Gandhinagar News: ગુજરાત વિધાનસભાની ચૂંટણી (BJP Mission 2027)ને હજુ એક વર્ષથી વધુનો સમય બાકી છે, પરંતુ ભારતીય જનતા પાર્ટીએ અત્યારથી જ 2027ની ચૂંટણી માટે સંગઠનાત્મક તૈયારીઓ શરૂ કરી દીધી છે. 2022ની ચૂંટણીમાં 182માંથી 156 બેઠકો જીતીને ભાજપે ગુજરાતના રાજકીય ઇતિહાસમાં પોતાનું સૌથી શાનદાર પ્રદર્શન નોંધાવ્યું હતું. હવે 2027માં આ પ્રદર્શનને જાળવી રાખવાનો પડકાર પાર્ટી સામે છે.

આ જ દિશામાં ગુજરાત ભાજપના નવા પ્રભારી તરુણ ચુગે રાજ્યમાં પોતાની સક્રિયતા વધારી છે. તેમના પ્રથમ ગુજરાત પ્રવાસ દરમિયાન ગાંધીનગર સ્થિત કમલમ ખાતે સંગઠનથી લઈને સરકાર સુધી બેઠકોનો દોર જોવા મળ્યો. આ મુલાકાતે સ્પષ્ટ સંકેત આપ્યો છે કે ચૂંટણી ભલે 2027માં યોજાવાની હોય, પરંતુ ભાજપે અત્યારથી જ ‘મિશન 2027’ને (BJP Mission 2027) ગતિ આપી દીધી છે.

BJP Mission 2027: કમલમમાં બેઠકોનો ધમધમાટ, સંગઠનની કામગીરીની સમીક્ષા

તરુણ ચુગે ગુજરાતના પ્રથમ પ્રવાસ દરમિયાન પ્રદેશ ભાજપના વિવિધ મોરચાના અધ્યક્ષો સાથે બેઠકો કરી હતી. બેઠકમાં સંગઠનની વર્તમાન કામગીરી, આગામી કાર્યક્રમો અને ચૂંટણીલક્ષી તૈયારીઓ અંગે ચર્ચા કરવામાં આવી હતી. આ ઉપરાંત રાજ્યના વિવિધ જિલ્લાઓ અને મહાનગરોમાં પાર્ટીની કામગીરીનો પણ રિવ્યૂ કરવામાં આવ્યો હતો. એટલે કે ભાજપનું ફોકસ માત્ર ગાંધીનગર કે પ્રદેશ સંગઠન પૂરતું નથી, પરંતુ જિલ્લા અને સ્થાનિક સ્તરે સંગઠનને પણ ચૂંટણી માટે સક્રિય કરવાની દિશામાં કામગીરી શરૂ થઈ ગઈ છે.

મુખ્ય મુદ્દા:

જિલ્લા અને મહાનગરોમાં ભાજપની કામગીરીની સમીક્ષા

વિવિધ મોરચાના અધ્યક્ષો સાથે બેઠક

સંગઠનના આગામી કાર્યક્રમો અંગે ચર્ચા

2027ની ચૂંટણી (BJP Mission 2027)ને ધ્યાનમાં રાખીને ગ્રાઉન્ડ લેવલ પર તૈયારીઓ

સંગઠન બાદ સરકાર સાથે પણ બેઠક

તરુણ ચુગની મુલાકાત માત્ર ભાજપના સંગઠન સુધી સીમિત રહી નહોતી. તેમણે મુખ્યમંત્રી ભૂપેન્દ્ર પટેલ અને રાજ્યના મંત્રીમંડળના સભ્યો સાથે પણ બેઠક કરી હતી. સંગઠન અને સરકાર વચ્ચે સંકલન, આગામી રાજકીય આયોજન અને ચૂંટણીની દિશામાં તૈયારીઓના સંદર્ભમાં આ મુલાકાતને મહત્વપૂર્ણ માનવામાં આવી રહી છે. આ દરમિયાન પૂર્વ મુખ્યમંત્રી વિજય રૂપાણીના પત્ની અંજલી રૂપાણી અને પુત્ર ઋષભ રૂપાણી સાથેની ચુગની મુલાકાતે પણ રાજકીય વર્તુળોમાં ચર્ચા જગાવી હતી. પ્રદેશ ભાજપ પ્રમુખ જગદીશ વિશ્વકર્મા પણ ચુગ સાથેની વિવિધ બેઠકોમાં ઉપસ્થિત રહ્યા હતા.

