Sports News : ભારત અને ઇંગ્લેન્ડ (India vs England)વચ્ચે એજબેસ્ટન ખાતે રમાયેલી ટેસ્ટ મેચ દરમિયાન પૂર્વ ભારતીય કેપ્ટન મહેન્દ્ર સિંહ ધોની (MS Dhoni)સ્ટેડિયમમાં મેચનો આનંદ માણતા જોવા મળ્યા હતા. જોકે, આ વખતે ચાહકોનું ધ્યાન તેમની હાજરી કરતાં વધુ તેમના કાનમાં લગાવેલા એક નાના ડિવાઈસ (Ear Device)પર ગયું. સોશિયલ મીડિયા પર અનેક લોકોએ સવાલ ઉઠાવ્યો કે આખરે ધોનીએ કાનમાં કયું ડિવાઈસ પહેર્યું છે?
આ ડિવાઈસ હિયરિંગ એડ નથી
ધોનીએ જે ડિવાઈસ પહેર્યું હતું તે હિયરિંગ એડ નહીં પરંતુ સ્ટેડિયમ રેડિયો રીસીવર (Radio Receive)છે. આ ખાસ ડિવાઈસ દ્વારા સ્ટેડિયમમાં બેઠેલા દર્શકોને મેચની લાઇવ બોલ-બાય-બોલ કોમેન્ટ્રી સાંભળવાની સુવિધા મળે છે. સાથે જ નિષ્ણાતોના વિશ્લેષણ, મહત્વપૂર્ણ અપડેટ્સ અને મેચ સંબંધિત માહિતી પણ રિયલ ટાઇમમાં મળી રહે છે.
ઇંગ્લેન્ડના સ્ટેડિયમમાં વર્ષોથી ચાલતી પરંપરા
ઇંગ્લેન્ડના અનેક ક્રિકેટ સ્ટેડિયમોમાં વર્ષોથી દર્શકો માટે આ પ્રકારના રેડિયો રીસીવર (Radio Receive)ની વ્યવસ્થા કરવામાં આવે છે. બ્રોડકાસ્ટર્સ દ્વારા ખાસ ઓડિયો સિગ્નલ પ્રસારિત કરવામાં આવે છે, જેને આ ડિવાઈસ દ્વારા સરળતાથી સાંભળી શકાય છે. આ કારણે દર્શકોને મોટી સ્ક્રીન અથવા જાહેર જાહેરાતો પર સંપૂર્ણપણે નિર્ભર રહેવું પડતું નથી.
મેચનો અનુભવ વધુ રસપ્રદ બને છે
સ્ટેડિયમમાં દરેક ઘટના સ્પષ્ટ રીતે સમજવી હંમેશા સરળ હોતી નથી. આવી સ્થિતિમાં આ ડિવાઈસ દર્શકોને દરેક બોલ, વિકેટ, આંકડા અને મેચના મહત્વપૂર્ણ પ્રસંગોની તાત્કાલિક માહિતી આપે છે, જેના કારણે મેચ જોવાનો અનુભવ વધુ સારો બને છે.
ખરીદી અથવા ભાડે પણ મળી રહે છે
સ્ટેડિયમમાં આવતા દર્શકો આ રેડિયો રીસીવર ભાડે લઈ શકે છે અથવા ખરીદી પણ શકે છે. આ ડિવાઈસ સ્ટેડિયમની સ્થાનિક ટ્રાન્સમિશન સિસ્ટમ પર કામ કરે છે, તેથી સ્ટેડિયમની બહાર નીકળતાં જ તેનું સિગ્નલ બંધ થઈ જાય છે.
કેટલી હોય છે કિંમત?
આવા સ્ટેડિયમ રેડિયો રીસીવરની શરૂઆતની કિંમત અંદાજે ₹1,200 જેટલી હોય છે. મોડેલ અને તેમાં મળતી સુવિધાઓ અનુસાર તેની કિંમત ₹5,000 અથવા તેથી વધુ પણ હોઈ શકે છે.
