National News : સ્વર્ગમાં 72 હૂરના (72 Hoor Debate)ધાર્મિક ખ્યાલને લઈને યુટ્યુબર હુદા જરીવાલા (Huda Jariwala) અને દેવબંદી ધર્મગુરુ કારી ઇશાક ગોરા (Qari Ishaq Gora)વચ્ચે વિવાદ વકર્યો છે. મહિલાઓને પણ સ્વર્ગમાં 72 પુરુષો મળવા જોઈએ તેવી ટિપ્પણી બાદ ધાર્મિક માન્યતાઓ અને મહિલાઓના સન્માન અંગે ચર્ચા શરૂ થઈ છે. હુદાએ મૌલાના પર મુસ્લિમ મહિલાઓને નિશાન બનાવવાનો આરોપ લગાવી આકરા શબ્દોમાં પ્રતિક્રિયા આપી છે.

શું છે સમગ્ર વિવાદ?

હુદા જરીવાલાએ 9 ઓક્ટોબરના રોજ એક પોડકાસ્ટમાં ભાગ લીધો હતો. આ દરમિયાન તેમને પૂછવામાં આવ્યું હતું કે સ્વર્ગમાં 72 હૂર મળવાની માન્યતા મહિલાઓને પણ લાગુ પડે છે કે નહીં. તેના જવાબમાં હુદાએ કહ્યું હતું કે મહિલાઓ માટે પણ આવી જ વ્યવસ્થા હોવી જોઈએ અને તેમને પણ 72 પુરુષો મળી શકે છે. તેમણે હૂરના ખ્યાલને લઈને પોતાનો અભિપ્રાય રજૂ કરતાં તેમની ભૂમિકા અંગે પણ વાત કરી હતી.

આ નિવેદન બાદ કેટલાક મુસ્લિમ વિદ્વાનો અને ધાર્મિક આગેવાનોએ વાંધો ઉઠાવ્યો હતો. તેમના મતે, ધાર્મિક માન્યતાઓ વિશે વાત કરતી વખતે પૂરતું જ્ઞાન અને સચોટ માહિતી હોવી જરૂરી છે.

કારી ઇશાક ગોરાએ શું કહ્યું?

દેવબંદી ધર્મગુરુ કારી ઇશાક ગોરા (Qari Ishaq Gora)એ હુદાના નિવેદન અંગે સવાલો ઉઠાવ્યા હતા. તેમણે જણાવ્યું હતું કે ધાર્મિક બાબતોને વ્યક્તિગત વિચારો કે અનુમાનના આધારે સમજવી યોગ્ય નથી. કોઈ વિષયનું પૂરતું જ્ઞાન ન હોય તો તેના વિશે ઉતાવળમાં ટિપ્પણી કરવાનું ટાળવું જોઈએ.

મૌલાનાએ આ મુદ્દે સોશિયલ મીડિયા પર પણ વાત કરી હતી. તેમના જણાવ્યા અનુસાર, હુદાના નામે આવેલા એક એકાઉન્ટમાંથી તેમને સંદેશા મળ્યા હતા, જેમાં પોસ્ટ દૂર કરવાની અને કાનૂની કાર્યવાહી કરવાની વાત કરવામાં આવી હતી.

હુદાએ મૌલાનાને આપ્યો જવાબ

હુદા જરીવાલા (Huda Jariwala)એ મૌલાનાને મોકલેલા સંદેશામાં આકરી ભાષાનો ઉપયોગ કર્યો હતો. તેમણે મૌલાના પર મુસ્લિમ મહિલાઓ (Muslim Women)ને બદનામ કરવાનો અને તેમને નિશાન બનાવવાનો આરોપ લગાવ્યો હતો. હુદાએ પોતાની પ્રતિષ્ઠાને નુકસાન પહોંચાડવામાં આવતું હોવાની વાત કરી અને જાહેરમાં માફી માગવાની માંગ કરી હતી.

હુદાએ વધુમાં પોલીસ ફરિયાદ નોંધાવવાની અને કોર્ટમાં કાનૂની લડત આપવાની વાત પણ કરી હતી. તેમણે મૌલાનાને ચેતવણી આપતાં કહ્યું કે તેઓ આ મુદ્દે સોશિયલ મીડિયા પર પોતાની વાત રજૂ કરશે.

બીજી તરફ, કારી ઇશાક ગોરા (Qari Ishaq Gora)એ હુદાને પોતાનું નિવેદન પાછું ખેંચવા અને મુસ્લિમ સમુદાયની માફી માગવા જણાવ્યું હતું. તેમણે કહ્યું કે તેમનો હેતુ કોઈનું અપમાન કરવાનો નહીં, પરંતુ ધાર્મિક બાબતો અંગેની ચર્ચામાં સત્ય રજૂ કરવાનો છે.

કોણ છે હુદા જરીવાલા?

હુદા જરીવાલા (Huda Jariwala)યુટ્યુબર અને સામાજિક કાર્યકર તરીકે ઓળખાય છે. તેઓ અગાઉ આમ આદમી પાર્ટી સાથે પ્રવક્તા તરીકે જોડાયેલાં હતાં અને બીબીસી લંડનમાં કામ કર્યું હોવાનો પણ ઉલ્લેખ થાય છે. તેમના મામા ડૉ. અઝીઝ કુરેશી કોંગ્રેસના વરિષ્ઠ નેતા રહી ચૂક્યા છે. તેમણે ઉત્તરાખંડ, ઉત્તર પ્રદેશના વધારાના હવાલા અને મિઝોરમના રાજ્યપાલ તરીકે સેવા આપી હતી.

હાલમાં હુદા જરીવાલા અને કારી ઇશાક ગોરા (Muslim Women)વચ્ચેનો આ વિવાદ સોશિયલ મીડિયા પર ચર્ચાનો વિષય બન્યો છે. જોકે, આ મામલે કોઈ કાનૂની કાર્યવાહી થઈ છે કે નહીં તે અંગે સ્વતંત્ર પુષ્ટિ ઉપલબ્ધ નથી.

આ પણ વાંચો: કુરાન સાથે શપથ લઈને ઇતિહાસ રચનાર ઝોહરાન મમદાની, ન્યૂયોર્કના પ્રથમ મુસ્લિમ મેયર

આ પણ વાંચો: ભારતમાં ક્યારે આગળ નીકળશે મુસ્લિમોની વસ્તી? જાણો શું કહે છે રીપોર્ટ

આ પણ વાંચો: મુસ્લિમ પર્સનલ લો બોર્ડ પર ગુસ્સે થયા જાવેદ અખ્તર, કરી આકરી નિંદા