Gujarat News: ગુજરાતની ઊર્જા યાત્રામાં (Gujarat Nuclear Power Project) આજે એક મહત્વપૂર્ણ પહેલ કરવામાં આવી છે. રાજ્યની વીજ ઉત્પાદન કંપની ગુજરાત સ્ટેટ ઇલેક્ટ્રિસિટી કોર્પોરેશન લિમિટેડ હવે પ્રથમ વખત પરમાણુ ઊર્જા ક્ષેત્રમાં પ્રવેશ કરવા જઈ રહી છે. આ માટે GSECL અને ન્યુક્લિયર પાવર કોર્પોરેશન ઑફ ઇન્ડિયા લિમિટેડ વચ્ચે ગુજરાતમાં નવા ન્યુક્લિયર પાવર પ્રોજેક્ટ (Gujarat Nuclear Power Project)ના વિકાસ માટે સમજૂતી કરાર કરવામાં આવ્યો છે.
Gujarat Nuclear Power Project: GSECL પ્રથમ વખત પરમાણુ ઊર્જા ક્ષેત્રમાં પ્રવેશ કરશે
ગાંધીનગરમાં GSECL અને NPCIL વચ્ચે થયેલા આ સમજૂતી કરારને ગુજરાતની ઊર્જા યાત્રામાં મહત્વપૂર્ણ પગલું માનવામાં આવી રહ્યું છે. આ કરાર સાથે ગુજરાતની સરકારી વીજ ઉત્પાદન કંપની GSECL પ્રથમ વખત પરમાણુ ઊર્જા (Nuclear Energy) ક્ષેત્રમાં પ્રવેશ કરશે.
ગુજરાતે અત્યાર સુધી સૌર ઊર્જા અને પવન ઊર્જા સહિત નવીનીકરણીય ઊર્જા (Renewable Energy)ના ક્ષેત્રમાં નોંધપાત્ર પ્રગતિ કરી છે. હવે પરમાણુ ઊર્જાના ક્ષેત્રમાં પ્રવેશ સાથે રાજ્યની લાંબા ગાળાની વીજ વ્યવસ્થાને વધુ મજબૂત બનાવવાની દિશામાં પગલું ભરાયું છે.
ધુવારણમાં 4000 મેગાવોટ ક્ષમતાનો પ્રોજેક્ટ
આ પ્રોજેક્ટ માટે ધુવારણ (Dhuvaran) ખાતે આશરે 4000 મેગાવોટ ક્ષમતાના પરમાણુ વીજ પ્રોજેક્ટની સંભાવના છે. પ્રોજેક્ટ સાકાર થાય તો ગુજરાતની વીજ ઉત્પાદન ક્ષમતામાં નોંધપાત્ર વધારો થઈ શકે છે.
આ પ્રોજેક્ટમાં આશરે રૂ. 1 લાખ કરોડના રોકાણ (Investment)ની દિશામાં મહત્વપૂર્ણ પગલું ભરાયું છે. મોટા પાયે થનારા આ સંભવિત રોકાણથી રોજગારીની નવી તકો ઊભી થવાની સાથે સ્થાનિક ઉદ્યોગ અને અર્થતંત્રને પણ વેગ મળવાની શક્યતા છે.
નવીનીકરણીય ઊર્જાને મળશે સતત વીજળીનો આધાર
ગુજરાતે વર્ષ 2030 સુધીમાં 100 ગીગાવોટથી વધુ નવીનીકરણીય ઊર્જા ક્ષમતા (Renewable Energy Capacity) સ્થાપવાનો લક્ષ્યાંક નક્કી કર્યો છે. સૌર અને પવન ઊર્જાનું ઉત્પાદન કુદરતી પરિસ્થિતિઓ પર આધારિત હોવાથી વીજ ગ્રીડની સ્થિરતા માટે સતત વીજળી પૂરી પાડતા સ્ત્રોતોનું મહત્વ વધી રહ્યું છે.
પરમાણુ ઊર્જા સતત વીજ ઉત્પાદન કરવાની ક્ષમતા ધરાવતી હોવાથી તે નવીનીકરણીય ઊર્જાને પૂરક બની શકે છે. આથી ગુજરાતની વીજ વ્યવસ્થામાં વિવિધ ઊર્જા સ્ત્રોતો વચ્ચે સંતુલન જાળવવામાં મદદ મળી શકે છે.
હાલ અભ્યાસ અને મૂલ્યાંકનની પ્રક્રિયા થશે
સમજૂતી કરાર થયા બાદ પ્રોજેક્ટનું બાંધકામ તાત્કાલિક શરૂ થઈ જશે એવું નથી. પ્રથમ તબક્કામાં GSECL દ્વારા જમીન અને જરૂરી માળખાકીય સુવિધાઓનું મૂલ્યાંકન કરવામાં આવશે.
બીજી તરફ NPCIL દ્વારા સ્થળનું સર્વેક્ષણ, તકનીકી અભ્યાસ અને જરૂરી નિષ્ણાત માર્ગદર્શન આપવામાં આવશે. ત્યારબાદ પ્રોજેક્ટની તકનીકી અને આર્થિક વ્યવહારિકતા (Technical and Economic Feasibility) તેમજ જરૂરી વૈધાનિક મંજૂરીઓના આધારે આગળની કામગીરી નક્કી કરવામાં આવશે.
ગુજરાતની ઊર્જા સુરક્ષા માટે મહત્વપૂર્ણ પગલું
પરમાણુ વીજ પ્રોજેક્ટ સાકાર થાય તો ગુજરાતને લાંબા ગાળે સતત અને વિશ્વસનીય વીજ પુરવઠો જાળવવામાં મદદ મળી શકે છે. સાથે જ ઓછા કાર્બન ઉત્સર્જનવાળી વીજ વ્યવસ્થાના વિકાસમાં પણ તેનો ફાળો રહી શકે છે.
GSECL અને NPCIL વચ્ચે થયેલો આ કરાર ગુજરાતની ઊર્જા સુરક્ષા (Energy Security)ને વધુ મજબૂત બનાવવાની દિશામાં મહત્વપૂર્ણ પગલું છે. જોકે પ્રોજેક્ટની અંતિમ ક્ષમતા, બાંધકામ અને અમલવારી અંગેની વિગતો આગામી તકનીકી અભ્યાસ અને જરૂરી મંજૂરીઓ બાદ સ્પષ્ટ થશે.
આ પણ વાંચો: PM મોદીના ‘નેટ ઝીરો’ વિઝનમાં ગુજરાતની મોટી સિદ્ધિ, ગ્રીન વીજ ઉત્પાદનમાં ઐતિહાસિક વધારો
આ પણ વાંચો: અદાણી ગ્રુપે ખાવડા ખાતે એક હજાર મેગાવોટનું વીજ ઉત્પાદન શરૂ કર્યું
આ પણ વાંચો: છેલ્લા ત્રણ વર્ષમાં ચાલુ વર્ષે ગેસ આધારિત વીજળીનું સૌથી વધુ ઉત્પાદન
