Gandhinagar News: સાયબર ઠગોએ સરગાસણમાં રહેતા 81 વર્ષીય વૃદ્ધ અને તેમની પુત્રીને નિશાન બનાવી રૂ.14 લાખની છેતરપિંડી આચર્યાની ઘટના (Gandhinagar digital arrest case) સામે આવી છે. ટેલિકોમ ઓથોરિટી અને CBIના અધિકારીઓ હોવાની ઓળખ આપીને ઠગોએ બંનેને મની લોન્ડરિંગ કેસમાં ફસાવી દેવાની ધમકી આપી હતી. પોલીસના જણાવ્યા મુજબ, 4થી 9 ઓક્ટોબર દરમિયાન વીડિયો કોલ મારફતે બંને પર સતત દબાણ ઊભું કરવામાં આવ્યું હતું. આખરે વેરિફિકેશનના નામે બેંક ખાતાંમાં કુલ રૂ.14 લાખ ટ્રાન્સફર કરાવ્યા બાદ આરોપીઓએ પોતાના ફોન બંધ કરી દીધા હતા.
આ મામલે ગાંધીનગર રેન્જ સાયબર ક્રાઇમ પોલીસ સ્ટેશનમાં ફરિયાદ નોંધાવવામાં આવી છે.
Gandhinagar digital arrest case: ટેલિકોમ અધિકારી બનીને કર્યો ફોન
સરગાસણની મેઘમલ્હાર રેસિડેન્સીમાં રહેતા અને નિવૃત્ત જીવન વિતાવતા અમૃતલાલ પરમારને 4 ઓક્ટોબરના રોજ અજાણ્યા વ્યક્તિનો ફોન આવ્યો (Father daughter digital arrest) હતો. ફોન કરનારે પોતાનું નામ વિજય જશવંત હોવાનું જણાવી ટેલિકોમ ઓથોરિટીનો અધિકારી હોવાનો દાવો કર્યો હતો.
આરોપીએ વૃદ્ધને કહ્યું હતું કે તેમના નામે મુંબઈથી ખરીદવામાં આવેલા સિમ કાર્ડનો ઉપયોગ અશ્લીલ વીડિયો અને હેરાનગતિભર્યા સંદેશા મોકલવા માટે થઈ રહ્યો છે. ત્યારબાદ બેંક ખાતા સાથે જોડાયેલા શંકાસ્પદ વ્યવહારોનો ઉલ્લેખ કરીને તેમને ગંભીર કેસમાં ફસાવવાની ધમકી આપવામાં આવી હતી.
નકલી CBI દસ્તાવેજોથી ઊભો કર્યો ડર
ઠગોએ અમૃતલાલ પરમારના નામે કેનેરા બેંકમાં ખોલવામાં આવેલા ખાતામાંથી નરેશ ગોયેલ નામના વ્યક્તિ સાથે સંકળાયેલા આશરે બે કરોડ રૂપિયાના વ્યવહારો થયા હોવાનો દાવો કર્યો હતો. આ ઉપરાંત, બેંક ખાતું પાંચ લાખ રૂપિયામાં વેચવામાં આવ્યું હોવાની વાત કહી તેમને મની લોન્ડરિંગના કેસમાં સંડોવાયેલા હોવાનું દર્શાવવાનો પ્રયાસ કર્યો હતો.
પોતાની વાત સાચી સાબિત કરવા આરોપીઓએ વોટ્સએપ પર કથિત CBI પત્ર, FIR, ધરપકડના (Fake CBI officer scam) ફોટા, ફંડ ફ્રીઝ કરવાના આદેશ, ધરપકડ વોરંટ અને સુપ્રીમ કોર્ટના નામે બનાવટી દસ્તાવેજો મોકલ્યા હતા. આ દસ્તાવેજો દ્વારા વૃદ્ધને કાયદાકીય કાર્યવાહીનો ડર બતાવી માનસિક દબાણમાં મૂકવામાં આવ્યા હતા.