9થી 11 સપ્ટેમ્બર ફરી ગુજરાત આવશે તરુણ ચુગ

તરુણ ચુગ ફરી એક વખત ત્રણ દિવસના ગુજરાત પ્રવાસે આવવાના છે. 9થી 11 સપ્ટેમ્બર દરમિયાન તેઓ રાજ્યમાં વિવિધ નેતાઓ અને સંગઠનના પદાધિકારીઓ સાથે બેઠકો કરશે. આ પ્રવાસ દરમિયાન વડાપ્રધાન નરેન્દ્ર મોદીના જન્મદિવસ નિમિત્તે યોજાનારા કાર્યક્રમોની તૈયારીઓની પણ સમીક્ષા કરવામાં આવશે. ભાજપના સંગઠનને વધુ સક્રિય બનાવવા માટે ચુગ દર મહિને એકથી બે વખત ગુજરાતની મુલાકાત લે તેવી પણ કવાયત હાથ ધરાઈ રહી છે. આ ઉપરાંત રાજ્યના તમામ જિલ્લાઓમાં સંગઠનાત્મક પ્રવાસ કરવાનો પણ પ્લાન છે.

BJP Mission 2027 માટે ભાજપ અત્યારથી કેમ સક્રિય?

ભાજપની વહેલી ચૂંટણીલક્ષી તૈયારીઓ પાછળ સૌથી મોટું કારણ 2022નું પ્રદર્શન માનવામાં આવે છે. 2022ની ગુજરાત વિધાનસભા ચૂંટણીમાં ભાજપે કુલ 182માંથી 156 બેઠકો જીતી હતી. આ સાથે પાર્ટીએ ગુજરાતમાં અત્યાર સુધીનું સૌથી મોટું ચૂંટણી પ્રદર્શન નોંધાવ્યું હતું. બીજી તરફ કોંગ્રેસ અને આમ આદમી પાર્ટી સહિતના વિપક્ષની સ્થિતિ એવી રહી હતી કે વિધાનસભામાં વિપક્ષના નેતાનું પદ મેળવવા માટે જરૂરી સંખ્યા પણ પૂર્ણ થઈ નહોતી. હવે 2027 (BJP Mission 2027)માં ભાજપ સામે પડકાર માત્ર સત્તા જાળવવાનો નથી, પરંતુ આ ઐતિહાસિક આંકડાની આસપાસ ફરી એકવાર પોતાનું પ્રભુત્વ સાબિત કરવાનો પણ છે.

તરુણ ચુગ માટે તક પણ અને પડકાર પણ

ગુજરાત ભાજપના પ્રભારી તરીકે તરુણ ચુગની જવાબદારી એવા રાજ્યમાં આવી છે, જે વડાપ્રધાન નરેન્દ્ર મોદી અને કેન્દ્રીય ગૃહમંત્રી અમિત શાહનું ગૃહરાજ્ય છે. તેથી ગુજરાતની ચૂંટણી પર રાષ્ટ્રીય સ્તરે પણ ભાજપનું ખાસ ધ્યાન રહેવાનું સ્વાભાવિક છે. ચુગ સંગઠનના ક્ષેત્રમાં લાંબો અનુભવ ધરાવે છે. તેઓ અલગ-અલગ રાજ્યોમાં પ્રભારી અને સહપ્રભારી તરીકે જવાબદારી સંભાળી ચૂક્યા છે. મૂળ પંજાબના અમૃતસરના વતની ચુગે પંજાબમાં ભાજપનું સંગઠન મજબૂત બનાવવાની કામગીરી કરી છે. આ ઉપરાંત લદ્દાખ તથા જમ્મુ-કાશ્મીર જેવા વિસ્તારોમાં ચૂંટણીની વ્યૂહરચના ઘડવામાં પણ તેમની ભૂમિકા રહી છે.

તેઓ રાજ્યસભાના સાંસદ પણ છે. હવે ગુજરાત જેવી રાજકીય રીતે અત્યંત મહત્વપૂર્ણ જવાબદારી તેમના રાજકીય કદને વધુ મજબૂત કરવાની તક બની શકે છે. જોકે 2027ની (BJP Mission 2027) ચૂંટણીમાં અપેક્ષિત પરિણામ ન મળે તો તેની અસર તેમની સંગઠનાત્મક કારકિર્દી પર પણ પડી શકે છે, આ જ કારણસર ગુજરાતની જવાબદારી તેમના માટે તક સાથે પડકાર પણ બની છે.

