Gujarat News: ગુજરાતના રેલવે મુસાફરો માટે મહત્ત્વના સમાચાર છે. પ્રધાનમંત્રી નરેન્દ્ર મોદી 30 ઑક્ટોબર, 2026ના રોજ વીડિયો કૉન્ફરન્સિંગ દ્વારા ગુજરાતની બે નવી રેલ સેવાઓને (Sabarmati Varanasi Express) લીલી ઝંડી બતાવશે. તેમાં સાબરમતી–વારાણસી એક્સપ્રેસ અને મહેસાણા–બેચરાજી–સાબરમતી મેમૂ ટ્રેનનો સમાવેશ થાય છે. આ સેવાઓથી એક તરફ વારાણસીના કાશી વિશ્વનાથ ધામની યાત્રા કરતા શ્રદ્ધાળુઓને લાભ મળશે, તો બીજી તરફ ઉત્તર ગુજરાતના દૈનિક મુસાફરો અને બેચરાજી સ્થિત બહુચર માતાના ભક્તો માટે અવરજવર વધુ અનુકૂળ બનશે.

Sabarmati Varanasi Express: સાબરમતીથી વારાણસી સુધી સીધી ટ્રેન સેવા

નવી ટ્રેન નંબર 12205/12206 સાબરમતી–વારાણસી એક્સપ્રેસ દરરોજ દોડશે. આ ટ્રેન ગુજરાત, રાજસ્થાન અને ઉત્તર પ્રદેશને જોડશે. ધાર્મિક યાત્રા ઉપરાંત વેપારીઓ, વિદ્યાર્થીઓ, પ્રવાસીઓ અને અન્ય મુસાફરોને પણ આ સેવાનો લાભ મળવાની અપેક્ષા છે.

ટ્રેનનું સમયપત્રક:

સાબરમતીથી વારાણસી: ટ્રેન સવારે 5:20 વાગ્યે ઉપડશે અને બીજા દિવસે સવારે 6:30 વાગ્યે વારાણસી પહોંચશે.

વારાણસીથી સાબરમતી: ટ્રેન સાંજે 5:30 વાગ્યે ઉપડશે અને બીજા દિવસે રાત્રે 8:15 વાગ્યે સાબરમતી પહોંચશે.

માર્ગમાં આ ટ્રેન મહેસાણા, પાલનપુર, આબુ રોડ, ફાલના, મારવાડ જંક્શન, બ્યાવર, અજમેર, કિશનગઢ, જયપુર, ગાંધીનગર જયપુર, બાંદીકુઈ, માંડાવર મહવા રોડ, ખેડલી, નદબઈ, ભરતપુર, ઈદગાહ આગ્રા જંક્શન, ટૂંડલા જંક્શન, ગોવિંદપુરી, સુબેદારગંજ અને મિર્ઝાપુર સહિતનાં સ્ટેશનો પર ઊભી રહેશે.

મહેસાણા–બેચરાજી–સાબરમતી મેમૂથી દૈનિક મુસાફરોને રાહત

બીજી નવી સેવા મહેસાણા–બેચરાજી–સાબરમતી મેમૂ (Mehsana Becharaji Sabarmati MEMU) ટ્રેન છે. આ ટ્રેનથી મહેસાણા, પાટણ અને આસપાસના વિસ્તારોના લોકો માટે રેલ મુસાફરીનો વધુ એક વિકલ્પ ઉપલબ્ધ થશે. ખાસ કરીને નોકરી માટે અવરજવર કરતા લોકો, વિદ્યાર્થીઓ, વેપારીઓ અને ઔદ્યોગિક કર્મચારીઓને તેનો લાભ મળી શકે છે.

આ ટ્રેન સાબરમતી, ચાંદખેડા, કલોલ, કડી, ભોયણી, કટોસણ રોડ, બેચરાજી, ચાણસ્મા, રણુજ અને મહેસાણા સહિતનાં સ્ટેશનોને જોડશે. સવાર અને સાંજના સમય દરમિયાન ટ્રેન સેવા ઉપલબ્ધ થવાથી દૈનિક મુસાફરોને તેમની અવરજવરનું આયોજન કરવામાં સરળતા રહેશે.

