Ahmedabad News: દેશમાં નશીલા પદાર્થોની તસ્કરી સામે ડિરેક્ટોરેટ ઓફ રેવન્યુ ઇન્ટેલિજન્સ (DRI)એ મોટી કાર્યવાહી કરી છે. બેંગલુરુ અને દિલ્હી (Drug Smuggling India) એરપોર્ટ સહિત નાગપુર નજીક હાથ ધરાયેલી ત્રણ અલગ-અલગ કામગીરીમાં આશરે 7.1 કિલોગ્રામ એમ્ફેટામાઈન અને 3.1 કિલોગ્રામ કોકેઈન જપ્ત કરવામાં આવ્યું છે. આ કેસમાં ત્રણ લોકોની ધરપકડ કરવામાં આવી છે. DRIએ ગુપ્ત બાતમીના આધારે આ કાર્યવાહી હાથ ધરી હતી.
Drug Smuggling India: બેંગલુરુ એરપોર્ટ પર 5.166 કિલો એમ્ફેટામાઈન ઝડપાયું
DRIના અધિકારીઓએ 14 ઓક્ટોબર, 2026ના રોજ દિલ્હીથી બેંગલુરુના કેમ્પેગૌડા આંતરરાષ્ટ્રીય એરપોર્ટ પર પહોંચેલા એક મુસાફરને અટકાવ્યો હતો. તેના સામાનની તપાસ દરમિયાન 5.166 કિલોગ્રામ એમ્ફેટામાઈન મળી આવ્યું હતું. પ્રતિબંધિત પદાર્થને નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ, 1985 હેઠળ જપ્ત કરવામાં આવ્યો હતો. આ મામલે મુસાફરની ધરપકડ કરવામાં આવી હતી.
બસમાં લેડીઝ સૂટની અંદર છુપાવ્યું હતું ડ્રગ્સ
બીજી કાર્યવાહી નાગપુર નજીક સાવનેરના ખાપા ફાટા વિસ્તારમાં કરવામાં આવી હતી. દિલ્હીથી હૈદરાબાદ જતી બસમાં મુસાફરી કરી રહેલા એક ભારતીય નાગરિકને DRIના અધિકારીઓએ અટકાવ્યો હતો.
મુસાફરના બેકપેકની તપાસ દરમિયાન નવા લેડીઝ સૂટની અંદર સફેદ સ્ફટિકીય પદાર્થ છુપાવેલો મળી આવ્યો હતો. બેગનું વજન અસામાન્ય રીતે વધુ લાગતાં અધિકારીઓએ તેની અંદરની લાઇનિંગની તપાસ કરી હતી, જેમાં વધુ એક છુપાવેલું પેકેટ મળી આવ્યું હતું. તપાસ દરમિયાન બંને પેકેટમાંથી કુલ 1.97 કિલોગ્રામ એમ્ફેટામાઈન મળી આવ્યું હતું. આ પદાર્થ NDPS એક્ટ હેઠળ જપ્ત કરી મુસાફરની ધરપકડ કરવામાં આવી હતી.
ઘાનાથી આવેલા મુસાફર પાસેથી 3.134 કિલો કોકેઈન
DRIએ 15 અને 16 ઓક્ટોબરની મધરાત દરમિયાન નવી દિલ્હીના ઇન્દિરા ગાંધી આંતરરાષ્ટ્રીય એરપોર્ટના ટર્મિનલ-3 પર પણ કાર્યવાહી કરી હતી. ઘાનાથી આવેલા એક ભારતીય મુસાફરના સામાનની તપાસ કરતાં સફેદ પાવડર ધરાવતા છ પારદર્શક પેકેટ મળી આવ્યા હતા.
આ પેકેટોનું કુલ વજન 3.134 કિલોગ્રામ હતું. ફીલ્ડ ટેસ્ટિંગમાં પદાર્થ કોકેઈન હોવાનું જણાયું હતું. ત્યારબાદ તેને NDPS એક્ટ, 1985 હેઠળ જપ્ત કરવામાં આવ્યું અને મુસાફરની ધરપકડ કરવામાં આવી હતી.
નશીલા પદાર્થોની તસ્કરી રોકવા DRIની ઝુંબેશ તેજ
DRIના જણાવ્યા અનુસાર, આ કામગીરીનો હેતુ નશીલા પદાર્થોની સપ્લાય ચેઇનને તોડવાનો અને તસ્કરો દ્વારા અપનાવવામાં આવતી છુપાવવાની પદ્ધતિઓનો પર્દાફાશ કરવાનો છે. એરપોર્ટ અને રોડ નેટવર્ક મારફતે પ્રતિબંધિત નશીલા પદાર્થોની હેરફેર અટકાવવા માટે આવી ઇન્ટેલિજન્સ આધારિત કાર્યવાહી ચાલુ રાખવામાં આવી રહી છે.
આ સમગ્ર કાર્યવાહી અંગેની માહિતી પ્રેસ ઇન્ફોર્મેશન બ્યુરો (PIB), અમદાવાદ દ્વારા 19 ઓક્ટોબર, 2026ના રોજ જાહેર કરવામાં આવી હતી.
આ પણ વાંચો: Drishyam 3- અજય દેવગનની ફિલ્મે મચાવી ધૂમ, ₹95 કરોડની નજીક કલેક્શન
આ પણ વાંચો: FSSAIનો મોટો નિર્ણય: Pepsi, Red Bull સહિતની બ્રાન્ડ્સને ‘Energy Drink’ શબ્દ હટાવવા આદેશ
આ પણ વાંચો: સુરત રેલવે સ્ટેશન પરથી ₹20 કરોડનું કોકેઇન ઝડપાયું, DRIએ ડ્રગ કેરિયરને ઝડપી પાડ્યો