જગદીશ વિશ્વકર્મા માટે પણ લિટમસ ટેસ્ટ

પ્રદેશ ભાજપ પ્રમુખ તરીકે જગદીશ વિશ્વકર્મા માટે પણ 2027ની ચૂંટણી (BJP Mission 2027) અત્યંત મહત્વપૂર્ણ માનવામાં આવી રહી છે. તેમની સામે એક મોટો પડકાર પૂર્વ પ્રદેશ પ્રમુખ સીઆર પાટીલના સમયગાળામાં સર્જાયેલા ચૂંટણી રેકોર્ડને જાળવી રાખવાનો છે. 156 બેઠકોનો આંકડો ભાજપ માટે હવે માત્ર એક આંકડો નહીં પરંતુ એક રાજકીય માપદંડ બની ગયો છે. આથી વિશ્વકર્મા માટે 2027ની ચૂંટણી પોતાની સંગઠનાત્મક ક્ષમતા સાબિત કરવાની મોટી તક બની શકે છે. જો ભાજપ ફરી મજબૂત બહુમતી સાથે સત્તામાં આવે અને 2022ના પ્રદર્શનની નજીક પહોંચે, તો પ્રદેશ પ્રમુખ તરીકે તેમનું કદ વધુ મજબૂત થઈ શકે છે.

માત્ર ચુગ-વિશ્વકર્મા જ નહીં, હર્ષ સંઘવી અને રત્નાકર માટે પણ મહત્વની ચૂંટણી

2027ની ચૂંટણી (BJP Mission 2027)નો પ્રભાવ માત્ર પ્રદેશ પ્રભારી અને પ્રદેશ પ્રમુખ પૂરતો મર્યાદિત નહીં રહે. રાજ્યના રાજકારણમાં મહત્વપૂર્ણ ભૂમિકા ભજવતા હર્ષ સંઘવી અને સંગઠન મંત્રી રત્નાકર માટે પણ આ ચૂંટણી અગત્યની રહેશે. ખાસ કરીને હર્ષ સંઘવીનું સંગઠન અને સરકારમાં રાજકીય કદ પણ આગામી ચૂંટણીમાં માપવામાં આવશે. ભાજપ માટે સરકાર, સંગઠન અને ચૂંટણી મશીનરી વચ્ચેનું સંકલન કેટલું અસરકારક રહે છે, તેની પણ કસોટી થશે.

રાહુલ ગાંધી અને કેજરીવાલ સક્રિય થાય તો પડકાર વધી શકે

ગુજરાત ભાજપ માટે સૌથી મોટો પડકાર માત્ર પોતાની અંદરની સંગઠનાત્મક કામગીરીનો નથી. જો 2027ની ચૂંટણી દરમિયાન કોંગ્રેસના નેતા રાહુલ ગાંધી અને આમ આદમી પાર્ટીના નેતા અરવિંદ કેજરીવાલ ગુજરાતમાં સક્રિય રીતે પ્રચાર કરે તો ભાજપ સામે રાજકીય મુકાબલો વધુ રસપ્રદ બની શકે છે. 022માં ભાજપે 156 બેઠકો સાથે ઐતિહાસિક જીત મેળવી હતી. હવે 2027માં (BJP Mission 2027) આ રેકોર્ડ જાળવવા માટે ભાજપે સંગઠનથી લઈને સરકાર સુધીની તમામ તૈયારીઓ અત્યારથી જ શરૂ કરી છે.

અંતે 2027ની ચૂંટણી (BJP Mission 2027) માત્ર ભાજપ વિરુદ્ધ કોંગ્રેસ કે આમ આદમી પાર્ટીની લડાઈ નહીં રહે, પરંતુ ભાજપના નવા સંગઠનાત્મક નેતૃત્વની ક્ષમતા અને રાજકીય પ્રભાવની પણ મોટી કસોટી બની શકે છે. તરુણ ચુગ માટે ગુજરાતમાં પ્રભારી તરીકેનું પરિણામ રાષ્ટ્રીય રાજકારણમાં તેમની આગળની સફર માટે મહત્વપૂર્ણ બની શકે છે, જ્યારે જગદીશ વિશ્વકર્મા માટે આ ચૂંટણી પ્રદેશ પ્રમુખ તરીકેના નેતૃત્વનું પરિણામ નક્કી કરનારી બની શકે છે. હવે સૌથી મોટો સવાલ એ છે કે 2027માં (BJP Mission 2027) ભાજપ ફરી 156નો આંકડો પાર કરશે કે ગુજરાતના રાજકીય મેદાનમાં કોઈ નવું સમીકરણ જોવા મળશે?

આ પણ વાંચો:ભાજપે 3 રાજ્યોમાં પ્રભારી બદલ્યા: ગુજરાતમાં તરુણ ચુગ, UPમાં વિનોદ તાવડે, પંજાબમાં સતીશ પૂનિયા

આ પણ વાંચો:ગાંધીનગરમાં ભાજપની હાઈપ્રોફાઈલ બેઠક, ટાઉનહોલ પહેલાં સર્કિટ હાઉસમાં બંધબારણે મંથન

આ પણ વાંચો:જયેશ રાદડિયા સામે પ્રશાંત કોરાટની પ્રતિષ્ઠાની કસોટી! લોધિકા સહકારી ચૂંટણી પર સૌની નજર