વીડિયો કોલ પર પોલીસની જેમ પૂછપરછ
વૃદ્ધે સમગ્ર ઘટનાની જાણ પોતાની પુત્રી મીરાને કરી હતી. પુત્રીએ પણ ફોન કરનાર સાથે વાત કરી હતી, પરંતુ સામેની વ્યક્તિ તરફથી ધમકીભર્યો જવાબ મળતાં બંને ગભરાઈ ગયાં હતાં.
ફરિયાદ મુજબ, ઠગોએ પોલીસનો ગણવેશ પહેરીને વીડિયો કોલ કર્યો હતો અને પૂછપરછના નામે પિતા-પુત્રી પર સતત નજર રાખી હતી. 4થી 9 ઓક્ટોબર દરમિયાન તેમને ઘરમાં જ ડિજિટલ અરેસ્ટ જેવી સ્થિતિમાં રાખીને બહારની વ્યક્તિઓ સાથે સંપર્ક કરવા અને ઘટનાની હકીકત ચકાસવાથી રોકવાનો પ્રયાસ કરવામાં આવ્યો હતો.
બે ટ્રાન્ઝેક્શનમાં રૂ.14 લાખ ટ્રાન્સફર કરાવ્યા
ઠગોની વાતોમાં આવી ગયેલા અમૃતલાલ પરમારે વેરિફિકેશનના નામે પોતાના SBI બેંક ખાતામાંથી બે અલગ-અલગ ટ્રાન્ઝેક્શન કર્યાં હતાં.
7 ઓક્ટોબર: બેંક ઓફ ઇન્ડિયાના ખાતામાં રૂ.9 લાખ ટ્રાન્સફર કર્યા.
9 ઓક્ટોબર: યસ બેંકના ખાતામાં રૂ.5 લાખ ટ્રાન્સફર કર્યા.
આ રીતે કુલ રૂ.14 લાખની રકમ ટ્રાન્સફર કરાવ્યા બાદ ઠગોએ પોતાના મોબાઇલ ફોન બંધ કરી દીધા હતા. ત્યારબાદ પોતાની સાથે છેતરપિંડી થઈ હોવાની જાણ થતાં વૃદ્ધે સાયબર ક્રાઇમ હેલ્પલાઇન 1930નો સંપર્ક કર્યો હતો. હાલ આ મામલે ગાંધીનગર રેન્જ સાયબર ક્રાઇમ (Saragasan cyber crime) પોલીસ દ્વારા ફરિયાદના આધારે તપાસ હાથ ધરવામાં આવી છે.
ડિજિટલ અરેસ્ટના નામે છેતરપિંડીથી સાવધાન
પોલીસ અધિકારી, CBI, ટેલિકોમ વિભાગ કે અન્ય સરકારી એજન્સીના નામે ફોન કરીને ધરપકડની ધમકી આપવી અને પૈસા ટ્રાન્સફર કરાવવાની માગણી કરવી સાયબર ઠગોની જાણીતી પદ્ધતિ છે. વીડિયો કોલ પર પોલીસનો ગણવેશ કે સરકારી દસ્તાવેજ દેખાડવામાં આવે તો પણ તેની સત્યતા ચકાસવી જરૂરી છે.
યાદ રાખો: અજાણ્યા વ્યક્તિના દબાણમાં આવીને પૈસા ટ્રાન્સફર ન કરો. બેંકની વિગતો, OTP કે અન્ય ગુપ્ત માહિતી શેર ન કરો. સાયબર છેતરપિંડી થાય તો તાત્કાલિક 1930 પર સંપર્ક કરો અને cybercrime.gov.in પર ફરિયાદ નોંધાવો.
આ પણ વાંચો: ભાવનગરમાં ડિજિટલ લૂંટારૂઓની ‘સર્જિકલ સ્ટ્રાઈક’
આ પણ વાંચો: રૂપિયા 2700 ની કેન્સરની દવાની MRP રૂ.27000 ! દર્દીઓ સાથેની ખુલ્લી લૂંટ પર સુપ્રીમ કોર્ટ લાલઘૂમ
આ પણ વાંચો: સેટેલાઇટમાં વૃદ્ધાના ગળામાંથી ₹4.20 લાખની ચેન-પેન્ડલ લૂંટી એક્ટિવા સવાર ફરાર
