Ahmedabad News:અમદાવાદ શહેરમાં વધતા વાયુ પ્રદૂષણને નિયંત્રિત કરવા માટે, ગુજરાત પ્રદૂષણ નિયંત્રણ બોર્ડ (GPCB) એ હવે કડક અભિગમ અપનાવ્યો છે. GPCB પ્રદૂષિત ઔદ્યોગિક એકમો પર નજીકથી નજર રાખી રહ્યું છે અને અનેક એકમો તેમજ મોટા ઔદ્યોગિક સંગઠનોને કારણદર્શક નોટિસ ફટકારી છે.
GPCB દ્વારા કડક તપાસ અને સર્વેલન્સ બાદ,અમદાવાદમાં છ ઔદ્યોગિક એકમોની પ્રદૂષણના ધોરણોનું ઉલ્લંઘન કરવા બદલ ઓળખ કરવામાં આવી હતી. GPCB એ તમામ છ એકમોને સત્તાવાર કારણદર્શક નોટિસ ફટકારી છે, જેમાં તેમને પ્રદૂષણ નિયંત્રણ નિયમોના ઉલ્લંઘન પાછળના કારણો સમજાવવા નિર્દેશ આપ્યો છે. પ્રદૂષણના સ્તરને સચોટ રીતે માપવા માટે, GPCB એ મોબાઇલ વાનનો ઉપયોગ કરીને ચેકિંગ ઝુંબેશ શરૂ કરી છે. આ વાન વિવિધ ઔદ્યોગિક વિસ્તારોમાં હવાની ગુણવત્તાનું સતત નિરીક્ષણ કરી રહી છે. આ કડક દેખરેખના આધારે, GPCB એ માત્ર વ્યક્તિગત એકમોને જ નહીં પરંતુ સમગ્ર ઔદ્યોગિક વસાહતોનું સંચાલન કરતા સંગઠનોને પણ નોટિસ ફટકારી છે.
GPCBનો સકંજો
પ્રદૂષણ નિયંત્રણમાં નિષ્ફળ રહેવા બદલ GPCB દ્વારા મુખ્ય ઔદ્યોગિક સંગઠનોમાં વટવા ઇન્ડસ્ટ્રીઝ એસોસિએશન,નરોડા ઇન્ડસ્ટ્રીઝ એસોસિએશન,ઓધવ ઇન્ડસ્ટ્રીઝ એસોસિએશન,કાઠવાડા ઇન્ડસ્ટ્રીઝ એસોસિએશન અને ગુજરાત ટ્રેડર્સ મહામંડળ ઇન્ડસ્ટ્રીયલ એસ્ટેટને નોટિસ ફટકારવામાં આવી છે.
આ સંગઠનોને નોટિસ ફટકારીને, GPCBએ સ્પષ્ટ સંદેશ આપ્યો છે કે પ્રદૂષણ નિયંત્રણની જવાબદારી ફક્ત વ્યક્તિગત એકમોની જ નહીં પરંતુ સમગ્ર ઔદ્યોગિક વસાહતોનું સંચાલન કરતી સંસ્થાઓની પણ છે. જો આ એકમો સંતોષકારક પ્રતિભાવ આપવામાં નિષ્ફળ જાય અથવા સુધારાત્મક પગલાં લેવામાં નિષ્ફળ જાય, તો જીપીસીબી તેમની સામે કડક કાર્યવાહી કરી શકે છે, જેમાં તેમની કામગીરી બંધ કરવાનો પણ સમાવેશ થાય છે.
આ પણ વાંચો :અમદાવાદની હવામાં ભળ્યું પ્રદૂષણ, AQI પહોચ્યો 200ને પાર
આ પણ વાંચો :ગુજરાતમાં પ્રદૂષણથી શ્વાસની તકલીફ: દરરોજ 300 કેસ, અમદાવાદમાં AQI ખરાબ
