Gujarat News: ગુજરાતના વહીવટી અને પોલીસ તંત્રમાં એક પરિવાર (Meena Family)ની સિદ્ધિ ચર્ચાનું કેન્દ્ર બની છે. એક જ પરિવારના ચાર સભ્યો સનદી સેવામાં જોડાયેલા છે, જેમાં ત્રણ સભ્યો IAS અને એક સભ્ય IPS અધિકારી છે. પિતા, પુત્ર, પુત્રવધૂ અને દીકરી, ચારેયે સિવિલ સર્વિસમાં સ્થાન મેળવી પરિવાર માટે અનોખી સિદ્ધિ નોંધાવી છે. કૃષિ અને સહકાર વિભાગના અગ્રસચિવ રમેશચંદ્ર મીણાના પરિવાર સાથે જોડાયેલી આ સિદ્ધિ વહીવટી વર્તુળોમાં ચર્ચાનો વિષય બની છે.
Meena Family: પિતા IAS, પુત્ર-પુત્રવધૂ IAS અને દીકરી IPS
રમેશચંદ્ર મીણા 1997 બેચના IAS અધિકારી છે અને હાલમાં ગુજરાત સરકારના કૃષિ તથા સહકાર વિભાગમાં અગ્રસચિવ તરીકે જવાબદારી સંભાળી રહ્યા છે. તેમના પુત્ર હર્ષિલ મીણાએ પણ UPSCની પરીક્ષા પાસ કરીને 2021માં IAS તરીકે સેવા પસંદ કરી હતી. તેમને શરૂઆતમાં કેરળ કેડર ફાળવવામાં આવ્યું હતું. હર્ષિલે કેરળના વાયનાડ જિલ્લામાં પ્રોબેશન દરમિયાન વહીવટી તાલીમ મેળવી હતી. ત્યારબાદ હર્ષિલ મીણાના લગ્ન 2024 બેચના ગુજરાત કેડરના IAS અધિકારી ધારિણી એમ. સાથે થયા હતા. લગ્ન બાદ હર્ષિલની કેડર કેરળમાંથી ગુજરાતમાં બદલાઈ હોવાનું જણાવવામાં આવ્યું છે. આ બદલાવ બાદ હવે તેઓ ગુજરાત કેડરમાં સેવા આપશે.
ભાઈ IAS, બહેન IPS
રમેશચંદ્ર મીણાની દીકરી માનસી મીણા પણ UPSCની પરીક્ષા પાસ કરીને પોલીસ સેવામાં જોડાઈ છે. માનસી મીણા 2023 બેચના ગુજરાત કેડરના IPS અધિકારી છે. આ રીતે એક જ પરિવાર (Meena Family)ના ભાઈ-બહેનમાંથી એક IAS અને બીજાં IPS અધિકારી બન્યા છે. બંનેએ અમદાવાદ અને ગાંધીનગરમાં શિક્ષણ મેળવ્યું હોવાનું જણાવવામાં આવે છે. UPSCની તૈયારી દરમિયાન પણ પરિવારનું વાતાવરણ અભ્યાસ અને જાહેર સેવાના ક્ષેત્ર સાથે જોડાયેલું રહ્યું હતું. આ સમયગાળા દરમિયાન રમેશચંદ્ર મીણા કોવિડ-19ના સમયગાળામાં SPIPAના ડાયરેક્ટર જનરલ તરીકે પણ જવાબદારી સંભાળી રહ્યા હતા.
સાસરીયા અને પરિવાર બંને તરફથી સિવિલ સર્વિસનો સંબંધ
મીણા પરિવારની આ વાતને વધુ રસપ્રદ બનાવતી બાબત એ છે કે હર્ષિલ મીણાના જીવનસાથી ધારિણી એમ. પણ IAS અધિકારી છે. એટલે પરિવાર (Meena Family)ના ચાર સભ્યોની ગણતરીમાં પિતા રમેશચંદ્ર મીણા, પુત્ર હર્ષિલ મીણા, પુત્રવધૂ ધારિણી એમ. અને દીકરી માનસી મીણાનો સમાવેશ થાય છે. આ ચારેય સભ્યો વહીવટી અને પોલીસ સેવામાં ઉચ્ચ જવાબદારીઓ સાથે જોડાયેલા છે.
UPSC જેવી મુશ્કેલ પરીક્ષામાં પરિવારની ચાર સફળતા
UPSC સિવિલ સર્વિસ પરીક્ષા દેશની સૌથી સ્પર્ધાત્મક પરીક્ષાઓમાંની એક છે. દર વર્ષે લાખો ઉમેદવારો પરીક્ષા આપે છે, પરંતુ અંતિમ પસંદગી સુધી પહોંચનારા ઉમેદવારોની સંખ્યા પ્રમાણમાં ઘણી ઓછી હોય છે. આવા સંજોગોમાં એક જ પરિવારના અલગ-અલગ સભ્યો દ્વારા IAS અને IPS જેવી સેવાઓમાં સ્થાન મેળવવું ચોક્કસપણે નોંધપાત્ર બાબત છે. મીણા પરિવાર (Meena Family)ની આ સિદ્ધિ યુવાનો માટે પણ પ્રેરણારૂપ બની શકે છે.
પરિવારની સિદ્ધિ એક નજરમાં
રમેશચંદ્ર મીણા – 1997 બેચ, IAS
હર્ષિલ મીણા – 2021 બેચ, IAS
ધારિણી એમ. – 2024 બેચ, IAS
માનસી મીણા – 2023 બેચ, IPS
આ રીતે એક જ પરિવાર (Meena Family)ના ચાર સભ્યો દેશની પ્રતિષ્ઠિત સનદી સેવાઓમાં પહોંચ્યા છે. ગુજરાતના વહીવટી તંત્રના સંદર્ભમાં આ અનોખી ઘટના તરીકે ચર્ચાઈ રહી છે.
આ પણ વાંચો:ગાંધીનગરના કાવાદાવા: કમલમમાં બદલાવથી IAS-IPS લોબીની ચર્ચા સુધી, દિલ્હીની મુલાકાતો કેમ વધી?
આ પણ વાંચો:ગુજરાતના રાજકારણમાં નવી ચર્ચા, આગામી મુખ્ય સચિવની રેસમાં મહિલા IAS અધિકારીઓનાં નામો
