India EU Free Trade Agreement Norway Support: ભારત અને યુરોપિયન યુનિયન (EU) વચ્ચે થવા જઈ રહેલા ફ્રી ટ્રેડ એગ્રીમેન્ટને લઈને વૈશ્વિક સ્તરે હલચલ તેજ થઈ ગઈ છે. આ કરારને ‘મધર ઓફ ઓલ ટ્રેડ ડીલ્સ’ માનવામાં આવી રહ્યો છે. આ દરમિયાન નોર્વેએ ભારત સાથેના ગાઢ આર્થિક સહયોગનું ખુલ્લું સમર્થન જાહેર કર્યું છે. ભારત-EU કરારથી માત્ર ભારત જ નહીં, પણ સમગ્ર યુરોપના સંબંધોને એક નવી દિશા મળશે.

નોર્વે ભલે EUનો ભાગ નથી, પણ India નું મોટું મિત્ર

ભારતમાં નોર્વેના રાજદૂત મે-એલિન સ્ટેનરે એક વિશેષ મુલાકાતમાં જણાવ્યું હતું કે, ભારત અને EU વચ્ચેનો પ્રસ્તાવિત કરાર ઐતિહાસિક સાબિત થશે. તેમણે સ્પષ્ટ કર્યું કે નોર્વે EUનો સભ્ય નથી, પરંતુ તે યુરોપિયન ફ્રી ટ્રેડ એસોસિએશન (EFTA) નો ભાગ છે. ભારત અને નોર્વે વચ્ચે 1 ઓક્ટોબરથી વેપાર અને આર્થિક ભાગીદારી કરાર (TEPA) પણ અમલમાં આવી ચૂક્યો છે, જે આર્થિક સંબંધોમાં એક મોટો માઈલસ્ટોન છે.

ટ્રમ્પની ટેરિફ નીતિઓ સામે ફ્રી ટ્રેડનો પક્ષ

જ્યારે અમેરિકી રાષ્ટ્રપતિ ડોનાલ્ડ ટ્રમ્પ ટેરિફ વધારવાની અને સંરક્ષણવાદની વાત કરી રહ્યા છે, ત્યારે નોર્વેએ મુક્ત વેપારના પક્ષમાં પોતાનો અવાજ બુલંદ કર્યો છે. રાજદૂત સ્ટેનરે કહ્યું કે નોર્વે જેવી નાની અને ખુલ્લી અર્થવ્યવસ્થાને મુક્ત વેપારથી જ ઘણો ફાયદો થયો છે. અમે વેપારમાં અવરોધો ઊભા કરવાને બદલે તેને હટાવવાના પક્ષમાં છીએ.

AI સમિટ અને પીએમ મોદીનો નોર્વે પ્રવાસ

નોર્વેએ પુષ્ટિ કરી છે કે તે આવતા મહિને ભારતમાં યોજાનારી AI સમિટમાં ભાગ લેશે. નોર્વેના ડિજિટલાઇઝેશન મંત્રી એક મોટા પ્રતિનિધિમંડળ સાથે ભારત આવશે. એટલું જ નહીં, વડાપ્રધાન નરેન્દ્ર મોદી પણ આ વર્ષે નોર્વેની મુલાકાત લઈ શકે છે, જ્યાં તેઓ ‘ઈન્ડિયા-નોર્ડિક સમિટ’માં ભાગ લેશે. આ મુલાકાતથી બંને દેશો વચ્ચેની વ્યૂહાત્મક ભાગીદારી વધુ મજબૂત બનશે.

ગાઝા અને યુક્રેન પર શાંતિની પહેલ

ગાઝા શાંતિ માટે ટ્રમ્પના ‘બોર્ડ ઓફ પીસ’ પ્રસ્તાવ પર નોર્વેએ જણાવ્યું કે તેમને આમંત્રણ મળ્યું છે, પરંતુ આ પહેલ સંયુક્ત રાષ્ટ્ર સાથે કેવી રીતે જોડાય છે તે અંગે તેમણે કેટલાક સવાલ ઉઠાવ્યા છે. જોકે, નોર્વે ગાઝા અને યુક્રેનમાં શાંતિ લાવવાના દરેક વાસ્તવિક પ્રયાસોનું સમર્થન કરે છે.

આ પણ વાંચો: ઈરાનની પોતાનું ઇન્ટરનેટ બનાવવાની તૈયારી, વૈશ્વિક ઇન્ટરનેટ ઍક્સેસ બંધ કરવામાં આવશે

આ પણ વાંચો: ઈરાન-અમેરિકા વચ્ચે વધતો તણાવ: ટ્રમ્પ અને ખામેની વચ્ચે શબ્દયુદ્ધ

આ પણ વાંચો: અમેરિકામાં પારિવારિક વિવાદમાં ગોળીબાર, એક ભારતીય સહિત ચાર લોકોના મોત