World News : કેનેડાની મુશ્કેલીઓ ઓછી થવાના કોઈ સંકેત દેખાઈ રહ્યા નથી. અમેરિકાના રાષ્ટ્રપતિ ડોનાલ્ડ ટ્રમ્પના ટેરિફ વોર વચ્ચે હવે ચીને પણ કેનેડિયન ઉત્પાદનો પર ભારે ડ્યુટી લગાવી છે. બેઇજિંગે શનિવારે જાહેરાત કરી હતી કે તે $2.6 બિલિયનથી વધુ મૂલ્યના કેનેડિયન કૃષિ અને ખાદ્ય ઉત્પાદનો પર ટેરિફ લાદશે. ઓક્ટોબરમાં કેનેડા દ્વારા ચીની માલ પર લાદવામાં આવેલી આયાત જકાતના જવાબમાં આ પગલું લેવામાં આવ્યું છે.
ચીનના વાણિજ્ય મંત્રાલયના જણાવ્યા અનુસાર, આ ટેરિફ 20 માર્ચથી અમલમાં આવશે. આ ડ્યુટી કેનેડા દ્વારા ચાઇનીઝ ઇલેક્ટ્રિક વાહનો, સ્ટીલ અને એલ્યુમિનિયમ ઉત્પાદનો પર લાદવામાં આવેલા 100% અને 25% ટેરિફની સમકક્ષ છે. જોકે રસપ્રદ વાત એ છે કે, ચીને આ યાદીમાં કેનોલા (જેને રેપસીડ તરીકે પણ ઓળખવામાં આવે છે)નો સમાવેશ કર્યો નથી. નિષ્ણાતો માને છે કે આ પગલાને દ્વિપક્ષીય વેપાર વાટાઘાટો માટે અવકાશ છોડવા તરીકે જોઈ શકાય છે.
ચીને આ નિર્ણય કેમ લીધો?
ચીને કેનેડાને ચેતવણી તરીકે પણ આ પગલું ભર્યું છે. ટ્રમ્પ વહીવટીતંત્રે સંકેત આપ્યો હતો કે જો કેનેડા અને મેક્સિકો અમેરિકાની સમકક્ષ ચીની ઉત્પાદનો પર 20% વધારાની આયાત ડ્યુટી લગાવે છે, તો અમેરિકા તેમની સામે 25% આયાત ડ્યુટી હળવી કરી શકે છે. આવી સ્થિતિમાં ચીનના આ પગલાને વ્યૂહાત્મક વળતો હુમલો માનવામાં આવી રહ્યો છે. ચીનના વાણિજ્ય મંત્રાલયે એક નિવેદનમાં જણાવ્યું હતું કે, “કેનેડાના પગલાં WTO નિયમોનું ગંભીર ઉલ્લંઘન છે અને સંરક્ષણવાદી વલણ દર્શાવે છે, જેનાથી ચીનના કાયદેસર વેપાર અધિકારોને ભારે નુકસાન થાય છે.”
રોઇટર્સના અહેવાલ મુજબ જે ઉત્પાદનોને અસર થશે તેમાં $1 બિલિયનથી વધુ મૂલ્યના કેનેડિયન રેપસીડ તેલ, ઓઈલ કેક અને વટાણા પર 100% ટેરિફનો સમાવેશ થાય છે. કેનેડિયન Sea ફૂડ ઉત્પાદનો અને $1.6 બિલિયનના ડુક્કરના માંસ પર 25% ટેરિફ છે. આ નિર્ણય પર પ્રતિક્રિયા આપતા યુરોપિયન ગ્રુપના ચીન ડિરેક્ટર ડેન વાંગે કહ્યું: “આ પગલું કેનેડા માટે એક મજબૂત સંદેશ છે. બેઇજિંગ બતાવવા માંગે છે કે અમેરિકાની ખૂબ નજીક જવાની કિંમત ચૂકવવી પડે છે.”
કેનેડા માટે આ ચિંતાનો વિષય કેમ છે ?
કેનેડાના વડાપ્રધાન જસ્ટિન ટ્રુડો પહેલાથી જ કહી ચૂક્યા છે કે તેમનો ટેરિફ નિર્ણય ચીનની રાજ્ય-પ્રેરિત ઓવર-કેપેસિટી નીતિનો સામનો કરવા માટે હતો. પરંતુ હવે ચીને આનો જવાબ આપ્યો છે, જેનાથી કેનેડા મુશ્કેલ સ્થિતિમાં મુકાઈ ગયું છે. નોંધનીય છે કે ચીન કેનેડાનો બીજો સૌથી મોટો વેપારી ભાગીદાર છે, જોકે તેનો વેપાર વિસ્તાર અમેરિકાની તુલનામાં ઘણો નાનો છે. 2024 માં કેનેડાએ ચીનને $47 બિલિયન મૂલ્યના ઉત્પાદનોની નિકાસ કરી હતી.
શું ચૂંટણી પછી ચિત્ર બદલાશે?
ચીન પણ આ મુદ્દાને વ્યૂહાત્મક રીતે જોઈ રહ્યું છે. કેનેડામાં ઓક્ટોબર 2025 સુધીમાં સામાન્ય ચૂંટણી યોજાવાની છે અને બેઇજિંગને આશા છે કે જો સરકાર બદલાય છે, તો નવી ઉદારવાદી નીતિઓ હેઠળ દ્વિપક્ષીય સંબંધોમાં સુધારો થઈ શકે છે. “કેનેડામાં સત્તા પરિવર્તન પછી ચીન કદાચ ઓસ્ટ્રેલિયાની જેમ સંબંધો સુધારવાની વ્યૂહરચના અપનાવી રહ્યું છે,” કૃષિ નિષ્ણાત ઇવન પેઇ કહે છે.
આ પણ વાંચો: ‘ભારત ટેરિફ ઘટાડવા સંમત થયું છે’, અમેરિકાના રાષ્ટ્રપતિ ડોનાલ્ડ ટ્રમ્પે કહ્યું
આ પણ વાંચો: ટીમ ભારત US ટેરિફ વચ્ચે શૂન્ય ડ્યુટી અને વ્યવસાયિક સાતત્ય ઇચ્છે છે
