર વધી રહેલા મતભેદોને કારણે પશ્ચિમ બંગાળની રાજનીતિમાં આગામી દિવસોમાં વધુ રાજકીય ગરમાવો જોવા મળી શકે છે.
