Sabarkantha News: સાબરકાંઠાના ઈડરમાં આવેલી PTC કોલેજની (Idar PTC College) પાણીની ટાંકીમાંથી મૃત શ્વાન (Dead Dog in Water Tank) મળી આવતાં ભારે ખળભળાટ મચી ગયો છે. ટાંકીના પાણીનો ઉપયોગ થતો હોવાની વિગતો સામે આવ્યા બાદ 30થી વધુ વિદ્યાર્થિનીઓને સારવાર માટે હોસ્પિટલ ખસેડવામાં આવી હતી. ઘટનાની ગંભીરતાને ધ્યાનમાં રાખીને આરોગ્ય વિભાગે તકેદારીના પગલાં શરૂ કર્યા છે. અત્યાર સુધીમાં કુલ 70 પૈકી 35 વિદ્યાર્થિનીઓને વેક્સિન આપવામાં આવી છે.
Idar PTC College: ટાંકીમાં મૃત શ્વાન હોવા છતાં પાણીનો વપરાશ થયાનો આક્ષેપ
મળતી માહિતી મુજબ, કોલેજ અને હોસ્ટેલની પાણીની ટાંકીમાં મૃત શ્વાન મળી આવ્યું હતું. આ ટાંકીના પાણીનો છેલ્લા ઘણા દિવસોથી ઉપયોગ થઈ રહ્યો હોવાનો ખુલાસો થયો છે. પીવાના પાણીની ટાંકીમાં મૃત શ્વાન મળી આવતાં કોલેજ અને હોસ્ટેલના સંચાલન સામે સવાલો ઊભા થયા છે. પાણીની સ્વચ્છતા અને નિયમિત ચકાસણી કરવામાં આવી હતી કે નહીં તે અંગે પણ ચર્ચા શરૂ થઈ છે.
30થી વધુ વિદ્યાર્થિનીઓને હોસ્પિટલ ખસેડાઈ
દૂષિત પાણી પીધાની આશંકા વચ્ચે 30થી વધુ વિદ્યાર્થિનીઓને સારવાર માટે હોસ્પિટલમાં (Students Hospitalized) ખસેડવામાં આવી હતી. આરોગ્ય વિભાગે હડકવા સહિતના સંભવિત જોખમોને ધ્યાનમાં રાખીને તકેદારીના ભાગરૂપે વેક્સિનેશનની કામગીરી હાથ ધરી છે. કોલેજના કુલ 70 વિદ્યાર્થીઓ પૈકી અત્યાર સુધીમાં 35ને વેક્સિન આપવામાં આવી હોવાનું જણાવાયું છે.
પ્રાંત અધિકારી સિવિલ હોસ્પિટલ પહોંચ્યા
ઘટનાની જાણ થતાં ઈડરના પ્રાંત અધિકારી સિવિલ હોસ્પિટલ પહોંચ્યા હતા અને વિદ્યાર્થિનીઓની સ્થિતિ અંગે માહિતી મેળવી હતી. પાણીની ટાંકીમાં મૃત શ્વાન મળી આવવાની ઘટનાને પગલે વાલીઓમાં પણ ચિંતા ફેલાઈ છે.
આ ઘટનાએ શૈક્ષણિક સંસ્થાઓ અને હોસ્ટેલોમાં પીવાના પાણીની સ્વચ્છતા તથા નિયમિત ચકાસણીની વ્યવસ્થા સામે સવાલો ઊભા કર્યા છે. વિદ્યાર્થિનીઓના આરોગ્યને ધ્યાનમાં રાખીને જરૂરી તપાસ અને સારવારની કામગીરી હાથ ધરવામાં આવી રહી છે.
આ પણ વાંચો: રસ્તા કે ફૂટપાથ પર પાલતુ પ્રાણીની ગંદકી છોડી તો ખિસ્સું ખાલી થશે! AMC વસૂલશે દંડ
આ પણ વાંચો: ગિરનાર પરિક્રમા વચ્ચે ગામમાં સિંહણોની એન્ટ્રી! વાડલના રહીશોમાં ભયનો માહોલ
આ પણ વાંચો: ગિરનાર પરિક્રમાએ જતા શ્રદ્ધાળુઓને નડ્યો અકસ્માત: બોલેરો પલટી ખાઈ, 6ની હાલત ગંભીર
