Fraud/ પ્રેમીકા માટે છેતરપીંડી, મિત્રોનું જ આ રીતે કરી નાખ્યું 19 લાખનું…

• – ઠગબાજ યુવકની વિચિત્ર પ્રેમ કહાની
• – સ્કૂલ ના મિત્રોને વર્ષો બાદ મળ્યો યુવક
• – દોસ્તી નિભાવવાની જગ્યાએ કરી ઠગાઈ
• – કલકતામાં રહેતી પ્રેમિકા માટે 19 લાખની ઠગાઈ
• – મહિનાઓ સુધી હોટલમાં રોકાયો
• – ગર્લફ્રેન્ડ ને અપાવ્યા કપડા અને મોબાઈલ ફોન
• – ગર્લફ્રેન્ડ ને મળવા ખાસ પ્લેનમાં જતો

@ ભાવેશ રાજપુત, મંતવ્ય ન્યૂઝ  -અમદાવાદ

ઇન્સ્ટાગ્રામ પર કોલકત્તાની યુવતી સાથે પ્રેમમાં પડેલો યુવક ઠગાઈના રવાડે ચઢી ગયો. યુવતીને કપડા મોબાઈલ અપાવવા માટે તેણે તેના જ મિત્રોના 19 લાખ રૂપિયા નોકરી અપાવવાનું કહી ચાઉં કરી લીધા. સોશ્યલ મીડિયાથી વર્ષો બાદ સ્કૂલ ફ્રેન્ડને આ યુવક મળ્યો અને લાખો રૂપિયા ચાઉં કરી લીધા. યુવતીના પ્રેમમાં પડેલો યુવક હવે જેલના સળિયા પાછળ ધકેલાશે. કોણ છે આ પાગલ પ્રેમી જોઈએ એ આ અહેવાલમાં….

આ વિચીત્ર શખસ છે એન્જીનીયર. નામ છે હર્ષદ પાટીલ. હર્ષદ પહેલા અમરાઈવાડી ની એક સ્કૂલમાં ભણતો હતો. સ્કૂલ પુરી થયા બાદ તેના મિત્રો સાથે સંપર્ક તૂટી ગયો. જોકે સોશ્યલ મીડિયા થકી ફરી તે તેના મિત્રોને મળ્યો. જોકે મિત્રતા નિભાવવાના બદલે આપ્યો દગો. આ હર્ષદ એ તેના મિત્ર મેહુલને એરક્રાફ્ટ એન્જીનીયરની નોકરીની લાલચ આપી અને પિતા આઈબી માં હોવાથી ઓળખાણથી કાર્ગો ઓફિસરની લાલચ આપી ટુકડે ટુકડે 17 લાખ પડાવ્યા.

માત્ર આ એક જ મિત્ર નહિ પણ અન્ય એક સ્ત્રી મિત્રના પતિ અને પાડોશી ને પણ નોકરીની લાલચ આપીને લાખો રૂપિયા પડાવ્યા હોવાનું સામે આવ્યું. આરોપી હર્ષદે આ તમામ મિત્રોને પોતે એરપોર્ટ ખાતે એર ટ્રાફિક કન્ટ્રોલર તરીકે નોકરી કરતો હોવાનું કહી વિશ્વાસ જીત્યો હતો અને બાદમાં તે બહાને તમામ લોકોના લાખો રૂપિયા પડાવી લીધા.

આરોપી સામે રામોલ માં ફરિયાદ થતા જ પોલીસ તેના ઘરે પહોંચી અને તેની અટકાયત કરી ધરપકડ કરી. આરોપી હર્ષદ ને પોલીસસ્ટેશન લાવી આટલા બધા રૂપિયાની તેના જ મિત્રો સાથે ઠગાઈ કેમ કરી તે બાબતે પૂછતાં તેના જવાબ સાંભળી પોલીસ પણ ચોંકી ઉઠી. આરોપીએ કબુલાત કરી કે તેને ઇન્સ્ટાગ્રામ થકી કોલકાતા ની એક યુવતી સાથે પ્રેમ સંબંધ બંધાયો. મને તેને મળવા જતો અને હોટલમાં રોકાતો. આટલું જ નહીં પ્રેમિકા સામે ઇમ્પ્રેશન જમાવવા તેને 25 હજારના અવાર નવાર કપડા અને મોંઘા ફોન અપાવતો અને મોજશોખ પુરા કરાવતો. જોકે પ્રેમિકા ને જાણ ન હતી કે હર્ષદ તેના જ મિત્રોને નોકરીની લાલચ આપીને ઠગાઈ કરી તેના મોજશોખ પુરા કરાવી રહ્યો છે.

આરોપીએ તેના પિતા આઈબીમા હોવાની પણ વાતો લોકોને કરતા હવે તેની પણ તપાસ કરાશે. બીજીતરફ આરોપી પોલીસ સામે કગરતો રહ્યો કે તેને તેનો ગુનો કબુલ છે અને પોલીસ સામે એક આજીજી કરી કે તેની ગર્લફ્રેન્ડ નો કોઈ વાંક ન હોવાથી તેની પર કોઈ કાર્યવાહી ન કરે. બીજીતરફ 19 લાખથી વધુની આ તમામ રકમ તેણે ગર્લફ્રેન્ડ પાછળ જ વાપરી કે અન્ય કોઈ જગ્યાએ તે બાબતે હવે પોલીસ તેના રિમાન્ડ મેળવી હિસાબ મેળવશે