બહુચર માતાના ભક્તો માટે પણ સુવિધા

મહેસાણા જિલ્લાના (Mehsana Railway) બેચરાજીમાં આવેલું શ્રી બહુચર માતા મંદિર ગુજરાતનાં જાણીતાં ધાર્મિક સ્થળોમાંનું એક છે. અહીં મોટી સંખ્યામાં શ્રદ્ધાળુઓ દર્શન માટે આવે છે. નવી મેમૂ સેવા શરૂ થવાથી સાબરમતી, કલોલ, કડી અને મહેસાણા તરફથી બેચરાજી જવા-આવવા માટે રેલવેનો વિકલ્પ વધુ ઉપયોગી બનશે.

બેચરાજી વિસ્તારમાં ઔદ્યોગિક પ્રવૃત્તિઓ પણ મહત્ત્વ ધરાવે છે. આવી સ્થિતિમાં નવી ટ્રેન સેવા સ્થાનિક રહેવાસીઓ, આસપાસનાં ગામોના લોકો અને ઉદ્યોગોમાં કામ કરતા કર્મચારીઓ માટે ઉપયોગી બની શકે છે.

મેમૂ ટ્રેનનું સવાર-સાંજનું સમયપત્રક

સવારની સેવા:

સાબરમતીથી સવારે 6:40 વાગ્યે ઉપડીને ટ્રેન સવારે 8:05 વાગ્યે બેચરાજી પહોંચશે.

બેચરાજીથી સવારે 8:07 વાગ્યે ઉપડીને ટ્રેન સવારે 9:45 વાગ્યે મહેસાણા પહોંચશે.

વળતી દિશામાં મહેસાણાથી સાંજે 4:40 વાગ્યે ઉપડશે અને સાંજે 5:49 વાગ્યે બેચરાજી પહોંચશે.

બેચરાજીથી સાંજે 5:51 વાગ્યે ઉપડીને રાત્રે 8:30 વાગ્યે સાબરમતી પહોંચશે.

સાંજની સેવા:

સાબરમતીથી સાંજે 5:05 વાગ્યે ઉપડીને ટ્રેન સાંજે 6:48 વાગ્યે બેચરાજી પહોંચશે.

બેચરાજીથી સાંજે 6:50 વાગ્યે ઉપડીને રાત્રે 8:25 વાગ્યે મહેસાણા પહોંચશે.

વળતી દિશામાં મહેસાણાથી સવારે 7:05 વાગ્યે ઉપડશે અને સવારે 7:50 વાગ્યે બેચરાજી પહોંચશે.

બેચરાજીથી સવારે 7:52 વાગ્યે ઉપડીને સવારે 10:20 વાગ્યે સાબરમતી પહોંચશે.

રેલવે કનેક્ટિવિટીથી વેપાર અને પ્રવાસનને વેગ મળવાની આશા

અમદાવાદ મંડળના મંડળ રેલ પ્રબંધક વેદ પ્રકાશે જણાવ્યું હતું કે આ બંને સેવાઓથી આંતરરાજ્ય અને પ્રાદેશિક રેલ સંપર્ક મજબૂત બનશે. સાબરમતી–વારાણસી એક્સપ્રેસ ધાર્મિક પ્રવાસન અને ત્રણ રાજ્યો વચ્ચેના સંપર્કને પ્રોત્સાહન આપશે, જ્યારે મેમૂ સેવા ઉત્તર ગુજરાતના દૈનિક મુસાફરો માટે ઉપયોગી (Indian Railways) સાબિત થઈ શકે છે.

નવી સેવાઓથી સ્થાનિક વેપાર, રોજગાર, ઔદ્યોગિક પ્રવૃત્તિઓ અને પ્રવાસનને વેગ મળવાની અપેક્ષા છે. જોકે, મુસાફરી પહેલાં મુસાફરોએ રેલવે તરફથી જાહેર કરાયેલા અંતિમ સમયપત્રક અને સ્ટોપેજની વિગતો તપાસવી જરૂરી છે.

આ પણ વાંચો: દિવાળી પહેલાં રેલવેની ભેટ! દિલ્હી-બનારસ વચ્ચે દોડશે વંદે ભારત સ્લીપર ટ્રેન, જાણો સ્ટોપેજ અને ટાઈમિંગ

આ પણ વાંચો: વડોદરામાં રેલવે સુવિધા વધારવાની માગ, ડભોઈમાં અંડરપાસ અને નવી ટ્રેન માટે રજૂઆત

આ પણ વાંચો: રેલવે સ્ટેશનના કાઉન્ટરથી ટિકિટ લેનારાને પણ મળશે મુસાફરી વીમાનું કવર