અમદાવાદ: સ્કૂલમાં ઠપકો આપનાર શિક્ષિકા (ટીચર) સામે બદલો લેવા માટે ધોરણ 11માં અભ્યાસ કરતા વિદ્યાર્થીએ શિક્ષિકાના નામે ઈન્સ્ટાગ્રામ પર ‘રીના સેક્સી ભાભી’ના નામે ફેક એકાઉન્ટ બનાવ્યું હતું. આ એકાઉન્ટ દ્વારા અન્ય લોકોને અશ્લીલ મેસેજ મોક્લો હતો. જો કે આ અંગેની ફરિયાદ થતાં આખરે આ સમગ્ર ભાંડો ફૂટી ગયો હતો.
આ અંગે પ્રાપ્ત માહિતી મુજબ અમદાવાદ શહેરના ચાંદખેડા વિસ્તારની એક પ્રતિષ્ઠિત સ્કૂલના શિક્ષિકાના નામે કેટલાક દિવસથી સોશિયલ મિડિયામાં ઈન્સ્ટાગ્રામ ઉપર તેમના નામે લોકોને મેસેજ મોકલવામાં આવતા હતા. સામાન્ય રીતે સોશિયલ મિડિયાથી દૂર રહેનારા શિક્ષિકાને તેમના મિત્રો અને સંબંધીઓએ તેમના થકી આવી રહેલા મેસેજ બાબતે પૂછતાં તેઓ ચોંકી ઉઠયા હતા. આ અંગે શિક્ષિકા દ્વારા તપાસ કરતા ખબર પડી હતી કે, કોઈ વ્યક્તિએ તેમના નામનો ઉપયોગ કરી બોગસ ઈન્સ્ટાગ્રામ એકાઉન્ટ બનાવ્યું છે.
આ બાબત ખુલતા શિક્ષિકાએ આ અંગે સાઈબર ક્રાઈમ બ્રાન્ચના ડીસીપી ડૉ. રાજદીપસિંહ ઝાલાને મળી આ મામલે રજૂઆત કરી યોગ્ય તપાસની માંગણી કરી હતી. જેના અંતર્ગત ડીસીપી ડૉ. ઝાલાએ તાત્કાલિક આરોપીને શોધવા માટેની કાર્યવાહી પી.આઈ. જે. એસ. ગેડમને સોંપવામાં આવી હતી.
આ મામલે પોલીસ દ્વારા હાથ ધરાયેલી તપાસમાં ટેક્નિકલ એનાલિસિસને અંતે એવું બહાર આવ્યું હતું કે, આ શિક્ષિકાએ તેના એક વિદ્યાર્થીને અભ્યાસમાં ધ્યાન નહીં આપવા બદલ તેમજ વર્ગરૂમમાં તોફાન કરવા બદલ ઠપકો આપીને ખખડાવ્યો હતો. આ બાબતના કારણે સગીર વિદ્યાર્થીએ શિક્ષિકાને બદનામ કરવાના ઈરાદે ઈન્સ્ટાગ્રામ પર બોગસ એકાઉન્ટ બનાવ્યું હતું.
આ મામલે પોલીસે સગીરના વાલીઓને આ અંગે જાણ કરી સગીરને ડિટેઈન કરી પૂછપરછ કરી હતી. આ પૂછપરછમાં તેણે પોતે શિક્ષિકાને હેરાન પરેશાન કરવા માટે અને સમાજમાં શિક્ષિકાની આબરૂ જાય તેવા બદઈરાદાથી આ કૃત્ય કર્યાની કબૂલાત કરી હતી. જોકે પોલીસે આ વિદ્યાર્થી સગીરવયનો હોવાથી તેને ચેતવણી આપી આગળની કાર્યવાહી હાથ ધરી હતી.
