Fog : ઉત્તર ભારતમાં તીવ્ર ઠંડીએ દસ્તક આપી દીધી છે. તેને જોતા હવામાન વિભાગે રેડ અને યલો એલર્ટ જાહેર કર્યું છે. બુધવારે સવારે દેશના ઉત્તરીય ભાગના ઘણા રાજ્યોમાં ગાઢ ધુમ્મસની આશંકા છે. દિલ્હીથી બિહાર સુધી આ દિવસોમાં સવારની શરૂઆત ગાઢ ધુમ્મસની ચાદર સાથે થાય છે. હવામાન વિભાગના જણાવ્યા અનુસાર આગામી કેટલાક દિવસો સુધી ધુમ્મસની સ્થિતિ આવી જ રહેશે.
ખરાબ હવામાનની અસર હવે ફ્લાઇટ, ટ્રેન અને બસો પર દેખાઈ રહી છે. ખરાબ હવામાનને કારણે મંગળવારે રાત્રે ચંદીગઢ, વારાણસી અને લખનૌમાં ફ્લાઈટ્સ ડાયવર્ટ કરવામાં આવી હતી. આ સાથે અનેક ટ્રેનો મોડી દોડી રહી છે. તે જ સમયે, યુપીમાં રાત્રીના સમયે ચાલતી રોડવેઝની બસો નહીં ચલાવવાનો નિર્ણય લેવામાં આવ્યો છે.
ઉલ્લેખનીય છે કે ઠંડીને જોતા હવામાન વિભાગે ઉત્તર ભારતીય રાજ્યોમાં રેડ એલર્ટ જાહેર કર્યું છે. મંગળવારે યુપી, પંજાબ અને હરિયાણા સહિત દિલ્હી એનસીઆરમાં ગાઢ ધુમ્મસ જોવા મળ્યું હતું. આ દરમિયાન વિઝિબિલિટી ઓછી હોવાના કારણે અનેક અકસ્માતો પણ સર્જાયા હતા. સાથે જ લોકોને મુશ્કેલીનો સામનો કરવો પડ્યો હતો. હવામાન વિભાગે દિલ્હીમાં 23 ડિસેમ્બર સુધી યલો એલર્ટ જાહેર કર્યું છે. એટલે કે આ સમય દરમિયાન સવારે બહાર નીકળતી વખતે ખાસ કાળજી લેવાની જરૂર છે.
ધુમ્મસને જોતા યુપી સરકારે નાઇટ બસ સેવા પર પ્રતિબંધ લગાવી દીધો છે. આ સાથે પંજાબમાં શાળાના સમયમાં ફેરફાર કરવામાં આવ્યો છે. મંગળવારે, ધુમ્મસને કારણે હરિયાણાના હિસારથી સિરસા જતી વખતે નાયબ મુખ્યમંત્રી દુષ્યંત ચૌટાલાના કાફલાના બે વાહનો એકબીજા સાથે અથડાઈ, વાહનમાં સવાર પોલીસ દળને ઈજા થઈ. તેવી જ રીતે અન્ય રાજ્યોમાંથી પણ અકસ્માતના સમાચાર બહાર આવ્યા હતા.
