Corona outbreak in China : ચીનમાં કોરોના વિસ્ફોટ જોવા મળી રહ્યું છે, કોરોનાના લીધે ચીનના લોકોમાં ભારે દહેશત જોવા મળી રહી છે, ચીનમાં ભારે સંખ્યમાં કેસ વધતા સમગ્ર દુનિયામાં ચિંતાનું મોજું ફરી વળ્યું છે. ચીનમાં હાલ હોસ્પિટલમાં લાંબી કતારો અને સ્માશાનમાં લાંબી લાઇન જોવા મળી રહી છે પરતું તાનાશાહ સરકાર કોરોનાને અકુંશ કરવામાં સરેઆમ નિષ્ફળ નીવડી છે,એક અહેવાલ પ્રમાણે ચીનમાં દર 24 કલાકમાં 1 મિલિયન કોવિડ કેસ અને 5,000 મૃત્યુ નોંધાઈ શકે છે. આગામી મહિના સુધી દરરોજ નવા કેસની સંખ્યા વધીને 37 લાખ અને માર્ચ સુધીમાં 42 લાખ થઈ શકે છે.
આ રિપોર્ટ લંડન સ્થિત એક એનાલિટિક્સ ફર્મ દ્વારા બહાર પાડવામાં આવ્યો છે. ચીનના બેઈજિંગ, સિચુઆન, અનહુઈ, હુબેઈ, શાંઘાઈ અને હુનાનમાં હાલત ખરાબ થઈ રહી છે. સતત બગડતી પરિસ્થિતિ વચ્ચે સમાચાર આવી રહ્યા છે કે ચીનના રાષ્ટ્રપતિ શી જિનપિંગ પહેલીવાર શનિવાર અથવા રવિવારે કોવિડ સમીક્ષા બેઠક કરશે.
આ બેઠકમાં ક્રિસમસ અને નવા વર્ષ પર ભીડને દૂર કરવા માટે રણનીતિ તૈયાર કરવામાં આવી શકે છે. ક્રિસમસ અને નવા વર્ષ માટે જિનપિંગ સરકાર દ્વારા કોઈ વિશેષ માર્ગદર્શિકા પણ જારી કરી શકાય છે. માનવામાં આવે છે કે આ બેઠક બાદ રાષ્ટ્રપતિ જિનપિંગ ચીનમાં સંપૂર્ણ લોકડાઉનની જાહેરાત કરી શકે છે. નિષ્ણાતોએ બેઇજિંગમાં ચેપનો દર 50 થી 70 ટકા રહેવાની આગાહી કરી છે. શાંઘાઈમાં, આગામી સપ્તાહ સુધીમાં 25 મિલિયન લોકો કોવિડ પોઝિટિવ હોવાની અપેક્ષા છે.
જિનપિંગ સરકારે ફરી એકવાર કોરોનાના આંકડા છુપાવવાનું કામ શરૂ કર્યું છે. સરકારના જણાવ્યા અનુસાર છેલ્લા એક સપ્તાહમાં કોરોનાને કારણે માત્ર 8 લોકોના મોત થયા છે. મીડિયા રિપોર્ટ્સ અનુસાર માત્ર 20 ડિસેમ્બરે ચીનમાં 36 મિલિયન કેસ નોંધાયા હતા. તે જ સમયે, 19 નવેમ્બરથી 18 ડિસેમ્બર સુધીમાં, ચીનમાં મૃત્યુ પ્રમાણપત્ર માટે 11 લાખ લોકોએ ઓનલાઈન અરજી કરી છે. બેઇજિંગ અને શાંઘાઈમાં 60-60, જ્યારે ચેંગડુમાં 40 નવા કબ્રસ્તાન બનાવવામાં આવી રહ્યા છે.
ચીનમાં દવાઓની તીવ્ર અછત
ચીનમાં દવાઓની ભારે અછત છે. માંગને પહોંચી વળવા માટે ફાર્માસ્યુટિકલ કંપનીઓમાં ઓવરટાઇમ કરવામાં આવી રહ્યો છે. આ દરમિયાન ચીન સરકાર દ્વારા પણ કેટલીક વ્યવસ્થા કરવામાં આવી છે. સરકારે તાવ, શરીરના દુખાવા અને માથાના દુખાવા માટે મફત દવા આપવાની જાહેરાત કરી છે. દેશભરના મેડિકલ સ્ટોર્સમાં N-95 માસ્ક અને એન્ટિજેન ટેસ્ટિંગ કીટ ખતમ થઈ ગઈ છે. માંગને જોતા જિનપિંગ સરકારે 100 થી વધુ નવી કંપનીઓને લાઇસન્સ આપ્યા છે.
રાષ્ટ્રપતિ જિનપિંગ સામે ગુસ્સો
નોંધનીય છે કે આ સંજોગોમાં રાષ્ટ્રપતિ જિનપિંગ વિરુદ્ધ નારાજગી વધી રહી છે. ચીનના સોશિયલ મીડિયા પર લોકો કમ્યુનિસ્ટ પાર્ટી અને જિનપિંગની ટીકા કરવામાં વ્યસ્ત છે. દેશમાં દવાઓનો અભાવ અને સરકારની બેદરકારીના કારણે લોકોમાં ભારે રોષ જોવા મળી રહ્યો છે.
